https://www.facebook.com/796013487207903/

Walid Abu Talib, Giza (2026)

20/10/2026

عارفة يا ماما إنك ممكن تقعدي مع ابنك ساعة كاملة تشرحي ليه معلومة وميفهمهاش كويس… لكن ممكن يتعلمها في 10 دقايق لعب؟ 🧠

هقولك على سر مهم جدًا في تربية وتعليم الأطفال

خلي بالك ابنك مش لازم يقعد على كرسي قدام كتاب عشان يتعلم، ومش لازم التعليم يكون أوامر وحفظ وتسميع

أحياناً بتكون أحسن طريقة هي طريقة مش هتحتاجي فيها غير شوية لعب ووقت تقضيه معاه. ❤️

طيب ليه التعلم باللعب مهم جدًا لطفلك، وإزاي تقدري تستخدميه في البيت بطريقة بسيطة وممتعة.

أولاً: ايه اللي بيحصل لطفلك وهو بيتعلم باللعب؟

1️⃣ بيفهم المعلومة كويس جدا بدل ما يحفظها وخلاص.
لما تعلميه الألوان باستخدام المكعبات، أو الأرقام باستخدام الألعاب، إنتي بتساعديه يشوف المعلومة ويجربها بنفسه، مش مجرد يسمعها منك.

2️⃣ بتنمي عنده التركيز والانتباه.
لما يركب بازل، أو يدور على حاجة مخبأة، أو يحاول يبني برج بالمكعبات، هو بيتدرب على التركيز ومتابعة الخطوات والاستمرار في المهمة.

3️⃣ بتطوري لغته وكلامه.
لما تلعبي معاه لعبة الطبيب والمريض، أو البائع والمشتري، أو تعملي معاه حوار بالعرائس، إنتِ بتديه فرصة يسمع كلمات جديدة ويستخدمها ويتعلم يعبر عن نفسه.

4️⃣ بتعلميه التفكير وحل المشكلات.
لما البرج يقع ويحاول يبنيه تاني، أو يكتشف إزاي يركب قطعة في مكانها، هو بيتعلم يجرب ويفكر ويغير طريقته بدل ما يستسلم من أول محاولة.

5️⃣ بتساعديه يفهم مشاعره ويتعامل معاها.
اللعب التخيلي والرسم والعرائس ممكن يساعدوا الطفل يعبر عن الخوف أو الغضب أو الحزن، خصوصًا لما يكون لسه مش قادر يشرح مشاعره بالكلام.

6️⃣ بتقوي علاقتك بيه.
لما تنزلي لمستواه وتشاركيه اللعب باهتمام ومن غير انتقاد مستمر، هو بيحس إنك قريبة منه، وإن الوقت معاكي مش كله أوامر وتصحيح لأخطائه.

طيب نطبق التعلم باللعب إزاي في البيت؟

أمثلة بسيطة تقدري تبدئي بيها من النهارده

لو عايزة تعلميه الألوان:
بدل ما تقولي ليه: ده أحمر، وده أزرق، وتطلبي منه يحفظهم… العبي معاه لعبة البحث عن الألوان.

قولي ليه: «يلا يا بطل، هاتلي حاجة لونها أحمر من الأوضة» وخليه يدور بنفسه...

لو عايزة تعلميه الأرقام والحساب:
استخدمي المكعبات أو المعالق أو الألعاب والمجسمات.. وخليه يعدها بنفسه، ويقسمها بينكم، ويكتشف مين عنده أكتر ومين عنده أقل...

لو عايزة تنمي لغته:
اختاري قصة مصورة، واسأليه: تفتكر إيه اللي هيحصل بعد كده؟ أو العبي معاه لعبة تخمين الأشياء ووصفها واستخدامها...

لو عايزة تنمي مهاراته الاجتماعية:
العبي معاه ألعاب تبادل الأدوار، زي إن كل واحد يستنى دوره، أو لعبة محل صغير يتعلم فيها الطلب والاستئذان والتواصل...

لو عايزة تنمي استقلاليته:
خليه يشاركك في ترتيب الألعاب، أو تجهيز السفرة... بما يناسب عمره، وحولي المهمة للعبة بدل ما تكون مجرد أمر لازم ينفذه.

لكن خلي بالك من 5 قواعد مهمة جداً

✅ اختاري لعبة مناسبة لعمر طفلك وقدراته، مش أصعب من إمكانياته.

✅ خليه يشارك ويجرب ويغلط، ومتعمليش كل حاجة مكانه.

✅ مش لازم نحول كل لعبة لامتحان؛ مش لازم تسأليه طول الوقت ،ده لونه إيه؟ وده اسمه إيه؟

✅ امدحي محاولته ومجهوده اللي عمله، مش بس النتيجة النهائية

✅ احترمي اهتمامه، واديه فرصة يختار اللعبة ويقود اللعب أحيانًا.

وأهم حاجة يا ماما، متنسيش إن الطفل مش آلة مطلوب منها تستقبل المعلومات طول اليوم

طفلك محتاج يتحرك، ويجرب، ويكتشف، ويسأل، ويغلط، ويحاول من جديد.

والتعلم باللعب مش معناه إننا نستغنى عن التعليم المنظم أو المذاكرة لما تكون مناسبة لعمره؛ معناه إننا نستخدم اللعب كوسيلة فعالة تساعده يفهم ويتعلم ويستمتع في نفس الوقت.

