https://www.facebook.com/227526787450913/

مؤسسة أطباء - Atbaa Medical Students' Association, Faculty of Medicine, Ainshams university, Cairo (2026)

Q: What is the address?

Faculty Of Medicine, Ainshams University

22/04/2025

لو إنت في طب سنة تالتة وداخل على فاينل كلينيكال Endocrine أو فاينل كلينيكال Urogenital وحاسس إنك تايه...
استنى قبل ما تتوتر!
د. أحمد مصطفى، خريج طب عين شمس،
هيشرح المواد دي بأسلوب ولا أروَع بسيط وسلس وبيوصّللك المعلومة بسرعة وسهولة.
وعلى فكرة، هتقابلوه كمان سنة رابعة في الـ ENT.

الفيديوهات كلها هتلاقوها على قناة "atbaa" على يوتيوب.
بس احنا حابين نسهل عليكم اكتر هتلاقوا اللي انتو محتاجينه في اللينكات تحت

Clinical endocrine👇

https://youtube.com/playlist?list=PLmjIY3SPvf2muJhVK6acILeg9ABuyVoPz&si=eEpbwAbCpjN3GNIP

Clinical Urogenital 👇

https://youtube.com/playlist?list=PLmjIY3SPvf2lUtbtZngrn6krRd_v9egJd&si=8DKzzGy0SlS2gkqU

16/04/2025

معلومة على الماشى 🩷

انتوا عارفين أن اى حرق ب acid أو alkali مبنعادلوش
يعنى مش لو اتحرقت ب acid تحط alkali

يعنى مثلا لو اتحرقت بمياه نار أو بطاس
انتوا عارفين بنعمل ايه ؟ 🤔
بيتحط تحت المياه الجاريه لمده ربع ساعه على الاقل 🩷

13/04/2025

معلومه على الماشى 🩷

انتوا عارفين اد ايه اكل الكبده مهم تقريبا كده تحتوى على معظم الفيتامينات
من ضمنهم
Vit a بنسبه كبيرة
Vit b 2 b3 b6 B12
Vit c
Folic acid بس بنسبه قليله

بس فيه حاجه ناخد بالنا منها
انت متخيل إن الحامل مش المفروض تاكل كبدة في أول ٣شهور حمل!!😯
هتقولي بس دي مليانة حديد ومفيدة🤔
هقولك آه بس بردو مليانة vit A اللي كلنا عارفين انه ممنوع عالحامل أول ٣شهور عشان بيعمل تشوهات ، وبالتالي الحامل مينفعش تاكل كبده 🫡

11/04/2025

معلومه على الماشى 🩷

انتوا عارفين أن البرد أو اى فيروس علاجه مناعتك 🩷 يعنى قوى مناعتك قعد ارتاح فى السرير واشرب سوائل دافيه وبس كده👀

مفيش بقى مضاد حيوى بيتاخد ولا حاجه
#معلومةـعليـالماشي

09/04/2025

معلومه على الماشى 🩷

انت عارف ليه مريض السكر بيخس ؟

عشان السكر مبيدخلش الخلايا وبالتالى الخلايا بتتعامل كأنها فى حاله صيام مفيهاش سكر فبتبدا تعمل gluconeogenesis 🩷يعنى تصنع الجلوكوز من ال amino acids اللى موجوده من البروتين فتكسر البروتين اللى موجود فى العضلات .. وكمان الجسم بيبدا يشوفله مصدر طاقه تانى غير السكر فيبدأ بتكسير الدهون فيخس 🥲دهون وعضلات 🩷
#معلومةـعليـالماشي

06/04/2025

مساء الخير
عدنا إليكم من جديد في سلسلة أمراض تحت المجهر 🔬

النهاردة حابين نتكلم عن موضوع مقاومة المضادات الحيوية كتير بنسمع عن المصطلح دا و حابين نوضح النهاردة معناه ايه و بينشأ بسبب ايه و ازاى نقدر نتحكم فيه و نقلله و هل احنا السبب فيها 🤔

فى البداية بيرجع تاريخ أول اكتشاف للمضاد الحيوى سنة 1928 لما لاحظ الكسندر فلمنج و هو فى المعمل بتاعه أن فى فطر عنده بدأ ينمو فى احد اطباق البكتريا و قتل البكتريا المحيطة بيه من هنا اكتشف ان الفطر دا بيفرز مادة لها خصائص مضادة للبكتريا و سماه البنسلين penicillin و خد على الاكتشاف دا جائزة نوبل سنة 1945 و حذر وقتها من فكرة مقاومة البكتريا للمضادات الحيوية و قال وقتها "قد يأتي يوم يعطي فيه الإنسان نفسه جرعة غير كافية من البنسلين، فيعلّم البكتيريا كيف تقاومه."☠️☠️

يمكن دور البنسلين موقفش بس على مجرد أنه دواء لكن كمان احد اهم الاسحلة فى الحرب العالمية الثانية فى ايد الحلفاء و من بعد الحرب العالمية التانية بدأت رحلة تطوير المضادات الحيوية

