23/09/2026
يمكن دي من أكتر المرات اللي مش عارفين نكتب فيها بوست عادي ونقول “مبروك التخرج” وخلاص
لأن الحقيقة إن الموضوع بالنسبالنا أكبر من كده بكتير.
النهارده وإحنا بنحتفل بتخرجكم، بنحتفل بـ أغلب البورد تقريبًا، الناس اللي كانت جزء كبير من كل حاجة حصلت هنا.
الناس اللي شوفناها في أيام حلوة وأيام صعبة، في ضغط وضحك، في لحظات نجاح ولحظات كنا كلنا بنحاول نعدّيها سوا.
انتوا مكنتوش مجرد بورد
انتو كنتوا عيلتنا. 🤎
ويمكن أكتر حاجة مخليانا فرحانين ومش عارفين نوصف إحساسنا، إننا بنشوف ناس حبينا وجودهم معانا، واتعودنا عليهم، وكبرنا معاهم جوه البورد بيبدأوا فصل جديد من حياتهم.
كل واحد فيكم له مكان مختلف عندنا، وذكرى مختلفة، وطريقة مختلفة خلت وجوده مميز.
في ناس هتفتكرها من ضحكتها، وناس من هزارها، وناس من طاقتها، وناس من إنها كانت دايمًا موجودة وقت ما نحتاجها.
وفي ناس ببساطة، مجرد وجودها كان بيخلي المكان أحلى.
وعلى قد ما احنا فخورين بكل إنجاز حققتوه، احنا فخورين أكتر بالناس اللي بقيتوا عليها.
فخورين إننا عرفناكم، وإن جزء من رحلتكم كان هنا، وإننا كنا موجودين في وقت من الأوقات في حياة بعض.
يمكن من أكتر الحاجات الغريبة إننا نكون بنباركلكم على التخرج واحنا عارفين إن شكل البورد من غيركم مش هيبقى زي الأول.
الأماكن هتفضل موجودة، والشغل هيكمل،
بس أكيد في حاجة هتكون ناقصة.
هتوحشنا تفاصيلكم، وجودكم، هزاركم،
هتوحشنا الأيام اللي كنا بنقضيها سوا من غير ما نكون عارفين إنها في يوم هتبقى ذكريات.
وبالرغم من إننا هنفتقدكم جدًا، إلا إن فرحتنا بيكم أكبر.
فرحانين إننا قدرنا نشوفكم بتوصلوا للحظة دي، وفرحانين إن بعد كل التعب والسنين دي، جه اليوم اللي نقول فيه:
انتوا اتخرجتوا بجد. 🤎
من أول يوم دخلتوا فيه البورد لحد النهارده، كل واحد فيكم ساب بصمته هنا.
واحنا كمان أخدنا منكم حاجات كتير هتفضل معانا.
مبروك لعيلتنا اللي اتخرجت🤎.
We’re so, so proud of you.
And we’ll always be cheering for you. 🤎
With love,
Scientific Family
تحت إشراف الجمعية العلمية للمحاسبة واللجنة العلمية والتكنولوجية