الطفل مش محتاج ألعاب أكتر بقدر ما هو محتاج حد يشاركه اللعب، ويسمعه، ويديله فرصة يكتشف العالم بنفسه.❤️

وقوليلي ابنك بيحب يلعب إيه أكتر حاجة؟

18/10/2026

10 كلمات أو جمل لو قولتهم لابنك باستمرار هتغير شخصيته للافضل ،وتبني ثقته في نفسه ،وتكون بينكم علاقة عمرها ما تتكسر 👇

1️⃣ أنا بحبك
ودي مش لما يكون شاطر بس ولا عشان سمع الكلام ولا عشان جاب درجة كويسة
بحبك عشان هو وبس بدون شروط

🔹 الكلمة دي بتزرع الأمان الداخلي عند الطفل
إنه محبوب بدون شروط
إن وجوده في الحياة وبالنسبالك ليه قيمة
لما بيسمعها كتير مش بيتعلق بحد تعلق مرضي
ولا يستنى حب الناس عشان يحس بقيمة نفسه لأنه اتزرع فيه من البداية❤️

2️⃣ أنا فخور بيك
حتى لو عمل حاجة بسيطة جدا ،حتى لو حاول ومكملش
حتى لو وقع وحاول يقوم

🔹 الكلمة دي بتزرع الإحساس بالإنجاز المستمر وتخليه يصدق نفسه في كل حاجة بيحاول يعملها بعدين

دماغ الطفل بيرتبط جواها (أنا كويس… أنا أقدر… أنا مهم)

3️⃣ غلطك مش بيقلل منك(توصلهاله بطريقته اللي يفهمها)

دي من أخطر وأهم الجمل
🔹 الجملة دي بتزرع الأمان من الفشل والجرأة على المحاولة مرة واتنين وتلاته

الطفل اللي بيسمعها كتير ما يخافش يغلط ويحاول
وما يكبرش وهو خايف من التجربة والمحاولة

4️⃣ أنا واثق فيك
بتوصله إني مش سايبك لوحدك بس مؤمن بقدراتك

🔹 الكلمة دي بتزرع الاعتماد على النفس وتقوي شخصيته وثقته في نفسه

الجهاز العصبي للطفل
بيهدى جداً لما يحس إن أهله مصدقينه وواثقين فيه

5️⃣ إحكيلي أنا سامعك كويس
ومش بس سامع صوتك لكن سامعك بقلبي وبتفاعل معاك

🔹 الكلمة دي بتزرع الثقة والقرب بينكم، وإن البيت مكان آمن للكلام
الطفل اللي بيتسمع باهتمام ،ما يكبرش وهو كاتم جواه ولا يلجأ لحد غريب يسمعه ولا طريق يعوضه نقصه، وممكن يتوجع في الطريق💔

6️⃣ مش لازم تبقى زي حد
ولا أخوه ،ولا ابن خالته ،ولا صاحبه

🔹 الكلمة دي بتزرع جوه الطفل تقبل الذات ،وإنه نسخة واحدة ،ويسعى انه يكون أفضل نسخه من نفسه مش أفضل من حد غيره

المقارنات بتكسر ،والجملة دي هي إللي بتبني

7️⃣ مشكلتك مهمة عندي
حتى لو شايفها تافهة ،حتى لو بسيطة بالنسبالك

🔹 الكلمة دي بتوصل للطفل إن مشاعره ليها قيمة ومهمه وإنه يستحق الاهتمام

الطفل اللي مشاكله ومشاعره بتتسمع ،ما يكبرش وهو بيهون من وجعه ووجع غيره

8️⃣ أنا جنبك ومعاك مهما حصل
دي رسالة أمان للطفل مش سيطرة

🔹 الكلمة دي بتزرع الثبات النفسي والإحساس الدائم بالدعم
الطفل لما يكبر ميحسش إن الدنيا كلها ضده مهما حصل

9️⃣ أنا مبسوط برأيك ده
حتى لو هتعدل رأيه
وحتى لو مش موافق عليه

🔹 الكلمة دي بتبني الشخصية القوية وقوة التعبير
والطفل بيتعلم يقول رأيه
من غير خوف ولا تردد

🔟 إنت جميل زي ما إنت
الجملة دي لوحدها
علاج نفسي من كل حاجة❤️

🔹 بتزرع السلام الداخلي
وتوقف جلد الذات
الطفل يكبر مش محتاج يثبت نفسه لكل الناس

فاكرين إيه أكتر كلمة أثرت فينا وإحنا صغيرين؟
غالباً كانت كلمة اتقالت…
أو غياب كلمة متقالتش 💔

أولادنا مش محتاجين تربية مثالية خالص
هم محتاجين قلوب حاضنة وكلام بيطمنهم

الكلمة بتدخل المخ
وتفضل محفورة سنين طويلة

قولوا لأولادكم الكلام ده كل يوم
حتى لو حسيتوا إنه عادي
هو مش عادي عندهم… هو بالنسبالهم حياة❤️

17/10/2026

لكل ماما❤️..لازم تعرفي إن طفلك علشان يكبر طبيعي، لازم يغلط لازم يتشاقى، يتنطط، يجري، يقع، يقوم، يضحك، يبكي، يتخانق مع أخوه، ويجرب كل حاجة
اللي إنتي بتشوفيه غلط هو في الحقيقة درس من دروس الحياة اللي هيتعلم منها في حياته كلها

الطفل مش بيتعلم بالقواعد المكتوبة والمحفوظة، الطفل بيتعلم بالتجربة.
لو منعتيه من التجارب دي كلها ،كأنك منعتي عنه أهم وسيلة للتعلم.
التربية مش معناها إن ابنك يمشي زي ما انتي عايزة من غير ما يغلط، التربية الحقيقية إنك تهيئي ليه "مساحة آمنة" يغلط فيها من غير ما يتأذي، ومع كل تجربة تعلميه بهدوء، وتوجهيه بحب.

بلاش تمنعيه طول الوقت
اقعد ساكت
ما تتحركش
كفاية لعب
ما تلمسش
ما تعملش
كل الجمل دي بتقتل الفضول اللي هو سر النمو عند الطفل.
الطفولة مش كتاب قوانين يمشي عليها ،الطفولة حياة بتتجرب لحظة بلحظة وخطوة بخطوة وتجربة تجربة.

دورك مش إنك تمنعي ،دورك إنك توجهي.
لما يغلط، ما تعاقبيهوش بعـ..نف ،علميه بهدوء.
لما يقع، متلوميهوش إنه مقعدش ساكت ،ساعديه يقوم ويجرب تاني.
لما يزود اللعب، ما تكبتيهوش، بس وجهي طاقته في مساحة آمنة ليه.