لحد ما ظهرت اول حالة مقاومة للبنسلين نتيجة الاستخدام الخاطىء و العشوائي للمضادات الحيوية فبدأ تطوير بديل للبنسلين و اللى هيتسمى باسم ال Meticillin لكن البكتريا هتتطور بسرعة برضوا و هتبقا مقاومة ليه و هينشأ سلالة جديدة اسمها MRSA لكن هنرجع فى نفس دايرة التطور و المقاومة تانى و هيظهر مضاد حيوى ضد السلالة دى و برضوا هيحصل نفس المشكلة 🔄

لحد ما نوصل بداية الالفينات حتى الان مع ازمة عالمية مع سلالة اتسمت (( Carbapenem-resistant Enterobacterales)) و دى بكتريا مقاومة لل carbapenem و دا مضاد قوى كان بيستخدم للبكتريا المقاومة للمضادات الحيوية التانية

فى انواع كتير جدا من المضادات الحيوية التانية اللى برضوا البكتريا طورت نفسها و هتطور نفسها مع الوقت ضدهم 🫠

طب يا ترى ايه المشكلة و ازاى بتأثر على صحتنا

صعوبة في علاج العدوى:

لما بكتيريا بتكون مقاومة للمضادات الحيوية، ممكن تتسبب في عدوى شديدة أو مهددة للحياة، خصوصًا للمرضى في المستشفيات أو الناس اللي عندهم جهاز مناعي ضعيف زى الاطفال و كبار السن

الانتشار السريع للعدوى:
البكتيريا المقاومة ممكن تنتقل بسرعة بين الأشخاص في المستشفيات أو في المجتمعات، وده بيزيد من خطر انتشار العدوى.

تقليل الخيارات العلاجية:

لو ظهرت بكتيريا مقاومة لمجموعة من الأدوية، بيبقى صعب نلاقي أدوية بديلة فعالة، وهذا قد يؤدي إلى مضاعفات خطيرة.

فى اسباب خاصة بالبكتريا زى انها دايما بيحصل انواع مختلفة من الطفرات الجينية اللى بتخلى البكتريا طبيعيا مقاومة للمضادات الحيوية ☣️

تانى حاجة ممكن نقول ان البكتريا بتحب تشارك خبراتها مع الانواع التانية فى مجال المقاومة 🫂

لكن هل لينا دور الحقيقة اه و دا بسبب
_ ان احنا بنستخدم المضادات الحيوية بصورة مستمرة و بشكل غير ضرورى إطلاقا فمش صح حد عنده نزلة برد أو انفلونزا و ياخد مضاد حيوى لأن سبب البرد هو الفيروسات مش البكتريا🤧

_ناس كتير بتاخد المضادات الحيوية و بمجرد انها بتتحسن بتبدأ توقف المضاد الحيوى و دا بيساعد أن فى جيل جديد من البكتريا ينشأ قادر انه يواكب النوع دا من المضادات الحيوية

_استخدام المضادات الحيوية بصورة بشعة فى الزراعة و تربية الحيوانات و اللى بدوره برضوا بيزود من فرص نقل المضادات الحيوية فى اللحوم اللى بتتاكل بصورة غير مباشرة 🐔🐮

طب يا ترى ازاى نقدر نتحكم أو حتى نقلل من المشكلة دى

فى البداية لازم نستخدم المضادات الحيوية عند الضرورة بس
فى حالات العدوى البكتريا مش فى نزلات البرد

لازم نكمل كورس العلاج بالكامل حسب نوع المضاد الحيوى
حتى لو حسيت بتحسن

منستخدمش المضادات الحيوية فى الحيوانات الا فى حالات العدوى مش لمجرد النمو و سرعة الانتاج

فى النهاية مقاومة المضادات الحيوية مش بس مشكلة طبية لكنها تحدى بيواجه العالم و العلم بأكمله لكن لو كل واحد اهتم بالاستخدام الصح هنقلل من المشكلة دى و هنحد من انتشارها

فى النهاية شكرا ليكم و أتمنى يكون بوست خفيف لطيف و لأى استفسار ابعتولنا 🫡🫡

السيد السعدنى

30/03/2025

طَابَت أعيادُكم برِفقةِ مَن تُحبّون، ولا قطع الله عن بيت عيدًا
عيدكم مُبَارك✨
كل عام وأنتم بخير، جعل الله أيامكم كلها أعيادًا مليئة بالخير والبركات. 🩵

26/03/2025

بسم الله الرحمن الرحيم ✨
نبدأ بوست من جديد ✨
هنتكلم النهارده عن اهميه فايتمين D فى حياتنا اللى تقريبا ناقص عند معظم الشعب المصرى 👀

اولا يا ترا ايه هى اهميه vit D 🤔

مهم اوى لكل حاجه فى حياتنا بيساعد على التركيز بيساعد على بناء العظام بيساعد على تقويه الشعر والضوافر بيزود الكالسيوم فى الدم .. هو اصلا شيال الكالسيوم يجيب الكالسيوم فى الدم من الكليه أو بيمتصه للدم ولو ناقص الكالسيوم فى العظم بيشيله ويحطه فى العضم ✨ فأهميه vit D من اهميه الكالسيوم بالظبببط ✨ميخلكش حاسس دايما بارهاق وتعب وتكسير

