09/02/2026
Los díes 15 y 17 de febreru, dalgunos integrantes de Ximielga la Saya participarán na representación d’un cortexu de mazcaritos tradicionales, venceyáu al barriu de Valliniello, dientro de la programación del Antroxu d’Avilés.
🟢 Domingu 15 – Antroxu Tradicional
🕐 Dende les 13:00 h
📍 Calles del cascu históricu, con llegada a la Plaza d’España hacia les 14:00 h
El Antroxu Tradicional cobra protagonismu de la mano de:
👉 Compaña del Cornelu de L’Asoleyada
👉 Compaña del Fariñeru de Ximielga la Saya
Tres les comedies, dances y bailles, tendrá llugar la tradicional Puya’l Gochu y la copla del Tururú.
🔵 Martes 17 – Gran Desfile d’Antroxos
Nel Gran Desfile d’Antroxos, Moxigangues y Carroces, con salida dende’l colexu d’El Quirinal y llegada a la Plaza d’España, volverán participar los mazcaritos tradicionales.
Esti trabayu parte d’una investigación basada en testimonios de persones que recordaben l’Antroxu vivíu na so neñez enantes de la Guerra Civil, recuperando la esencia d’un Antroxu que tradicionalmente se celebraba los llunes de mercáu, cuando les comparses de los pueblos de la contorna baxaben a la ciudá pa dar alegría… y tamién pa pedir ayuda pa caltener les sos tradiciones.
Anguaño, pola dinámica urbana, esa celebración treslladóse al domingu.
Ximielga la Saya formará parte de la comparsa de los Sabanones, una comparsa de transición ente lo urbano y lo rural de Valliniello.
Pela so parte, L’Asoleyada dirixe la comparsa rural de Miranda, trabayada a partir de la memoria del vecín Pepe Venancia.
Esti añu amás recupérase un personaxe nuevu: el Festu, nome procedente del bron, la llingua gremial de los caldereros de Miranda. Un barrenderu simbólicu que barre lo malo, inspiráu nuna fotografía d’ente finales del sieglu XIX y principios del XX d’un barrenderu d’Avilés con mula y carru.
