انا في ميدان التحرير

الأخوة المصريين اللى مش عاجبهم ان فى ناس لسه واقفة فى التحرير

اولاً الناس دى مش واقفة على رجلك

ولا واقفة فى حوش بيتكم

ولا معطلين إقتصاد

ولا متسببين فى فراغ امني

ولا قتلوا شباب زى الورد

ولا اعتقلوا شباب برضة زي الورد



الناس دى إن كانت لسه واقفة

فهى واقفة علشان ترجع حق الناس

اللى عربيات (الأمن) دهستها

واللى رصاص (الأمن) نشها

واللى سيوف رجال (الأمن) شفتها نصين

واللى حجارة رجال (الأمن) ف

تحت دماغها

والناس اللى اتسحلت فى (أمن) الدولة علشان قالوا كلمة الحق



ياللى خايف من شوية بلطجي يطلعوا عليك بالليل

نام واطمن

دى لعبة من الحكومة وخالت عليك يا جامد

ده غير ان الحكومة اللى انت حبتها فجأة دى

هى اللى فتحت السجون وطلقت المجرمين عليك واديتهم سلاح

وتخيل ان المساجين ماطلعوش على الناس

وراحوا سلموا نفسهم للقوات المسلحة



ياللى خايف على أكل عيشك

اتقي الله

ايوا تقي الله

ربنا اللى بيرزق

هيرزقك وفى مظاهرات زى ماهيرزقك ومافيش مظاهرات



يا اللى شايف إنها فتنة ولا يجوز الإنشقاق على ولى الأمر

حتى لو ولى الأمر ده ابن ستين فى سبعين

ده رأيك وانت حر فيه

لكن مش معني كده ان اللى فى التحرير دول يستاهلوا نروح نولع فيهم

او ندبحهم زى الخرفان

خليك انت مسلم بجد وشلهم من دماغك



وياعم المخ ياللى شايفهم أصحاب أجندات

ومندسين ومغيبين

احب اقولك

ان انت اللى مغيب .. مغيب مغيب

دول صحابك واخواتك اللى انت متربي معاهم

ولو ماتعرفش حد فيهم

احب اقولك انهم مايفرقوش عنك كتير

غير ان رأيهم فى القضية مختلف عن رايك



للأسف الجبان ديماً بيوصف الشجاع بأنه متهور ومعندوش مخ

وساعات بيتمادي وبيوصفه بصفات تانية أقذع من ذلك

علشان انت عايز تقعد تحت البطانية ومحدش يقول عليك جبان

تقوم ترشق الرجالة اللى واقفة فى البرد بكل ما تستطيع من إتهامات



انا مش مع ان الوقفة تستمر

انا مع الصبر ونشوف الحكومة هتعمل ايه

لكن فى نفس الوقت

انا ضد اى بنى ادم حقير او جهة حقيرة تحاول تشوه صورة الرجالة اللى مازالت واقفة فى الميدان