14/12/2025
اس سال کے شروع میں تقریباً 11 ماہ پہلے جب فیڈریشن کے سابق صدر ثاقب طاہر نے صدارت سے استعفیٰ دیا تو اس کے بعد پاک فیڈریشن میں صدارتی الیکشن کے دوران کچھ اختلافات کی وجہ سے دو گروپ بن گئے، جن میں سے ایک کی قیادت عبدالغفار مرہانہ صاحب اور دوسرے کی فیض اللہ ساہی صاحب کر رہے تھے۔
البتہ دونوں اطراف اتحاد اور اتفاق کےساتھ کمیونٹی کے مسائل کے حل کیلئے ایک احساس، خواہش اور پختہ سوچ پائی جاتی تھی۔ اس لئے دونوں اطراف سے راجہ ساجد محمود صاحب اور پرویز اختر جانی صاحب کی سربراہی میں مصالحتی کمیٹیاں تشکیل دی گئیں۔
دونوں کمیٹیوں نے کافی میٹنگز کی اور آخر کار فیڈریشن کو بہتر طریقے سے چلانے اور اکٹھے کام کرنے کیلئے ایک 4 نکات پر مشتمل معاہدہ کر لیا گیا ہے۔ جس کے مطابق افضال احمد بیدار صاحب سپیکر، فیض اللہ ساہی صاحب صدر اور الیکشن سے پہلے والی سپریم کونسل اپنا کام جاری رکھے گی۔ معاہدے کو حتمی شکل دینے میں دونوں کمیٹیوں کے ممبران اور سربراہوں راجہ ساجد محمود صاحب اور پرویز اختر جانی صاحب کو تمام سپریم کونسل کے ممبران نے بہترین الفاظ میں خراجِ تحسین پیش کیا ہے۔ اور اب امید کی جا رہی ہےکہ فیڈریشن پہلے کی طرح متحد ہو کر اپنا کام بہترین انداز میں شروع کر دے گی۔