طيب ايه بردو مشكلته لو قل ؟!🌝 وهل ليه مشكله لو زاد ؟!🌝 طب واحده واحده
لو قل هتظهر الاعراض دى
الارهاق والتعب والكسل والنوم المستمر(اكل ومرعه وقله صنعه)😂
بيعمل كمان اكتئاب لو قل 🥲
طبعا vit d بيساعد على الحرق فلو قل مفيش حرق فنتخن بسرعه 🌝
هشاشه عظام ولين عظام وتعب فى المفاصل والعضلات وساعات ممكن تحس ب tremor (ارتعاش فى الايد )
وطبعا vit d مهم للمناعه جدا فلو قل مناعتنا هتقل وأقل دور برد يتعبنا وميقومناش🌝طب السؤال هل الاعراض دى لو عندى يبقى عندى نقص vit d ? الاجابه لا 😂 يعنى كلها اعراض ممكن اى عرض منهم يكون السبب فيه حاجه غير نقص vit D... انا بقول لو عندنا الاعراض دى نشك أنه نقص vit d مش نتأكد🌝 .. طب نتأكد ازاى بنعمل تحليل vit D لو اقل من 30 يبقى قليل 🥲
طب ليه بيبقى عندنا نقص فيه فى الغالب بيبقى عشان عدم التعرض للاشعه الشمس ليه بقى vit d اللى بيتصنع فى الجسم بيبقى inactive اول مرحله فى تنشيطه هو التعرض للاشعه الشمس وبعديها الكبد بيكمل تنشيطه وبعدها الكليه 🩷🩷
وممكن بقى سوء تغذيه أو سوء امتصاص أو أمراض فى الكليه والكبد وعاده مبتبقاش هى دى الأسباب 🩷عشان نقص vit D مش حاجه خطيرة خالص 🩷🩷
وممكن تبقى المشكله سوء تغذيه ومبناكلش حاجه فيها فايتمين د

طب يا ترا ايه الاكل اللى بيحتوى على فايتمين د 🤔

صفار البيض
الاسماك زى السلمون والسردين
المكسرات
الكبده

طب يا ترا فيه اكل لو كلناه هيقلل امتصاص فايتمين د ؟🤔

أيوة طبعا زى
البسكوت
اللبن
الشاى
السمنه

وطبعا غير الاكل عاوزين نتعرض للشمس وانسب وقت للتعرض للشمس من 10ل3

طب هل لو قعدت اخد vit d لغايه ما بقى فوق ١٠٠ فيه ضرر ؟ مع انه شبه مستحيل ومستحيل إنه يجى بسبب الاكل او الشمس الكتير ✨
بس الحاجه لو زادت عن حدها يتقلب لضدها 😂
هيحصل toxicity (تسمم)
وهيزود الكالسيوم اوى فيترسب فى الكليه فيعمل حصوات كلى

تلخيصا كده vit D مهم جدا ومهم أن احنا نهتم بيه ونتابعه لانه علاجه سهل بس هناخد فايتمين د بس نخلى بالنا ليه فيه نقص فيه هل المشكله شمس ولا فى الكبد أو الكلى أو فى الامتصاص أو بعض الخلايا مقاومه ليه ؟ عشان اهم من معالجه العرض هى معرفه المرض الأساسى ✨

وبس كده مرضتش ادخل فى تفاصيل كتيرة

واتمنى يكون بوست خفيف لطيف عليكم🩷

وبس كده ✨
#ميرنا عبدالفتاح خطاب ✨
# اطباء دائما معاكم✨

23/03/2025

مساء الخير
عدنا إليكم فى أمراض تحت المجهر 🔬
بعد ما اتكلمنا عن السكر و أنواعه و ازاى نقدر نتحكم فيه
النهاردة هنتكلم عن حساسية الصدر أو الربو هى عبارة عن ايه و ايه أسبابها و مدى انتشارها فى المجتمع و ازاى نقدر نتحكم فيها 😶‍🌫️

ايه هى حساسية الصدر؟

فى البداية حساسية الصدر أو الربو أو ال bronchial asthma كلها اسماء لموضوع النهاردة هى عبارة عن مرض بيحصل نتيجة التهابات مزمنة فى الشعب الهوائية و بالتالى بيحصل ان الشعب الهوائية بتنقبض و بتقلل دخول الهواء للرئة

طب يا ترى هل حساسية الربو منتشرة ولا لا و ايه اكتر سن بتيجى فيه ؟🙂

فى العالم كله فى حوالى 300 مليون شخص بيعانوا من حساسية الصدر 😥 مع ملاحظة ان الاعداد بتتضاعف 😥

أما بالنسبة لأكتر سن حساسية الصدر بتيجى فيه غالبا بيكون الاطفال الاقل من خمس سنين 🫠

ايه يا ترى اعراضها بقا ؟؟ 🤔
الحقيقة انها بتيجى بشوية أعراض مميزة و هي
كحة متكررة ، و غالبا الام بتشتكى ان طفلها صدره بيزيق او بيصفر ، الطفل مش قادر ياخد نفسه و حاسس بوجع او تقل فى صدره