وإعرفي إن كل غلط بيغلطه النهارده، هو سبب تعلم حاجة جديدة ونجاح بكرة.
ابنك لما يلمس ويكسر، بيتعلم إزاي يمسك بحذر بعد كده.
لما يجري ويقع، بيتعلم يحافظ على توازنه.
لما يغلط في كلمة، بيتعلم إزاي يتكلم صح.
ولما يجرب، حتى لو فشل ،بيتعلم يقوم من تاني.

سيبي طفلك يعيش طفولته كاملة.
سيبيه يغلط، يتعلم، يلعب، يكتشف، يتسخ، يجري، يضحك من قلبه.
إنتي دورك هنا تحطي حدود آمنة، لكن ما تقيديش حركته وروحه.

لأن الطفولة مش هتتكرر، ولو ضاعت ما بترجعش.
وصدقيني، الطفل اللي بيعيش طفولته صح، هو اللي هيبقى إنسان سوي، واثق من نفسه، قوي الشخصية، ويعرف يتعامل مع الدنيا بعدين.

ابنك مش محتاج أم تمنعه من الغلط ،ابنك محتاج أم تكون حضن آمن بعد الغلط ❤️

16/10/2026

حاجات ممكن تندم عليها بعدين لو معملتهاش مع طفلك دلوقتي

في يوم من الأيام
هتبص على بنتك ابنك وهو كبير، ومش بيحضنك زي زمان، مش بيحكيلك كل حاجة، ومش محتاج إيدك في كل خطوة.
وممكن وقتها تفكر..
إن كان في حاجات المفروض كنت أعملها معاه وهو صغير ومعملتهاش.
وكنت دايمًا مأجلها أو مش مقتنع بيها من الأساس.

بس الحقيقة
الطفل بيفهم… وبيحس… وبتعيش جواه كل حاجة.
وبيكبر وهو شايل جواه اللي عاشه بكل تفاصيله وأثره.

صدقني في حاجات لو متعملتش دلوقتي مع طفلك
بتظهر بشكل موجع بعدين:

1️⃣ لو مش بتحضنه بشكل كفاية وهو صغير

الطفل اللي ما شبعش حضن وأمان، بيكبر محتاج طمأنينه من أي حد.
ممكن يتعلق بأي علاقة، حتى لو مؤذية.
أو العكس…
يقفل على نفسه ويبقى بارد في مشاعره.
الحضن أمان نفسي للطفل بيتبني جواه طول عمره.

2️⃣ لو مش بتسمعه بجد:
مش سمعته وانت ماسك الموبايل.
مش سمعته وانت مستعجل.
سمعته بتركيز… بنظرة… بإهتمام.

الطفل اللي محدش بيسمعه وهو صغير، بيكبر يا إما شخص مش بيعرف يعبر عن نفسه، يا إما شخص صوته عالي وغضبه أعلى لأنه اتعود إن محدش بيسمع غير الصوت العالي.

اسمعه دلوقتي عشان لما يكبر ييجي يحكيلك بدل ما يروح يحكي لغيرك.

3️⃣ لو ما علمتوش يعرف يعبر عن مشاعره:
مش كل ما يعيط تقوله
“عيب” أو “الرجالة ما تعيطش” أو “ما تكبرش الموضوع”

هيكبر مش بيعرف يقول ،أنا زعلان ،أنا موجوع ،أنا محتاج حد
وهيطلع غضبه في شكل عصبية، عـ.ـدوانية، اكتئاب، أو انسحاب من الناس.

اللي متعلمش يتكلم عن وجعه وهو صغير…
بيصرخ بوجعه وهو كبير.

4️⃣ لو مش بتلعب معاه:
اللعب مش تضييع وقت مع الطفل.
اللعب هو لغة الطفل.
هو الطريقة اللي الطفل بيحس بيها إنك قريبة منه، فاهماه ،مشاركه عالمه.

الطفل اللي أهله مش بيلعبوا معاه، بيكبر وهو شايف إن أهله
مش صحابه مش مصدر أمان ليه مش فاهمينه.

اللعب دلوقتي بيبني علاقة قوية بينكم
العلاقة دي لما يكبر بتبقى حصن ضد الانحراف والوحدة لأنكم ماليين حياته وفاهمينه مش هيحتاج لغيركم.

5️⃣ لو محطيتش حدود واضحة بحب:

يا إما سيبته على البحري ومفيش نظام.
يا إما شددت عليه زيادة عن اللزوم.

النتيجة في الحالتين؟
طفل تايه.
يا متمرد ومش بيحترم أي قواعد.
يا مكسور وخايف يجرب أي حاجة.
الحدود الثابته الواضحة بتقول للطفل:
أنا بحبك… وبحميك… ومش بسيبك تايه.

6️⃣ لو ما زرعتش ثقته بنفسه:
كل مرة كسرت بخاطره بكلمة
إنت فاشل، إنت مفيش فايدة فيك، شوف ابن خالتك أو ابن عمك عامل إزاي..

أنت كنت بتزرع جواه صورة عن نفسه.
والصورة دي هيفضل شايلها سنين.
الطفل اللي ما اتشجعش وهو صغير، بيكبر وهو شايف نفسه قليل…حتى لو هو مليان قدرات.

7️⃣ لو مكنتش قدوة حقيقية ليه
هو مش هيتربى بالكلام.
هو هيتربى باللي شايفه.

لو أنت بتزعق وعايزه هادي.
لو أنت بتكذب وعايزه صادق.
لو أنت بتضرب وعايزه محترم.

الطفل بيتعلم منك إزاي يتعامل مع نفسه ومع الناس.

متستناش منه يكون نسخة أحسن منك وأنت مش مستعد تكون النسخة اللي هو محتاجها.

8️⃣ لو مش بتحسسه إنه مقبول زي ما هو:

مش مقبول بس لما يسمع الكلام.
مش محبوب بس لما يكون شاطر.
الطفل اللي حبك ليه كان دايماً مشروط، بيكبر طول عمره بيجري ورا رضا وحب الناس.
وبيخاف يبان على حقيقته.

