هي مش مُلزمة إنها تصحى الصبح تفكر في كل ده :
-هو انا هنزل انهارده لابسة ايه عشان اريح دماغي ؟
-الم شعري احسن ولا اسيبه وامري لله يعيني على ما هشوفه !
-هو انا معايا فلوس اركب تاكسي رايح جاي عشان اضمن محدش ينتهك حرمة جسمي في المواصلات ؟
-احط الهيدفونز في ودني عشان اريح نفسيتي اللي اتدمرت من الوصف الدقيق لكل حتة في جسمي !!
-يارب ما اعدي جمب عربية وهيا ماشية والسواق يمد ايده ويمسك اي حتة فيا ويضحك وي
سيبني بموت وهاين عليا اصرخ ..
-يارب وانا واقفة استنى تاكسي فاضي ما حد يقفلي بعربيته ويقولي : ايه يا مزة تيجي بدل اللي سايبك ده وهديكي 100 وهتتبسطي
-يارب ألحق أروّح قبل معاد خروج المدرسة الإبتدائي اللي جمبنا ..!!
لكن ملزمة بعد كل ده .. تبقى بتحلم بيك شريك لحياتها ..
ملزمة بعد كل ده .. تنزل مثلا لإمتحاناتها مركزة .. وتأدي كويس !
ملزمة بعد كل ده .. بوجوب الطاعة ليك كزوج سيد عليها بمفهومك !
ملزمة بعد كل ده .. ما تتمردش على المجتمع اللي عمل فيها كل ده !
ملزمة بعد كل ده .. تحترم مجتمع موصل كائن بالحقارة دي لمرتبة الألوهية والعصمة والكمال المطلق وناسب لها كل نقص وعيب لمجرد جنسها متلاشيا كل الظلم والقهر اللي بتمر بيه الانثى بسبب العنصرية الذكورية دي !
ملزمة بعد كل ده انها تتمع بصحة نفسية ممتازة عشان تستوعب وتمتص الضغوط اللي بتواجه الراجل سواء زوج او اب لإنها السفنجة التي خُلقت لذلك ..
ملزمة بعد كل ده تكون مصدر امان .. وهي اكتر حد فاقده !!
أهلا بكم في مجتمعي اللي مطلوب اتعايش فيه