طب ايه يا ترى المميز ممكن يكون الطفل يعنى عنده عدوى عادى اقولك انا 🤒
فى البداية الاعراض تيجى فى شكل نوبات لما يتعرض الشخص لدخان او ريحة معينة او اى سبب من اللى هنتكلم عنه كمان شوية
اكتر فى الشتا او الربيع
لما الشخص يبذل مجهود مثلا
النوبات دى الشخص مش بيكون عنده فيها سخونية
و نوبات الكحة دى بتخف مع الدوا اللى هنتكلم عنه كمان شوية
اكتر بليل عن الصبح او الطفل يكون نايم و يصحي على نوبة

لو حبينا نتكلم عن أسبابها :

عوامل جينية : 🔬

بتخلص الشخص مولود عنده حساسية من حاجة معينة
او بتزود من حساسية الشعب الهوائية تجاه شىء ما
او ان الطفل يكون عنده سمنة
و بتبقا اكتر فى الولاد

العوامل الوراثية : 👨‍👩‍👦 👨‍👩‍👧

بمعنى لو فى حد من العيلة عنده حساسية صدر فى دى حاجة تزود من فرصة ان الطفل او الشخص يكون عنده حساسية صدر
لو حد من الأب او الأم عنده حساسية فغالبا بنسبة 25% الطفل معرض انه يكون عنده
طب لو هما الاتنين فغالبا 50%

عوامل بيئية : 🏙
فى حاجات ممكن تسبب في البيت زى مثلا ان فى قطة او كلب فى البيت و الطفل عنده حساسية من الفرو بتاعهم
حشرة الفراش و دى ممكن نتخلص منها بأننا نحافظ على تهوية البيت و نخلى الشمس دايما فى البيت يعنى اهم حاجة نقلل الرطوبة
و واحد من اهم مسبباتها منزليا هى الصراصير 🪳و مخلفاتها و حتى البقايا بتاعتها فيها بروتينات بتسبب التهابات فى الجهاز التنفسي

لو هنتكلم عن اسبابها برا البيت فحدث ولا حرج عندنا بقا الدخان ، التراب ، حبوب اللقاح و غيره من الملوثات اللى موجودة فى الهواء و حوالينا ☣️

العدوى التنفسية : 🤧

خاصة مع العدوى الفيروسية يعنى لاحظوا انها بتزود من حساسية الشعب الهوائية

و طبعا زى ما قلنا قبل كدا أن لازم يكون في تحالف من العوامل دى سوا علشان المرض يظهر

طب هل الدكتور ممكن يتوقع ان الطفل لما يكبر يكون عنده ربو
هقولك اه فى حاجة اسمها asthma predictive index بتساعدنا لو الطفل عنده شوية اعراض و من اهم الاعراض التزييق مع حاجة من الحاجات اللى هنقولها الاب او الأم عندهم حساسية صدر او جلد

أو أن الطفل عنده تزييق بدون ما يكون عنده برد او عنده حساسية أنف 👃 هنبقا نتكلم عنها ان شاء الله فى بوست لوحدها

طب يا ترى ايه التحاليل و الاختبارات اللى ممكن تتعمل ؟؟🤔🤔
والله نبدأ
بصورة الدم غالبًا هنلاقى زيادة فى ال eosinophils و دى خلايا بتزيد مع الحساسية غالبًا

ممكن نقيس الاجسام المضادة اللى بتطلع من الجسم تجاه الحاجة اللى بتسبب الحساسية specific IgE

ممكن نعمل اختبار حساسية الجلد علشان نعرف برضو ايه الحاجات اللى بتسبب الحساسية و هنعرف ليه فى العلاج ها فكمل البوست للاخر 😃

اختبار وظائف الرئة spirometry دا للتشخيص و نشوف مدى تأثر الطفل و استجابته للعلاج

عندنا حاجة اسمها PEFR دا جهاز ممكن نتابع بيه برضوا بس فى البيت و هنتكلم عن دوره فى المتابعة مدى الاستجابة للعلاج 😮‍💨

طب ايه العلاج ؟؟

علاج حساسية الصدر مش بس علاج دوائي و بس لكن زى ما احنا عارفين ان الوقاية خير من العلاج فأول خطوة و اهم خطوة اننا نعرف ايه الحاجة اللى بتسبب الحساسية و نتجنبها قدر المستطاع 🚨🚨

زى ما اتكلمنا فوق و قولنا أن فى بعض الاسباب اللى بتسبب حساسية موجودة فى البيت اللى ممكن نتحكم فيها عن طريق :

- نستخدم مفارش مضادة للحساسية

- نستخدم مكنسة كهربية للتنضيف خاصة اللى فيها فلتر اسمه HEPA

- طبعا لو السبب قطة أو كلب موجودين فى البيت نحاول نشوف حد يتبناهم و منرمهمش فى الشارع يعنى و نقلل من تعامل الطفل مع الحيوانات اللى ليها فرو

بالنسبة للشق الدوائي

الحقيقة هنقول ان كل شخص له كورس علاج معين تبعاً للأغراض الظاهرة عليه و مدى تأثره بحساسية الصدر لكن نتكلم بشكل عام الادوية عندنا نوعين

