23/08/2026
5 حاجات بتبني ثقة إبنك بنفسه..
و 5 حاجات بتهدم ثقته بنفسه..
الثقة بالنفس مش حاجة الطفل بيتولد بيها، ولا هدية بتنزل معاه من السما، الثقة بالنفس حاجة انتوا اللي بتزرعوها في قلبه وعقله كل يوم من خلال كلماتكم وردود افعالكم وتصرفاتكم معاه.
كلمة صغيرة ممكن تخليه يطير من الفرح ويحس إنه قادر يعمل أي حاجة، وممكن نفس الكلمة تتحول لسهم يهد ثقته بنفسه.
خمس حاجات بتبني ثقة ابنك بنفسه:
1️⃣ التشجيع المستمر:
لما يعمل حاجة كويسة حتى لو بسيطة، قوليله "برافو" أو "أنا فخورة بيك". الكلمة دي بتخليه يحس إنه مهم وإن مجهوداته حتى لو بسيطة ملحوظة.
2️⃣ الاستماع ليه باهتمام:
لما ييجي يحكيلك حاجة، اهتمي انك تسمعيه وبصي في عينه وهزي راسك، الطفل لما يحس إن كلامه مهم بيحس ان هو كمان مهم.
3️⃣ امنحيه فرص يجرب ويغلط:
متعمليش كل حاجة بداله، اديله فرصة يجرب بنفسه حتى لو وقع أو غلط، كل مرة يجرب فيها بيكتشف إنه قادر يتعلم ويعتمد على نفسه.
4️⃣ الاحتواء وقت الغلط:
لما يغلط، متكسرهوش بالزعيق أو الإهـ.ـانة، فهميه إن الغلط مش نهاية الدنيا، وإنها فرصة يتعلم ، ويجرب تاني وتالت.
5️⃣ إظهار ثقتك فيه:
لما تقوليله "أنا واثقة إنك هتقدر" أو "أنا عارفة إنك شاطر"، الكلمة دي بتفرق معاه جداً وبتخليه دايما بيفضل يحاول
💔 وخمس حاجات بتهدم ثقته بنفسه:
1️⃣ المقارنة بالآخرين:
كلمات زي "شوف أخوك" أو "شوف فلان بيعمل إيه"، بتحسسه إنه قليل وإنه مهما عمل مش كافي وإنه أقل من كل الناس.
2️⃣ السخرية والاستهزاء:
لما ييجي يتكلم أو يحاول يعمل حاجة وتضحكي عليه أو تقللي من اللي بيعمله، بتحطمي شخصيته قدام نفسه وبتخليه يخاف يجرب تاني.
3️⃣ الزعيق والانتقاد:
الكلمة الجارحة بتفضل محفورة جواه "أنت فاشل" أو "أنت غبي" أو أنا تعبت منك ومفيش فايدة فيك، كلمات بتفضل جوه الطفل وبتحسسه إنه دايما قليل.
4️⃣ منعه من التجربة:
لما تمنعيه يجرب أي حاجة عشان خايفة عليه أو عشان هيبوظ حاجة، بتحرميه من إنه يحس بإنجاز أو إنه يكتشف قدراته.
5️⃣ التقليل من مشاعره:
لما يعيط أو يزعل وتقوليله "انت بتعيط على ايه" أو "كفاية دلع"، بتحسسيه إن مشاعره ملهاش قيمة، وبالتالي هو نفسه ملوش قيمة.
🖤 إبني ثقته بنفسه بكلمة ومتهدهاش بكلمة.
لأن الكلمة عمرها قصير على لسانك، لكن عمرها طويل جدًا جواه.❤️
