Como cada añu (y van 33), les asociaciones SOS Racismu Asturies, XEGA y Xunta pola Defensa de la Llingua Asturiana montamos mientres les fiestes de San Mateo, n’Uviéu, el yá míticu chiringu Topu Fartón. Amás de los oxetivos de sensibilización social sobre la situación de la llingua asturiana y la necesidá d'algamar l'estatus d'oficialidá y unes polítiques normalizadores series que aseguren el futu
ru del idioma; sobre’l respetu a la diversidá sexual y d’identidá de xéneru, la prevención del VIH/sida y otres ITS; y la erradicación del racismu y la xenofobia nun ambiente festivo y distendío, El Topu Fartón tien otra función, más prosaica pero de suma importancia pa la pervivencia de les nueses asociaciones y de les actividaes que desenvolvemos nes mesmes… Referímonos, ta claro, a la finalidá financiera. El nuesu trabayu voluntariu nel chiringu ye fundamental p’apurrir los recursos económicos necesarios pa caltener tola infraestructura de les nueses organizaciones. Recuerda que toes y caúna de les persones que “trabayamos” n’El Topu facémoslo por activismu, de forma voluntaria y ensin contraprestación económica.