قبوله دلوقتي زي ما هو، بيخليه بكرة شخص سوي، ثابت، مش محتاج يلبس أقنعة.

9️⃣ لو ما علمتوش الأمان بدل الخوف:
التربية بالخوف بتطلع طفل مطيع قدامك
بس خايف، مهزوز، أو كذاب من وراك.

الأمان بيطلع طفل واثق، يعترف بالغلط، يرجعلك باستمرار لما يغلط، مش بيستخبى منك.
هو مش محتاج يخاف منك…هو محتاج يثق فيك.

الطفولة مش مرحلة بتعدي وخلاص.
الطفولة هي الأساس اللي بيتبني عليه عمر كامل.

كل حضن دلوقتي
كل كلمة حلوة
كل مرة سمعتله
كل مرة لعبت معاه
كل مرة طبطبت عليه
كل مرة احتويت ضعفه

دي مش لحظات بتعدي وخلاص ،دي بذور بتزرعها.

يا إما تحصد بعدها إنسان سوي، واثق، مطمئن
يا إما تحصد جروح ملهاش صوت بس وجعها كبير جواه.

خلي بالك
الفرصة اللي اسمها “دلوقتي وهو صغير”
ملهاش إعادة تاني💔

14/10/2026

أهم عشر مهارات تعلمهم لإبنك...
مش أهم حاجة إبنك يبقى شاطر في الحساب والإنجليزي وبس ولا يطلع الأول على فصله

الأهم من كل ده بكتير
هو إنه يطلع “إنسان يعرف يعيش”

يعرف يفهم نفسه
ويتعامل مع الدنيا صح
ويقف على رجله حتى لو لوحده

علشان كده
لو هتعلم ابنك 10 مهارات بس في حياته
خليهم دول

1.مهارة التعبير عن مشاعره
ابنك لما بيعيط أو يغضب ،ساعات بيكون بس مش عارف يقول جواه إيه ولا يعبر عن اللي جواه
علميه يقول: أنا زعلان… أنا مضايق… أنا خايف
إنتي كده بتديله مفتاح مهم جدًا لنفسه
بدل ما يكتم ويتحول الغضب لجسمه أو لسلوك مؤذي
خليه يحكي… اسمعيه من غير ما تحكمي عليه
لأن الطفل اللي بيتسمع ...بيتطمن ويهدأ

2.مهارة الرفض بأدب
مش كل "نعم" من الطفل معناها أدب… أوقات كتير معناها ضعف
ابنك محتاج يتعلم يقول "لا" لما حاجة تضايقه أو مش مناسبة ليه أو حد ضايقه
بس يقولها باحترام
وده يبدأ منك… لما تحترمي رفضه في الحاجات البسيطة وتتناقشي معاه
هيتعلم إن رأيه ليه قيمة… وإنه مش مضطر يرضي أي حد على حساب نفسه

3.مهارة تحمل المسؤولية
ابنك هيغلط… وده طبيعي جدًا
لكن الأهم يتعلم إن الغلط مش نهاية
وإنه مسؤول يصلح اللي عمله
مش كل مرة نبررله أو نغطي على غلطه
سيبيه يواجه نتيجة أفعاله بس بشكل آمن
علشان يفهم إن أفعاله ليها تأثير… وإنه قادر يتعلم ويعدل من نفسه

4.مهارة حل المشكلات
لما ابنك يحصله اي مشكلة حتى لو بسيطة
السهل إنك تحلها فورًا
بس الأذكى إنك تساعده يفكر في حلها
اسأله: إيه الحلول اللي شايفها؟ أو تفتكر ممكن نحلها إزاي؟
حتى لو حلوله بسيطة أو غلط
هو كده بيتدرب يعتمد على عقله مش على غيره وبس
ومع الوقت… هيبقى شخص بيعرف يتصرف بدل ما يتوه

5.مهارة الصبر وتأجيل الرغبات
الدنيا مش بتمشي بسرعة رغباتنا
مش كل حاجة هتيجي في وقتها
علميه يستنى ويوصل للحاجة بعد مجهود منه
خليه يفهم إن التأجيل مش حرمان
ده تدريب صح على الحياة

6.الثقة بالنفس
الثقة مش إنك تقوله إنت أحسن حد في الدنيا طول الوقت
لكن إنك تخليه يجرب
يغلط ويقوم تاني
وإنت جنبه مش بتحكم عليه
مش بتقارنه بغيره مش بتنتقده طول الوقت
لما يحس إنه مقبول حتى وهو مش كامل
هنا بتبدأ الثقة الحقيقية

7.مهارة احترام الآخرين
ابنك مش هيعيش لوحده
هيتعامل مع ناس مختلفة عنه في كل حاجة
في الشكل… في التفكير… في الطباع
علمه إن الاختلاف مش غلط
وإن احترام الناس مش ضعف
ده قوة ونضج
وده هيحميه من صراعات كتير قدام في حياته

8.مهارة الاعتماد على النفس
يمكن أسهل حاجة إنك تعملي كل حاجة بداله ،وأسرع كمان
بس الصح والأهم… إنك تسيبيه يحاول
يلبس لوحده… يرتب حاجته… يغلط ويتعلم
كل مرة بيعتمد فيها على نفسه
بتكبر جواه حتة ثقة وقوة
محدش يقدر يديها ليه غير التجربة

9.مهارة إدارة الفشل
مش كل مرة هيكسب
ومش كل مرة هينجح
لو ربطته دايمًا بالنجاح وانه لازم ينجح في كل حاجة
هينهار أول ما يفشل

لكن لو علمته إن الفشل خطوة
وإنه عادي يزعل… وبعدين يقوم تاني
إنت كده بتحميه من إحباط كبير في المستقبل
وبتخليه شخص مرن… مش هش

10.مهارة الاختيار
ابنك محتاج يحس إن ليه رأي
وإنه بيختار
حتى في حاجات بسيطة جداً
لبسه… أكله… ترتيب يومه
لما يختار ويتحمل نتيجة اختياره
هيتعلم أهم درس في الحياة
إن قراراته ليها قيمة… وليها نتائج
وده أساس تكوين شخصية مستقلة

وخلوا بالكم..
كل مهارة من دول مش هتتعلم في يوم وليلة
دي بتتبني كل يوم… من موقف صغير… من كلمة… من تصرف

وفي الآخر
القاعدة الأساسية بتاعتنا❤️
انت مش بتربي طفل بس
إنت بتبني إنسان

إنسان يا إما هيواجه الحياة بثقة
يا إما هيقضي عمره كله بيحاول وبس

اختار تبني مش بس تربي ❤️

13/10/2026

لو عندك ولد قبل الـ10 سنوات.. لازم تعلمه الحاجات دي ضروري جدًا قبل ما يفوت الأوان 💙

خدي نفس عميق يا ماما ويا بابا.. وركزوا في كل كلمة جاية.