اما controller او ادوية وقائية و دى بنستخدمها علطول بشكل منتظم و من اهم الادوية هى بخاخات الكورتيزون غالبًا بيكون لونها بنفسجى او برتقانى
و اه البخاخات مش بتسبب إدمان أو تعود زى ما بعض الناس فاكره و لا بتأثر على الجسم غالبًا لأن مش بيحصلها امتصاص لباقى الجسم بدرجة كبيرة ، ممكن الحاجة اللى بنتجنبها هى الفطريات اللى بتظهر فى الفم لكن حلها بسيط جدا نغسل بوق الطفل بعد البخاخة 👀

بالنسبة للطفل اللى النوبة بتجيله لما يبذل او يلعب مثلا ماتش
كورة يفضل اننا نديله الدوا بتاعه قبل التمرين لكن منمعش الطفل من التمرين ها علشان نتفادى مشاكل تانى زى السمنة و هكذا و دى من الاسباب اللى بتزود اصلا الحساسية 🏃🏃🏃

نكرر تانى دورها مهم جدا و فعال فى العلاج لأنها بتقلل من الالتهابات و بتقلل من رد فعل الشعب الهوائية للحاجات اللى بتسبب النوبات دى و مينفعش بأى حال من الاحوال نوقف الدوا لوحدنا من غير استشارة الدكتور اللى متابع الحالة 🗿🗿

النوع التانى من الادوية هي ال relievers و دى الادوية اللى بناخدها وقت النوبات لما الطفل يكون بيكح و مش قادر ياخد
نفسه طب زى ايه يا ترى ايه اكتر حاجة بنستخدمها غالبًا البخاخات اللى بتحتوى علي short acting beta agonist زى الفينتولين و هكذا و دى بتساعد على توسعة الشعب الهوائية بسرعة و بتخفف من اعراض النوبة دى

فى انواع تانية كتير زى الادوية المناعية لو مفيش استجابة و غيرها

طب يا ترى امتى نقول ان العلاج محتاج يتعدل ؟؟ 🙃

لو غالبًا جاتله النوبات دى اكتر من تلت مرات فى اى اسبوع فلازم نتوجه للدكتور اللى متابعين معاه 🏃🏃

او ان النوبات مش بتخف بالادوية و الطفل ابتدى وشه يزرق مثلا فالوقت دا ناخده و نروح الطوارىء فى اسرع وقت 🚨🚨🚨🚨

كفاية كدا علشان منطولش عليكم لكن احب أقول ان حساسية الصدر مرض نقدر نتحكم فيه بسهولة عن طريق أننا نتابع بانتظام مع الدكتور و لو لاحظنا ان الاعراض بتزيد لازم نروح للدكتور فى اقرب وقت ، و كلمة السر نتجنب الحاجات اللى بتسبب الحساسية و يعنى بعض الدراسات بتقول ان بعض الأطفال مع الوقت الحساسية ممكن تخف من عندهم نهائياً ❤️

لحد ما نتقابل البوست الجاي خلى بالكوا من نفسكوا و يعنى نسألكم الدعاء فى هذه الأيام المباركة ❤️

اتمنى يكون بوست خفيف لطيف و لأي استفسار ابعتولنا 🫡🫡
#السيد السعدنى

19/03/2025

بسم الله الرحمن الرحيم ✨
صباح الخير أو مساء الخير ✨

اتكلمنا فى البوست اللى فات عن السكر النوع الأول واللى غالبا بيجى فى الاطفال ✅

هنتكلم المرة دى عن سكر النوع التاني (DM type 2) وهو منتشر جدا لدرجه ان مفيش بيت لا يخلى منه 🥹

اولا كده يا ترا هو ايه دا وعبارة عن ايه 🤔
اهو الفكره إنه عنده انسولين بس الخلايا عندها مقاومه ليه أو مش حساسه للأنسولين يعنى اه الأنسولين عنده موجود بس مش عارف يعمل شغلته وهو أنه يدخل السكر جوا الخلايا وبالتالى سكر الدم بيزيد فيما يعرف بمقاومه انسولين (insulin resistance)✅

لا وكمان خلايا بيتا فى البنكرياس أما تلاقى السكر مش راضى يدخل الخلايا بتقعد تزود فى الأنسولين لغايه ما خلايا بيا مع مرور الوقت بتتكسر وبتبطل تطلع انسولين يعنى مع مرور الوقت ممكن سكر النوع التانى يحتاج لانسولين ✨

طب يا ترا فيه اسباب تخلى السكر دا يجى 🤔

هو السكر دا وراثى فى الاول بس فيه حاجات بتخلى فيه قاومه للأنسولين وبالتالى تجيب السكر

طب ما تقولولنا كده زى ايه 👀

زى السمنه وخاصه من منطقه البطن وبسبب الدهون الكتيرة بسبب الاكل عامه 🥲 طيب ليه بردو ؟!
عشان دى بتقلل حساسيه مستقبلات الأنسولين للانسولين فميشتغلش أو يقل نشاطه 🥲

طيب يا ترا ايه هى اعراض البول السكري 🤔

الثلاثيه
بياكل كتير وبيشرب كتير وبيعمل حمام كتير

طب احنا حابين نعرف ليه بيحصله كده أما السكر عالى 🤔

بياكل كتير عشان مركز الشبع اللى عنده فى المخ مبيتنبهش عشان محتاج الأنسولين عشان يدخله سكر ويقوله أنا شبعت وبالتالى هو فعلا مبيشبعش ✅

