20/07/2024
حدث بالفعل
بص يا مؤمن انا كنت بمحلل في الشارع كدا قصاد المكتب.. وشايف شاب خمشطريني كدا بعجلة وقف قصاد المكتب وشايل شنطة باك على ضهره.. انا طبعا طافي نور المكان من قرف الدبان بالليل.. هو تقريبا كان خايف يخش وقفت وراه وقولتله اتفضل.. يا ولداه الواد بصلي ولا كأنه هربان من كمسري القطر.. المهم علشان مطولش عليكم.. دخل وطلع اللاب.. يا عمو اللاب دا بشغله ينور بس مش جايب شاشة.. قولتله خلاص هتسيبه واخد اسمك ورقم تليفونك اشوف المشكلة وأبلغك بها والتكلفة قبل ما أصلح.. عداني العيب صح.. المهم انا من عدتي لما بكون شغال بكلم الزبون السبيكر شغال.. فتحت الجهاز وعرفت المشكلة واتصلت بالرقم اللي ادهوني.. السلام عليكم الأستاذ أحمد معايا.. قالي اه يا عمو وانا بيني وبين نفسي الواد دا متربي اوي.. قولتله الجهاز في مشكلة كذا وهيكلف كذا.. قلي خليكي طيب يا عمو معايا.. باباااا باباااا عمو بيقول كذا وكذاااا وكذاااا.. إذ يا مؤمن تحس ان كل البيت حضر جنبه ويتناقشوا في اللي اتقال.. وتحسني قاعد وسطيهم عامل ذي الأطرش في الزفة.. طيبة ابوه وعقربة أمه ولهافة اخوه وتناحة اخته.. يا مؤمن حرفيا ١٠ دقايق وانا متعلق على التليفون لدرجة انه صلحت المشكلة وقفلة نص مسامير الجهاز تقريبا.. وبعدها يقولي خلاص يا عمو صلحه.. لا يا راجل قول والمصحف
وبس كدا يا مؤمن