الولد مش بيتربى بالأكل والشرب والتعليم والدروس وبس.
الولد بيتبني من جوه من وهو صغير

قبل ما يتم ١٠ سنين، بيكون بيجمع جواه أفكار ومعتقدات ومشاعر هتفضل مأثرة عليه سنين طويلة، ويمكن طول عمره.

وعشان كده.. لازم قبل السن ده تعلميه حاجات ما ينفعش تتأجل:

١. علمه إن الرجولة أخلاق قبل ما تكون قوة.
قوليله إن الرجولة مش صوت عالي، ولا فرض سيطرة، ولا إن الناس تخاف منه.
الرجولة الحقيقية احترام، وأمانة، وتحمل مسؤولية.

٢. علمه يعبر عن مشاعره.
ما تقوليش ليه "إنت راجل ما تعيطش."
خليه يعرف إن الحزن والخوف والوجع مش عيب وربنا خلقهم
العيب إنه يكتم كل حاجة جواه لحد ما ينفجر.

٣. علمه إن القوة مش في الضرب.
القوي مش اللي يكسب الخناقة.
القوي هو اللي يقدر يتحكم في غضبه، ويفكر قبل ما يتصرف.

٤. علمه يقول رأيه باحترام.
اسمعيه لما يتكلم.
خليه يحس إن صوته مهم، وإن من حقه يناقش ويسأل ويفهم، وقتها هيحس إن هو كمان مهم.

٥. علمه يحترم الناس.
يحترم الكبير، ويرحم الصغير، ويقدر المختلف عنه.
علميه إن قيمة الإنسان في أخلاقه، مش في شكله أو فلوسه أو مكانته.

٦. علمه يحب العلم والتعلم.
خليه يسأل ويستكشف ويقرأ.
ما تكسريش فضوله، لأن الفضول هو بداية الذكاء والنضج.

٧. علمه يحط حدود للناس.
يفهم إن من حقه يرفض أي تصرف يؤذيه أو يضايقه.
وإن احترام الآخرين لا يعني السماح لهم بالتعدي عليه.

٨. علمه يحب نفسه من غير غرور.
يعرف نقاط قوته ويثق فيها.
ويعرف نقاط ضعفه ويشتغل عليها.
الثقة بالنفس غير التكبر.

٩. علمه دينه وأخلاقه.
علميه الدين، والصدق، والأمانة، والرحمة.
لأن الدين والأخلاق هي البوصلة اللي هترشده لما تكبري وهو يكبر ومتبقيش جنبه في كل خطوة.

١٠. علمه إن الناس مش وسيلة ليه.
علميه يقدر مشاعر الآخرين.
وإن الكلمة الطيبة صدقة.
وإن احترام البنات والنساء والناس كلها جزء من تربيته وأخلاقه.

ابنك أمانة
أمانة ربنا حطها بين إيديك مش بس عشان يكبر في السن، لكن عشان يكبر في القيم والأخلاق والشخصية.

كل كلمة حلوة بتقوليها ليه
وكل حضن
وكل وقت بتسمعيه فيه
وكل مرة بتدعميه بدل ما تكسريه وتنتقديه

كل ده بيبني رجل المستقبل.

ما تسيبوش الدنيا تعلمه لوحدها
لأن الدنيا هتعلمه كتير، لكن مش دايمًا هتعلمه الصح.

ابني ابنك النهارده...
علشان بكرة يبقى راجل محترم، قوي بأخلاقه، رحيم بقلبه، واثق بنفسه، وسند لنفسه وليكم واللي حواليه. 💙

13/10/2026

من أكتر الأخطاء اللي بشوفها في شغلي مع الأطفال… إننا بنتعامل مع الطفل كأنه شخص كبير.

وده للأسف بيكون سبب في مشاكل كتير جدًا عند أطفال كتير.

الأب أو الأم دايما يقولوا
أنا مش فاهم هو ليه بيعمل كده؟
هو أنا لما أقول ليه حاجة مش بينفذها ليه؟
ع فكرة هو عارف الصح من الغلط
أنا قولت ليه ميت مرة!
هو على فكرة فاهم كويس جدا

وهنا لازم نقف ونفهم حاجة مهمة جدًا…

طفلك مش بيفكر زيك.
مش بيشوف الدنيا بنفس الطريقة اللي إنت شايفها بيها.
مش عنده نفس قدرتك على التحكم في نفسه.
مش عنده نفس قدرتك على تأجيل رغباته.
مش عنده خبرتك في الحياة.
ومش مطلوب منه يتعامل مع المواقف بنفس الطريقة اللي إنت بتتعامل بيها.

إنت لما تكون متضايق ممكن تسكت نفسك وتقول "خلاص مش هرد"
لكن الطفل ممكن يصرخ.

إنت ممكن تكون نفسك في حاجة وتقول "خلاص مش وقتها"
لكن الطفل ممكن يعيط ويصر على طلبه.

إنت ممكن تفهم إنك لو غلطت في حاجة يبقى لازم تصلح غلطك.

لكن الطفل بيحتاج إنك تعلمه ده، مش تفترض إنه فاهمه تلقائيًا.

الطفل لسه بيتعلم.
بيتعلم يعني إيه انتظار.
ويعني إيه رفض.
ويعني إيه أتحكم في غضبي.
ويعني إيه أخسر.
ويعني إيه أتقبل كلمة لاء
ويعني إيه أعتذر.
ويعني إيه أتحمل نتيجة تصرفاتي.
ويعني إيه أفكر قبل ما أتصرف.