بيعمل حمام كتير عشان السكر عالى عنده بيسحب وراه ميا ✅

بيشرب كتير عشان هو فقد ميا كتير ✅

طب افرض مريض السكر مشربش كتير لاى سبب من الأسباب 👀

ساعتها هيخش فى جفاف ( dehydration) واحنا فعلا بتخاف على مريض السكر من كده

رقبتك وكوعك وعقل ايدك مسودين وفيهم خشونه كده 🥲 طيب هل لو كل دا عندى اتاكد ؟ مفيش حاجه اكيده الا بالاشعه والتحاليل 🥲 طيب مطلوب منى اعمل ايه
ممكن سكر عشوائي (random glucose) دا لو اكتر من 200 يبقى سكر والطبيعى ل غايه 140
ممكن سكر صائم (fasting glucose) دا لو اكتر من 126 يبقى سكر والطبيعى لغايه 100
والأهم منهم سكر تراكمى(A1c) دا لو اكتر من 6.4 يبقى سكر والطبيعى لغايه 5.7
طب والارقام اللى بين الطبيعى والسكر دا اسمه ما قبل السكر اللى هو خد بالك ونظم اكلك 🥲♥️

طب ودا حلها اايه يا ترا 🤔

والله لو الموضوع فى الاول (حلها بكل بساطه يعدل من طريقه اكله ويقلل دهون وكارب )ودى اول خطوه بنعملها منفعتش بنلجأ للادويه اللى بتقلل السكر الاول دول واحد وبعدين ٢ دوا وهكذاجنب الخطوه دى ...طب لو كل الخطوات منفعتش بنلجأ للانسولين اخر خطوه

طيب نتكلم بقى عن اد ايه مهم أننا ناخد بالنا من سكرنا ♥️ لو ظبطنا اكلنا وكنا فى الاول هتبقى عاملين control على سكرنا .. طب صحيح ايه اللى بنتابع بيه سكرنا 🤔

HbA1c بنتابع سكرنا بيه كل ٣ شهور
لان التحاليل التانيه بتتاثر بالاكل قبل بيوم مش قبلها ب ٣ شهور🫣 عشان منضحكش على نفسنا وقبل ما نقيس نمنع السكر خالص🥲
وعاوزين ناخد بالنا أن مريض السكر لازم يتاكد كل ٣ شهر من سلامه الكليه وسلامه العين وضغطنا♥️ وان شاء الله لو احنا فى اى حاله ومنتظمين على الاكل الكويس أو الادويه حسب حالتنا مش هيحصل اى مضاعفات ♥️
طب لو لا قدر الله بقى un controlled diabetes لمده تجاوزت ال 10 سنين مبيهتمش باكل أو ادويه مبيهتمش بسكره وسكره عمال يعلى وهو مش مهتم ووصل لارقام كبيره وعمال يعلى بردو 🥲؟

كده هندخل فى مضاعفات ومناعته هتقل وهيجيله التهابات كتيرة

وهيبقى عنده الاول تنميل فى أطرافه وبعد مش هيحس باطرافه يعنى ممكن يتخبط وميحسش

وممكن يجيله ميا بيضا وفشل كلوى وأمراض فى القلب وساعات بتر الرجل ..خدوا بالكم باكد عن أن الحاجات دى بتيجى أما حد مبيهتمش بسكره خالص خالص خالص وعمال يعلى سكره ويوصل لارقام كبيرة جدا وهو مش مهتم .. لكن لو هو مهتم لمده تزيد عن ١٠ سنين وعامل ،control على السكر مش هيحصل اى حاجه من دى أن شاء الله ♥️ ومن هنا بنقول ضرورة متابعه السكر

طب مريض السكر ايه ممكن يخصله ايه كمان

يحصله غيبوبه بسبب زياده او نقص السكر ودى كتبنا عنها فى البوست اللى فات اسبابها واعراضها وعلاجها ممكن تشوفوها🩷
وناخد بالنا من الفيتامينات بردو ♥️
وفى النهاية احب اقول ان مرض السكر سهل اننا نتعامل ونتعايش معاه جدا بس بلاش نهمله ♥️♥️
وبس كده ✨ لو عندكم اى سؤال ابعتولنا ✨ اتمنى انى اكون جاوبت كل اسئلتكم ✨ قولولنا رايكم 🩷🩷
#ميرنا عبدالفتاح خطاب ♥️
#اطباءـدائماـمعاكم ♥️

16/03/2025

بسم الله الرحمن الرحيم 💙
صباح الخير أو مساء الخير 😂💙
هنتكلم النهارده عن السكر اللى هو تقريبا معظم الناس تعرف حد عنده السكر من عيلته لانه مرض منتشر 🥲
طب هل كل ال عندهم سكر بيكونوا نفس الاعراض والاسباب؟🤔

طيب نبدا نمسك كذا حاجه هو مريض السكر بيبقى تخين ولا رفيع يا ترا ؟🤔

انا عاوزه اجاوبكم واقول أنه على حسب هو أنهى نوع وفى أنهى مرحله
يعنى فى نوعين من السكر النوع الأول والنوع التانى اللى بالمناسبه حوالى ٩٠% من مرضى السكر بيبقى من النوع التانى

