إحنــا مجموعه من الشباب عاوزين نكون إيجابيين اكتر ونقوم بواجبنا على المكان اللى اتربينا فيه وبننتمى ليه . فقررنا إنشاء حركة تطوعيه او جمعيه " ميفرقشى الاسـم " وفكرنا مع بعض وربنا وفقنا وعملنا برنامج نمشى عليه . من خلال البرنامج ده هنقدر اننا نطور البلد لانها من سوء الى اسوء وهنخليها زى ما احنا عاوزين... لان بكره ده بتاعنا وعشان كده لازم نضمن بيئه صحيه – نظيفه – متطوره لينا ولولادنا من بعدينا هنعمل
هم أسس وضوابط يمشوا عليها , وهنكثف كل طاقتنا عشان نوصل للى احنا عاوزينه هنواجه مصاعب كتيره وكبيرة بس احنا قادرين اننا نجتازها بالصبر وبفضل خبرات وتجارب الاشخاص الاكبر سننا ( لا خاب من استشار ) .
- نوعدكم اننا نكون قد المسؤليه.. وميدان التحرير خير دليل على كلامنا وعلى الخطوه اللى احنا عاوزين نعملها لان بفضل الشباب قدرنا نتحرر من ظلم وجوع وفقر ومرض واهانه فضل كابس على انفاسنا 30 سنه , ساعدونا وخللى ايديكوا فى ايدنا اكيد ليك دور تقوم بيه متبقاش سلبى وخلليك مره واحده فى حياتك ايجابى جرب – حاول دى البلد اتغيرت فلازم احنا كمان نتغير ولازم نصلح بايدينا ونعمل اللى عاوزينه منفضلشى نلعن فى البلد وفى العيشه واللى عايشينها واحنا واقفين مكانا.. لازم نتحرك. " نعيب زماننا والعيب فينا .. وما لزماننا عيب سوانا "
وعلى فكره احنا مش جايين نقول شعارات ولا كلمتين سمعناهم فى التلفزيون وبنرددهم إحنا فعلا عاوزين نعمل حاجه وبكره شاهد على كلامنا . إحنا محتاجين مساهتكم معانا ( بفلوس – بالمجهود – بالمشورى ) ..
وحتى لو مقدرناش اننا نحقق اللى احنا عاوزين نعمله ده فيكفينا شرف المحاوله ولما نعيش عشان هدف فى حياتنا بنحاول نحققه شرف لينا الف مره عن اننا نعيش ونيجى الدنيا ونخرج منها من غير أى هدف .
تنـويــه هــام : حـركة شبــاب بتبـس لا تنتمــى لأى نشــاط سيــاسى أو ديـنــى داخـل القــرية