فمينفعش أطلب منه كل ده، وبعدين أتعامل معاه كأنه شخص بالغ وعنده نفس القدرات اللي عندي.

أحيانًا الطفل بيغلط
مش لأنه عنيد.

وأحيانًا بيجادل
مش لأنه قليل الأدب.

وأحيانًا بيعيط
مش لأنه متدلع

وأحيانًا بينفجر من الغضب
مش لأنه عايز يستفزك.

هو ببساطة لسه معندوش المهارة اللي تخليه يتصرف بالطريقة اللي إنت متوقعها منه.

وهنا بييجي دورك كأب أو أم.

مش إنك تقول ،إنت المفروض تعرف
لكن تسأل نفسك ،أنا علمته ولا لاء وعلمته إزاي؟

ما تقولش هو ليه مش بيتحكم في نفسه؟

لكن قول أنا دربته إزاي على التحكم في نفسه؟

ما تقولش هو ليه مش بيعرف يتعامل مع مشاعره؟
لكن قول هل أنا ساعدته يفهم مشاعره أصلًا ويعبر عنها إزاي؟

أكبر غلطة ممكن نعملها مع أطفالنا إننا نحاسبهم على مهارات لسه ما اتعلموهاش

إنت مطلوب منك تنزل لمستوى فهم وقدرات طفلك
مطلوب منك تعرف إن الطفل مش نسخة صغيرة منك.

هو إنسان كامل ليه مشاعره واحتياجاته، لكنه لسه في مرحلة بناء شخصيته ومهاراته وقدرته على فهم الحياة.

وعشان كده…
قبل ما تقول لطفلك ،إنت ليه بتعمل كده؟
جرب تسأل نفسك الأول هو ممكن يكون محتاج إيه؟

وقبل ما تصفه بأنه عنيد
اسأل نفسك هل أنا علمته الطريقة الصح للتعبير عن رفضه؟

وقبل ما تقول إنه عصبي
اسأل نفسك هل أنا علمته إزاي يتعامل مع غضبه؟

وقبل ما تقول إنه مش بيسمع الكلام
اسأل نفسك هل أنا بكلمه بطريقة تناسب سنه وقدرته على الفهم؟

التربية مش إنك تطلب من الطفل يتصرف زيك
التربية إنك تساعده يوم بعد يوم إنه يتعلم المهارات اللي تخليه في المستقبل يعرف يتصرف بشكل أفضل منك كمان.

متنساش إن طفلك مش شخص بالغ وناضج وبيفكر بالمنطق

طفلك طفل لسه
وعقله لسه بيتطور.
ومشاعره لسه بتتكون.
ومهاراته لسه بتتبني.

وإنت مش وظيفتك إنك تحاسبه لأنه مش كبير
وظيفتك إنك تساعده يكبر صح❤️

12/10/2026

لو إبنك بيخاف كتير ،عنده تشتت انتباه وتركيز وبينسى بسرعة جداً،بيخاف من الصوت العالي ،معندوش ثقه بنفسه ، عنده تلعثم في الكلام ،عنده تبول لا إرادي، عنده لزمات (قضم الاظافر ،شد الشعر ،هز الرأس، مص الأصابع...) عصبي جدا أو عـ.ـدواني أو منعزل.
لو الحاجات دي بتحصل او بعضها وهو بيتعاقب عقاب جسدي قـ.ـاسي أو بينتقد طول الوقت أو بنصرخ ونزعق باستمرار
فـ هنا جسم الطفل اللي بينادي وبيقولكم أنا عندي هرمون القلق شغال طول الوقت💔

يعني إيه هرمون القلق؟
هرمون القلق (الكورتيزول) ده اللي الجسم بيفرزه لما يحس بالخــ.ـطر أو التـ..هديد.
وهو مش حاجة وحشة بالعكس، ربنا خلقه علشان يحمينا في المواقف الخطيرة.
لكن لما جسم الطفل يفضل عايش في توتر مستمر، خوف، صراخ، تهـ.ـديد، عنــ.ـف، مقارنة، أو ضغط نفسي مستمر
الهرمون ده بيفضل شغال طول الوقت وساعتها بدل ما يحميه، يبدأ يؤذيه.

إزاي بيزيد هرمون القلق عند الطفل؟

لما يسمع صوت عالي أو صراخ مستمر في البيت.
لما يتعاقب قدام الناس أو يتهان بالكلام.
لما يحس إن مفيش أمان أو استقرار.
لما يعيش في خوف دائم من إنه يغلط أو من العقاب.
لما بيتعرض لضغط دراسي أكبر من سنه.
لما بيحس إن حبك ليه مش ثابت يعني "لو عملت ده هحبك، لو غلطت هزعل منك او مش هحبك"

كل المواقف دي بتخلي مخ الطفل يعيش في قلق مستمر ،ويستمر الهرمون في الإفراز طول الوقت (احذر في خــ.ـطر) ويفضل شغال طول اليوم، حتى وهو في أمان.

لما هرمون القلق يفضل عالي بيحصل إيه للطفل؟

1.المخ بيتأثر:
الكورتيزول العالي بيأثر على منطقة ،الذاكرة، والتركيز، في المخ ،فتلاقي الطفل بينسى، مش مركز، مش قادر يستوعب دروسه، حتى لو كان ذكي جدًا.

2.الجسم بيتعب بسببه:
الجسم بيكون في حالة استنفار دائم، دقات القلب بتكون أسرع، النفس متقطع، الجهاز المناعي أضعف.
فتلاقي الطفل بيتعب بسرعة، بيشتكي دايمًا ،وممكن يصاب باضطراب التلعثم (التأتأه) خاصة وهو صغير.

3.تغير في سلوكيات الطفل:
الطفل اللي بيعيش في قلق مستمر بيظهر عليه كتير من السلوكيات
يا إما عـ..دواني وعصبي وعنيد جدًا.
يا إما منعزل وساكت طول الوقت.
وده بسبب إن جسمه بيحاول يتعامل مع ضغط مش قادر عليه.

