احلم. بنسمع الكلمة دي كتير اوي و مش مدركين معناها الحقيقي. احنا مجموعة من الشباب بيجمعنا هدف واحد و حلم واحد. حلم اننا نشوف البلد دي احسن بلد في الدنيا، نخلي الناس عايزة تحلم. حلم يخلي مجتمعنا ده يشوف تغيير حقيقي.
هتسأل نفسك و تقول طب دول بيقدموا ايه جديد؟ ما احنا ياما سمعنا شعارات بتنادي للتغيير. احنا في "احلم|اماطه" ببساطة حابين يكون بكره غير
بمجهودنا و مجهود اي حد يحب يشاركنا،هدفنا التخطيط و ا
لتجميل و الاصلاح العام في مجالي العمارة و البيئة. نحسّن من المظهر العام للعماير و البيوت، ونزرع الميادين و نرمم و نرصف و ننظف الشوارع لكل اللي بيحلم يعيش في مكان اجمل و انظف بس مش عارف يوصل لحلمه ده. نفسنا كمان نستفيد بالاماكن الغير مستفاد بها في احياءنا و مدننا عن طريق بناء ملاعب رياضيه او عمل مشاريع صغيره بها او زراعتها. بنحلم نوفر بيئه تعليميه افضل لكل اللي بيتعلم في مدرسه بسيطه، نوفر له ملاعب احسن و فصول انظف، مكاتب و كراسي سليمه.. وهكذا. وحلمنا برده انشاء حملات توعية تورّي الناس ازاي مشاركتهم هتفرق في الاصلاح وازاي يحافظوا علي البيئة.
كل دي أحلام جوانا وده السبب الرئيسي لتكوين "احلم|اماطه". احنا عايزين نوصّل للناس فكرة إن حلم كل واحد ممكن يتحقق، وإن طول ما هدفنا مشترك إننا نشوف البلد دي في أحسن صورة يبقى هنوصل للهدف ده أكيد، قوتنا في وحدتنا. كل واحد فينا محتاج بس يصدق إنه مهم و انه فارق و يسعى إنه يطلع بحلمه للنور.الهدف الاوّلي للصفحه هو ان أي حد عنده فكرة حتى لو حاسس انها مش هتقدّم حاجة كبيرة يبعتهلنا، اسماء اماكن يُقترح الشغل فيها او حتي فكرة مشروع. كمان عليها هنعرض كل المشاريع اللي هنقوم بيها و اماكنها قبل و بعد وهننشر اي ايفينت نازلينه.
صدقونا ممكن أوي تكون سبب في إننا ناخد خطوة لقدام لتحقيق حلمنا و ممكن تكون سبب إن غيرك يكمّل فكرته. يوم ما تصدق انك هتحقك هدفك هو برده يوم ما هتكون وصلت لأول خطوة في قصة نجاحك.
