27/07/2026
💙🤍 25 ANOS FACENDO FOLCLORE, FACENDO FAMILIA 💙🤍
No mellor día posible, o 25 de xullo, Día de Galicia, celebramos con enorme ledicia o 25º aniversario do Festival Folclórico Internacional da Asociación Cultural Barca de Loimil.
Un cuarto de século mantendo viva a nosa cultura, abrindo as portas a pobos irmáns e demostrando que a música e a tradición non entenden de fronteiras.
Chegar ata aquí non sería posible sen todas as persoas que, ano tras ano, camiñades ao noso carón. Grazas aos nosos socios, familiares, amigos e, moi especialmente, aos pais e nais dos nosos cativos, que coa súa implicación fan medrar unha canteira que é o noso maior orgullo e a mellor garantía de futuro.
Este ano tivemos a inmensa sorte de compartir escenario con tres grupos extraordinarios:
Os nosos queridos veciños da Casa do Povo de Melgaço
Dende Asturias, os nosos primos irmáns da Asociación Folklórica Cuelebre
E dende a cunca mediterránea, enchendo o escenario de forza, alegría e moita enerxía, os amigos de Anip Sumadija.
Foi unha honra recibirvos en Arbo e compartir convosco unha noite inesquecible.
Un ano máis, os integrantes da Barca de Loimil demostraron o seu compromiso, esforzo e paixón, dando o mellor de si mesmos para ofrecer ao público unha noite chea de emoción, folclore, música e tradición. Grazas tamén a todas as persoas que vos achegastes para vivir connosco esta celebración tan especial.
E como broche de ouro, grazas aos nosos amigos de Mel de Meiga, por poñer o punto final perfecto ao festival coa súa música, facendo que a festa continuase entre bailes, sorrisos e boa compañía ata ben entrada a madrugada.
Finalmente, queremos expresar o noso sincero agradecemento á Deputación de Pontevedra, ao Concello de Arbo e á Asociación Interfolc Vigo, polo seu apoio e colaboración para facer posible esta edición tan especial.
25 anos despois... seguimos coa mesma ilusión do primeiro día. Porque mentres haxa música, tradición e persoas con ganas de compartilas, a Barca de Loimil seguirá navegando.
Grazas por formar parte desta historia. Vémonos na próxima edición! 💙🤍🎶🌍🍷