طب نبدأ النهاردة بالنوع الاول :

يا ترى ايه هو السكر من النوع الأول ايه هو ؟🤔

النوع الأول غالباً بيجى للأطفال ودا مش وراثى زى النوع التانى. والفكرة أنه بيبقى كأنه مرض مناعى بيكسر ال بيتا cell المسئوله عن أن الأنسولين يطلع .. طب مقولتليش بردو ايه علاقه الأنسولين بالسكر 🤔؟

ما هو الفكرة اصلا أن مريض السكر يعنى عنده سكر كتير فى الدم ودا بسبب أن الأنسولين مبيطلعش عشان ياخده من الدم ويوديه الخلايا .. طب كده فهمنا فائده الانسولين ♥️ وعرفنا أن النوع الأول الأنسولين مبيطلعش فيه ... طب هل هو بيبقى مرض مناعى بس ..لا كمان ممكن يكون هو عنده طفره فى جين ..أما يجيله اى برد او عدوى فيروسية الاجسام المضاده اللى طالعه عشان تقتل البرد هتقضى على الB call معاها لكن دا قليل اوى انه يحصل و لازم الطفل يكون عنده استعداد وراثى لحاجة زى كدا فى المجمل النوع الأول بيبقى بسبب نقص الأنسولين وعلاجه بيبقى الأنسولين ملهوش علاقه بالاكل ولا اى حاجه

طيب يا ترا ايه هى الحاجات المبدأيه اللى تشككنى فى مرض السكر🤔

غالباً فى الأطفال الصغيرين
سلس فى البول و مش بيقدر يتحكم فى البول بتاعه

التهابات متكررة بسبب نقص المناعة

بنلاحظ انه بياكل كتير حتى لو لسه واكل و على الرغم من ذلك بنلاحظ أن وزن الطفل قليل

بيشرب كميات مايه كتيرة

طب يا ترا مريض السكر النوع الأول بيبكتشف السكر بالاعراض دى ؟🤔

هو فى الحقيقه غالبا لا لانه غالبا بيبقى طفل والام مش هتلاحظ عليه أنه بياكل وبيشرب ويروح الحمام كتير
طيب هل لو اعراض السكر عندى اتاكد ؟ مفيش حاجه اكيده الا بالأشعة والتحاليل طيب مطلوب منى اعمل ايه
ممكن سكر عشوائي (random glucose) دا لو اكتر من 200 يبقى سكر والطبيعى ل غايه 140

ممكن سكر صائم (fasting glucose) دا لو اكتر من 126 يبقى سكر والطبيعى لغايه 100

والأهم منهم سكر تراكمى(HbA1c) دا لو اكتر من 6.4 يبقى سكر والطبيعى لغايه 5.7
طب والارقام اللى بين الطبيعى والسكر دا اسمه ما قبل السكر اللى هو خد بالك ونظم اكلك
ونعمل بردو c peptide عشان نفرق بين type 1 وtype 2

طب هو غالبا بيكتشفه إزاى ؟🤔

معظم الحالات للاسف بيجى ب DKA غيبوبه زياده السكر وبيكتشف ساعتها

طب مش هو فيه اعراض الغيبوبه دى قبل ما تحصل أن سكره على ؟

اه طبعا بس مبناخدش بالنا منها
زى أنه يرجع والناس بتحسبها نزله معويه وبالمناسبة لازما عشان اقول إن دى نزله معويه يكون ترجيع واسهال
أما ترجيع بس واقول عليها نزله معويه دا غلط تماما

وفيه كمان صداع بس الطفل ساعات مبعرفش يشتكى من صداع فبيجى ب DKA

طيب لو طفل عنده سكر نوع اول
افهم من كده إنه لازم ياخد انسولين وميعدلش من الحاجات اللى المفروض يأكلها ؟🤔

لا استنى بس انا اه قولت ملوش علاقه بأكله وأنه بسبب طفره فى الجينات بس لازم ياخد باله من أكله عشان ميزودش السكر فى الدم بردو فجنب الأنسولين لازم ينظم اكله ويلعب رياضه متوسطه وميلعبش رياضه عنيفه يعنى لازم بردو(life style modification)
طب يا ترى فيه علامات خطر لمضاعفات المفروض اخد بالى منها عشان الحقها 🤔

اه عندنا مضاعفتين عكس بعض المفروض ناخد بالنا منها

غيبوبه زياده السكر وغيبوبه نقص السكر وبنفرق بريحه الفم لو اسيتيون يبقى كده سكره عالى ومديهوش حاجه مسكرة لانى محتاج اقلل سكره ويتنقل على المستشفى فورا

طب يا ترا لو فيه غيبوبه سكر حصلت قدامنا ومش عارفين نفرق هو عالى ولا واطى هنتصرف ازاى؟🤔

هنديله حاجه مسكرة
لان غيبوبه نقص السكر اخطر ولو كانت هى ادينا لحقناه ولو كانت العكس مش هتاثر بالسلب عليه اوى

طب يا ترا احنا اصلا بنستنى اما يحصل غيبوبه نقص السكر عشان ندى للطفل حاجه مسكره 🤔؟

