عشان ربك لما تـقابله,, يسألك عملت إيه يخلينى أرضى عنك؟؟.. تقوله يـا ربى هتلاقى دمـى بيجرى فى دم خلقك :)
أنا أقدر أتبرع بالدم؟؟
لو سنك بين 18- 55 سنة ووزنك أكثر من 50 كجم..وما عندكش أى مشاكل صحية يبقى أكيد تقدر.
أنا حاسس إن عندى أنيميا...
قبل ما تتبرع بنعملك كشف طبى وبنقيس نسبة الهمجلوبين والضغط وبنحدد لو ينفع تتبرع أو لا.
أنا خايف من شكة الإبرة...
قال رسول الله ( ص ) ما يصيب المسلم من نصب ولا
وصب ولا هم ولا حزن ولا غم حتى الشوكة يشاكها إلا كفر الله بها من خطاياه ..فتخيل إنك بشكة بسيطة هتنقذ حياة إنسان.
بس أنا معنديش وقت اتبرع بالدم؟؟
عملية التبرع كلها مع الكشف الطبى بتأخد 20 دقيقة بس.
ليه لازم أتبرع بالدم؟؟
لإن الإنسان هو المصدر الوحيد للدم، قال رسول الله (ص ): لله عباداً إختصهم بقضاء حوائج الناس، حببهم فى الخير وحبب الخير فيهم، أولئك الآمنون من عذاب النار يوم القيامة رواه الطبرانى
طيب ينفع كل أد إيه؟
الولد ينفع يتبرع كل 3 شهور والبنت كل 4 شهور.
وأنا هستفيد إيه لما أتبرع؟
أولاً: الثواب الكبير قال رسول الله (ص): ( المسلم أخو المسلم، لا يظلمه ولا يسلمه، ومن كان فى حاجة أخيه كان الله فى حاجته، ومن ف*ج عن مسلم كربة ف*ج الله عنه كربة من كربات يوم القيامة، ومن ستر مسلماً ستره الله يوم الفيامة). رواه الطبرانى
ثانياً: إنت كل مرة هتتبرع بالدم هيتجدد دمك أسرع ويزيد نشاط خلايا نخاع العظام وكمان التبرع فرصة لإكتشاف أى أمراض معدية يعنى يعتبر كشف طبى دورى.
سمعت إن أكياس الدم بتتباع؟
تأكد إن تبرعك منك للمريض مباشرة سواءٍ فى حملاتنا او لما نتصل بيك لأنك بتروح بنفسك فى المستشفى اللى فيها المريض وتتأكد إنه فعلا محتاج وتكتب على الكيس اسمه.
طب لو أنا عندى مرض مش ممكن أضر المريض؟؟
الدم بيتعمله فحوصات وتحاليل دقيقة للتأكد من خلوه من الامراض ولو كان فيه أى مرض بيتم التخلص من الكيس وإعلامك شخصيأً.
أنا المفروض أعمل إيه بعد ما أتبرع؟؟
حاول تشرب كمية أكثر من السوائل وعدم التدخين أو بذل مجهود عنيف لمدة ساعة من التبرع ويمكنك ممارسة الرياضة بعد ساعتين.