4.اضطرابات في المشاعر:
الطفل مش بيعرف يسمي ولا يعبر عن مشاعره.
بيكون متوتر طول الوقت، وهو مش عارف ليه، فكل حاجة تبقى بالنسباله كأنها خــ.ـطر.
بيفقد إحساسه بالأمان حتى مع أقرب الناس ليه ،وده أصعب وجــ.ـع ممكن يعيشه طفل 💔

طيب إزاي نحمي الطفل من القلق المستمر؟

1️⃣ خليكي مصدر أمان مش خوف.
حضنك الأول أهم من أي عقاب لما يغلط، قبل ما تزعقي وتضربي، فكري الأول ،هو محتاج عقاب ولا أمان؟
الأمان الأول، والعقاب والتأديب بعدين( والعقاب بعيد تماماً عن التعنيف الاهـ..ـانة التهـ..ـديد)

2️⃣ قللي الصراخ
الصوت العالي كأنة بيدوس على زرار القلق في المخ استخدمي صوت هادي وثابت، وكرري القاعدة بحزم.

3️⃣ ابعدي عن التـ..ـهديد
التـ..ـهديد بيخلي الطفل يحس إنه مش محبوب.

4️⃣ خلي البيت مكان آمن ليه
الخلافات بين الأب والأم قدام الطفل بتعمل مشاكل كتير عنده.
اتكلموا بعدين، بعيد عن الطفل.

5️⃣ حاولي تعملي روتين يومي ثابت.
الروتين بيدي إحساس كبير بالأمان، مواعيد نوم، أكل، لعب.
العشوائية بتزود التوتر الداخلي.

6️⃣ خليه يعبر عن مشاعره.
لو قالك إنه خايف ما ترديش عليه بـ متخفش قوليله (أنا معاك، وطبيعي تخاف، احكيلي أكتر وهديه بعدها)
ده بيعلمه إن الخوف مش عيب ولا غلط وإن الأمان بيبدأ من كلامك معاه.

الطفل مش محتاج أم وأب مش بيغلطوا ،هو محتاج أم وأب يحسوا بيه ويكونوا هم أول مصدر أمان ليه مش مصدر القلق والخوف جواه.

طفلك مش دايمًا مزعج أو صعب هو ممكن يكون بيحـ..ـارب جواه الخوف والقلق
وإنتي العلاج الحقيقي ليه❤️

10/10/2026

لو ابنك عمره لحد 3 سنوات أنا عارف إنه بيعمل الحاجات دي كلها
مش بيهدا طول اليوم ،بيفتح كل حاجة... ويلعب فى كل حاجة… ويرمي ويدلق ويفتش في كل حاجة

طيب هو ليه كده وليه بيعمل كل ده؟
أولاً اطمني مش العيب فيكي ولا حاجة وانتي بتعرفي تربي وزي الفل❤️

بس تعالي أقولك ليه بيعمل كده عشان لو فهمتيه هترتاحي، وهتطمني وهتبطلي تتعصبي على ابنك، وهتبصي ليه بنظرة مختلفة تمامًا.

الطفل لحد سن 3 سنوات بيبني دماغة بطبيعه فطرية.

هو في مرحلة طبيعية جدًا اسمها:
مرحلة الاستكشاف الحسي والحركي (أو المرحلة الحسية الحركية)

طيب ليه ابنك بيلعب في كل حاجة ويفتح ويرمي ويدلق ويفتش ويكتشف كل حاجة حواليه؟

لأن المخ في السن ده بيتكون عن طريق التجربة المباشرة.
يعني الطفل مايفهمش “دي خـ..طر” أو “دي مش لعبة” بالكلام
هو لازم يلمس، يفتح، يشم، يعض، يزق، يوقع، يرمي..
علشان مخه يسجل المعلومة من خلال الحواس بتاعته.

الطفل في السن ده بيتعلم إن
الباب بيتفتح ويتقفل
الدرج بيطلع وينزل
الحاجة لما تقع بتعمل صوت
اللعبة لما تتشد بتتفك
المعلقة لما تخبط في الكوباية تعمل صوت

طيب ليه بيحب يفتح كل حاجة؟

لأن عنده فضول فطري.
الفضول ده هو أساس الذكاء في المستقبل.
هو كأنه بيسأل نفسه في صمت “العالم ده متكون من إيه؟”

طيب ليه بيرمي ويوقع؟

لأنه بيتعلم
*قانون السبب والنتيجة (أنا لما أسيب اللعبة تقع هيحصل إيه)
*الفرق بين التقيل والخفيف
*الصوت العالي والواطي
*المسافة والقوة
كل رمية = معلومة جديدة في مخه.

ليه بيتحرك في كل مكان طول الوقت؟

لأنه في المرحلة دي الحركة = حياة
الطفل مايعرفش يقعد ساكت.
المخ والجسد محتاجين حركة عشان ينموا.
وكل ما تحبسيه وتمنعيه أكتر…
كل ما طاقته تتحول لسلوكيات مزعجة أكتر.

الطفل في المرحلة دي:
مش عنيد
مش قليل الأدب
مش قاصد يتعبك
مش محتاج ضرب ولا زعيق

هو
محتاج أمان
محتاج مساحة
محتاج فهم
محتاج بيئة مناسبة لعمره

طيب أتعامل إزاي من غير ما أسيبه يبهدل البيت؟

إنتي مش مطالبة تسيبيه يبهدل البيت، بس مطالبة تعدلي البيئة مش الطفل.

اقفلي الأدراج اللي فيها حاجات خطرة
شيلي الحاجات القابلة للكسر من مستوى إيده
وفري ليه درج أو صندوق هو مسموح يفتحه ويقلبه
اعملي ركن لعب آمن يفرغ فيه طاقته
لما يمسك حاجة غلط قولي، دي مش بنلعب بيها… تعالى نلعب بالحاجة دي، بدل.. سيب ..لأ..عيب.