لا طبعا فيه علامات بتحصل على الطفل بتقولنا لازم نديله حاجه مسكرة
طب ايه هى يا ترا🤔؟

الطفل هيعرق ويرتعش ونبضات قلبه هتزيد ونفسه هيزيد ساعتها لازم نلحقه فورا بحاجه مسكره

طب احنا فاهمين ليه ممكن السكر يعلى فجاه يمكن نسى ياخد الأنسولين ولا حاجه وهو عنده السكر أو منظم اكله طب ليه يحصله اصلا نقص السكر ؟

بكل بساطه هقولك خد الأنسولين اللى بيتاخد قبل الاكل ومكلش ودا السبب الاشهر أو خد جرعه كبيرة من الأنسولين يعنى نسى وخد الأنسولين مرتين قبل الاكل بدل مرة

طب بما اننا فى رمضان هل مريض السكر بيصوم ؟🤔
اه بيصوم عادى جدا بس ياخد باله من سكره ويقيسه باستمرار ويبعد عن الحلويات

طيب نتكلم بقى عن اد ايه مهم أننا ناخد بالنا من سكرنا لو ظبطنا اكلنا وكنا فى الاول هتبقى عاملين control على سكرنا .. طب صحيح ايه اللى بنتابع بيه سكرنا
HbA1c بنتابع سكرنا بيه كل ٣ شهور
لان التحاليل التانيه بتتاثر بالاكل قبل بيوم مش قبلها ب ٣ شهور🫣 عشان منضحكش على نفسنا وقبل ما نقيس نمنع السكر خالص🥲
وعاوزين ناخد بالنا أن مريض السكر لازم يتاكد كل ٣ شهور من سلامه الكليه وسلامه العين وضغطنا وان شاء الله لو احنا فى اى حاله ومنتظمين على الاكل الكويس أو الادويه حسب حالتنا مش هيحصل اى مضاعفات
طب لو لا قدر الله بقى un controlled diabetes لمده تجاوزت ال 10 سنين مبيهتمش باكل أو ادويه مبيهتمش بسكره وسكره عمال يعلى وهو مش مهتم ووصل لارقام كبير زى 500 وعمال يعلى بردو 🥲 كده هندخل فى مضاعفات ومناعته هتقل وممكن يجيله ميا بيضا وفشل كلوى وأمراض فى القلب ..خدوا بالكم باكد عن أن الحاجات دى بتيجى أما حد مبيهتمش بسكره خالص خالص خالص وعمال يعلى سكره ويوصل لارقام كبيرة جدا وهو مش مهتم .. لكن لو هو مهتم لمده تزيد عن ١٠ سنين وعامل control على السكر مش هيحصل اى حاجه من دى أن شاء الله ومن هنا بنقول ضرورة متابعه السكر

وفى النهاية احب اقول ان مرض السكر سهل اننا نتعامل ونتعايش معاه جدا بس بلاش نهمله
حسانى طولت عليكم جامد بس حاولت الم معظم الحاجات فى DM type 1 ما علينا كفايه قولولنا رايكم 💙ولو عندكم اى سؤال ابعتولنا 💙
ميرنا عبدالفتاح خطاب
#اطباءـدائماـمعاكم

14/03/2025

مساء الخير يا حلوين 🩵 رمضان كريم عليكم وكل سنه وانتم طيبين 🩵
أتوقع اننا كلنا ملّينا من جوّ الكتب والمعلومات اللي تحسّها دسمة ومحتاجة دماغ صافية تستوعبها😂🩵 شغلنا دماغنا شوية وجت على بالنا فكرة هو ليه ما ننزلش بوست أسبوعيا عن الامراض المنتشرة و ايه هي اسبابها يا ترا ؟ طيب بتزيد ازاي و بتقل ازاي ؟ طيب مش الوقاية خير من العلاج ازاي هتلتزم بوقاية نفسك منها
ولو الأمراض دى موجوده عندك ازاى تحافظ انها متزيدش و ايه الاكل اللى تبعد عنه 🩵
و لو انت شاكك فى مرض معين شوف معانا أعراضه
.. ولو لقيت الأعراض متشابهه !! .يبقى ايه التحاليل والأشعة اللى بنتأكد بيها 🩵 ازاى نحاول نمنع الأمراض عامه 🩵
ونبذه صغنتوتة عن ازاى المرض دا بيحصل 🩵
وكل الاسئله اللى ممكن تيجى فى دماغكم هنجاوبها على شكل سؤال واجابه 😂🩵
هتبقى سلسله شيقه إذا كنت بره المجال الطبى أو جواه 🩵
مش طالبين منكم غير تتابعونا وتتفاعلوا مع البوستات عشان نتأكد انكم مهتمين 🩵 معلومات مفيده بعيده عن التعقيد 🩵
ولو حابين موضوع معين نتكلم عنه قولولنا فى الكومنتات 🩵
وبس كده 🩵
# اطباء دائما معاكم 🩵

مؤسسة أطباء - Atbaa Medical Students' Association

22/04/2025

16/04/2025

13/04/2025

11/04/2025

09/04/2025

06/04/2025

30/03/2025

26/03/2025

23/03/2025

19/03/2025

16/03/2025

14/03/2025

Address

Website

Alerts

Shortcuts

Share

Category