14/02/2026
Nidaaminta Nolosha!
Nidaaminta noloshu: ma aha jadwal adag, waa xorriyad maskaxeed
Dad badan marka ay maqlaan ereyga nidaamin waxay maskaxda ku sawirtaan jadwal adag, saacad walba oo la cabbiray, iyo nolol wada xakamayn ah oo aan dabacsanaan lahayn. Laakiin runta dhabta ahi waa tan: nidaamintu ma aha in aad naftaada ku adkeyso, ee waa in aad naftaada u naxariisato.
Nidaamintu waa hab fikir ku siinaya hab leh deganaan, iyo awood aad adigu ku maamusho noloshaada, halkii ay hawlaha, waqtiga, iyo filashooyinka dadka kale ku xukumi lahaayeen.
Inta badan madhnaanshaha aynu dareemeyno ma aha sabab la xidhiidha wakhti la’aan, balse sababtu waa in aynu wax walba isku darayno, innaga oo aan kala saarayn waxa muhiimka ah iyo waxa aan muhiimka ahayn.
Marka maskaxdu buuxsanto, go’aannadu way adkaadaan, deganaantuna way luntaa. Sidaa darteed, talaabada ugu horreysa ee nidaamintu waa in aad isweydiiso:
maxaa runtii mudan waqtigayga iyo tamartayda inaan ku bixiyo?
“Markaad noloshaada nidaamiso, maalmahaagu ma bataan, balse way sii ballaadhaan.”
Nidaamintu waxay ka bilaabataa gudaha
Ma hagaajin kartid noloshaada bannaanka haddii gudahaagu qasan yahay. Maskax iskubuuqsan ma aragto wadada saxda ah. Sidaas darteed, nidaaminta dhabta ahi waxay ka bilaabantaa:
Inaad fikraddahaaga ku qorto warqad
Inaad aqoonsato waxa ku werwergelinaya
Inaad ka tanaasusho qummanaan raadinta
Nidaam dhab ah oo la fulin karo ayaa ka qiimo badan nidaam qumman oo aan la gaadhi karin. Doorashada noloshaada: geesinnimada nidaamka
Dad badan waxay ku nool yihiin nolol ay duruufo, dhaqan, ama dad kale doorteen oo ay kaga daydeen. Nidaamintu waxay kuu abuuraysaa fikir iyo wax iska waydiinta arrimahaaga nololeed:
Tani ma tahay noloshii aan rabay, mise nolol aan la qabsaday?
Nidaamintu waxay kaa rabtaa:
Inaad tidhaahdo “maya” mararka qaarkood
Inaad aqbasho in wax walba aysan ahayn mudnaan
Inaad maalin kasta isweydiiso: tani ma ii dhoweynaysaa yoolkayga?
“Nidaaminta dhabta ahi waa geesinimada doorashada.”
Waqtiga: saaxiib u noqo, ha cadaadin
Waqtigu ma aha cadow lala dagaallamo ama wax la lumiyo. Waa kheyraad u baahan faham iyo ixtiraam. Marka aad waqtigaaga si miyir leh u qorshayso:
Shaqadu way fududaataa
Nasashadu ma noqoto dambi
Maskaxduna way degtaa
Haka buuxin maalintaada shaqo dhammaan. Firaaqada la qorsheeyey waa qayb ka mid ah nidaamka caafimaadka leh. Nolosha u fududee si aad u sii socoto, Kakanaantu waa cadawga joogtaynta. Wax kasta oo noloshaada ku jira ma mudna in ay kaa qaataan tamarbadan.
Yaree waxyaalaha aan faa’idada lahayn
Nadiifi oo nidaami goobtaada
Ka takhalus wax kasta oo ku daaliya oo aan wax kuu kordhinayn
“Wax kasta oo aan ku adeegayn, si tartiib ah ayay kuu cunayaan.” Haddii aad akhrido taariikhda dadka dunida raadka kuleh dhammaantood waxay bakhayliin ku ahaayeen wakhtiga bixintiisa.
Qorshe maalmeed: aasaaska deganaanta
qorshuhu ma aha caajis, ee waa nabadgalyadaada maskaxeed. Caadooyin yaryar oo joogto ah ayaa dhisa nolol deggan:
Qorshe dejin subaxeed fudud
Hal hawl oo diirad buuxda aad siiso markiiba
Dib-u-eegis maalinle ah
Ha isku dayin inaad nolosha beddesho hal mar. Isbeddelka dhabta ahi wuxuu ku yimaadaa tallaabooyin yaryar oo joogto ah. Nidaamintu ma aha in aad noqoto qof mashquul badan, waa in aad noqoto qof jooga, deggen, oo og waxa uu rabo. Markaad ogaato waxa aad rabto, buuqa intiisa kale si iskiis ah ayuu u yaraadaa.
Guuleyso!