أهم نقطة
أكتر حاجة بتأذي الطفل في المرحلة دي
مش لعبه في البيت، لكن غضبك عليه وهو بيتصرف تصرف طبيعي.

الزعيق المستمر بيعلمه
* إنه دايمًا غلط مش صح
* وإن الفضول حاجة وحشة
* وإنه لازم يكتم طبيعته

وده بيطلع لنا بعد كده طفل
معندوش ثقة في نفسه
خايف يجرب اي حاجه
متردد
أو العكس، عنـ..ـيف ومتمرد وعنيد

السن ده مش مرحلة إزعاج زي ما كتير بيقول
ده مرحلة تأسيس عقل وشخصية.
وكل موقف صبر منك بيزرع جوا ابنك أمان❤️
وكل مرة تفهميه بدل ما تعاقبيه
بتربي إنسان سوي نفسيًا قبل ما تربي طفل مؤدب شكليًا.

البيت ممكن يتبهدل ويترتب
بس النفسية لما تتكسر صعب تتصلح💔

10/10/2026

لو عندك طفل ما بين ٩ لــ١٢ سنه..
تعالي اقولك طبيعة سلوك إبنك في المرحلة دي وايه اللي بيمر بيه عشان نكون عارفين نتعامل معاه إزاي.

المرحلة دي اسمها (مرحلة ما قبل المراهقة) ودي عاملة زي الكوبري ما بين مرحلة الطفولة والمراهقة ولو عبروا الكوبري ده بأمان هيكملوا طريقهم اللي جاي بأمان إن شاء الله.
وفيها الطفل بيهيئ نفسه بشكل فطري لمرحلة المراهقة.

تعالوا نشوف إيه السلوكيات اللي ممكن تلاحظوها في ولادكم من ٩ لـ١٢ سنة وليه بتحصل:

حب الصحاب والانجذاب للأصدقاء أكتر من الأهل:
هتلاقيه بيبدأ يكون عايز يقضي وقت أطول مع أصحابه أو يكلمهم بالساعات، وصحاب المدرسة وصحاب الشارع، وهتحسي انهم بالنسباله أهم من البيت واللي فيه
الهدف من ده إنه بدأ يتعلم ينتمي لمجموعة، ودي بداية لتكوين هويته الاجتماعية، اللي هيعيش عمره بيها (ودي حاجة فطرية من عند ربنا بتهيئه إنه داخل على مرحلة هينتمي فيها لمجموعات "الاصدقاء ،العمل ،الزواج والأسرة.."ويكون عنده هوية اجتماعية)
واحنا ساعات بنزعل ونمنع عنهم حاجات ربنا خلقها فيهم عشان يكتمل نموهم النفسي والعقلي والاجتماعي..
دورنا نوجه ونشارك ونزرع قيم من صغرهم.

تاني حاجة كثرة الجدال:
الطفل في المرحلة دي بيجادل كتير جداً ويحاول بكل الطرق يثبت شخصيته ورأيه، وده مش عناد لمجرد العناد، هو بيقول "أنا بقيت عندي فكر مستقل"
وده بيجهزه إنه يعرف ياخد قرارات وهو مراهق.
وبيختبر حدود استقلاليته.

زيادة الحساسية من النقد:
ممكن كلمة صغيره تزعله جداً أو تعصبه وبيزعل جداً لو حد انتقده أو قلل منه
وده جزء من التغير النفسي اللي بيمر بيه، بيتعلم يشوف نفسه من عيون الناس وبيكون صورته الذاتية عن نفسه ،ولو الطفل من وهو صغير عنده ثقه بنفسه مش بينتقد مش بيتقارن بغيره مش بيتعامل بعصبيه وزعيق ،ده هيساعده جدا في المرحلة دي.

التجارب الجديدة وحب المغامرة:
هتلاقيه عايز يجرب حاجات جديدة، سواء رياضة أو لعبة أو حتى سلوك غريب.
الهدف من ده ،بيكتشف قدراته وإمكانياته قبل ما يدخل مرحلة أصعب (المراهقة).

السرية وحب الخصوصية:
ممكن تلاقيه بيبدأ يقفل باب أوضته، أو يرفض يحكي كل تفاصيل يومه او أسراره.
الهدف من ده إن إبنك بيقولك اني خلاص بكبر وده تمهيد للاستقلالية.

التغيرات المزاجية:
مرة يضحك، ومرة يتعصب أو يزعل بسرعة (عارفين الهرمونات) هي بالظبط كده.
الهدف من ده ، دي بداية التغيرات الهرمونية اللي بتحصل قبل المراهقة وده تمهيد لأنها هتحصل كتير في المراهقة(فسبحان الله ❤️)

التعلق بالقدوات:
هتلاقيه بيبدأ يتأثر ، بلاعب كرة، أو مدرس معين ،او عالم دين...
هو هنا بدأ يدور على نموذج يحتذي بيه عشان يبني هويته.

الأسئلة الكبيرة عن الحياة والمستقبل:
زي أنا هطلع إيه؟ أو لو طلعت كذا... ليه ربنا خلق كذا؟..
دي بداية مهارة التفكير المجرد، والبحث عن معنى ودور في الحياة.❤️

كل ده يا ماما طبيعي جدًا. صدقوني أولادكم مش بيتغيروا للأسوأ، بالعكس ،دي مرحلة مهمه في التشكيل الحقيقي لشخصيتهم.
حاجات كتير مش قلة أدب عند الطفل دي مرحلة فيها شوية تغيرات وربنا اللي خلقها عشان تساعده في اللي جاي.

لو عرفتي تحتوي المرحلة دي ،هتسلمي ابنك أو بنتك للمراهقة وهما واقفين على رجليهم، عندهم ثقة بنفسهم، وعارفين إن بيتهم هو الأمان اللي بيرجعوله تاني مهما كبروا❤️

Walid Abu Talib

20/10/2026

18/10/2026

17/10/2026

16/10/2026

14/10/2026

13/10/2026

13/10/2026

12/10/2026

10/10/2026

10/10/2026

Address

Website

Alerts

Shortcuts

Share

Listing takedown request