26/09/2024
"بطلوا تضحكوا على الناس بقى الأرض مسطحة مش كروية"🏃♀️
لو سمعت الكلام دا من حد مش هتستغرب وهتبدأ انت كمان تهزر معاه وتقوله لا يعم الأرض قرص دونات مش كروية 🍩, بس اللي مش طبيعي وهتستغرب منه هو لما تبدأ تلاقي الشخص اللي قدامك فجأة وشه اتقلب وبيسألك انت بتتريق على كلامي ليه؟ وهنا هتبدأ تستغرب: ايه دا؟ هو الشخص دا فعلًا بيتكلم بجد؟ طب جايب كل الثقة دي منين؟ وهنا نظرية ال Dunning-Kruger Effect تٌجيبك 💡
عزيزي القارئ ومع إحترامنا الكامل للأشخاص, تعالى نسرح شوية في رحلة للنظرية اللي وضعها العالمين النفسيين دانينج وكروجر, واللي بتقول إن نسبة كبيرة من الأشخاص الغير متعلمين بشكل كافي في مجال معين بيميلوا إنهم يفترضوا إن عندهم معرفة وقدرات عظيمة في اللي بيتكلموا فيه بشكل هما سواء ملاحظينه أو مش ملاحظينه بيتصرفوا بناء على الإنحياز والإفتراض المسبق بمعرفتهم الزائفة.
السبب في ده إن اللحظة اللي بيعرف فيها الشخص قشور من أي علم آخر, بيحصل على لذة العلم اللي بتحسسه إن جهله انزاح تمامًا بمجرد إنه عرف القشور التي لا تذكر دي ومع قصور المعرفة بيحصل التأثير, لذلك مينفعش تبدأ تفند في العلم إلا بعد دراسة حقيقية, وإلا هتبقى زي أخينا اللي قرر إن الأرض مسطحة ولو درس أساسيات الفيزياء هيعرف إن كلامه غلط, كذلك مينفعش نسمع للشخص المتأثر بالدانينج كروجر عشان تكون فرصتنا في إننا نحصَّل علم حقيقي تكون عالية🧏
تأثير الدانينج كروجر هنا بيكون خطر فعلًا لو معالجنهاوش لأن قصور المعرفة والثقة الزايدة ممكن يخلي الشخص يتكلم وينشر أفكار غلط أو علوم زائفة في المجتمع وبسبب ثقته الزيادة المتلقي بيحس إنها حقائق مش أفكار ودا بيسبب مشكلة معرفية في المجتمع, أو الشخص اللي بيقرر إنه يقدر يتعلم البرمجة في 4 شهور بس ويضيع وقت ومجهود وأحيانًا فلوس ظنًا منه إنه هيشتغل في جوجل, مش بسبب علمه ولكن بسبب ثقته الزايدة, وبيتفاجئ إنه مش مطلوب حتى في سوق العمل!😶🌫️
العلم بحر كبير وكل ما بنغوص فيه كل ما بندرك قد إيه الحاجات اللي نجهلها أكتر من الحاجات اللي نعرفها زي ما قال آلبيرت أينشتاين في مقولته الشهيرة "What we don't know is much more than what we know" وهنا بنشوف إن أغلب العلماء الحقيقيين متواضعين جدًا بل فيه منهم بيقولوا إنهم متعلموش حاجه أصلا ودا اللي بيخليهم يتبنوا مبدئ الإمام الشافعي في تواضعه العلمي وانفتاحه على النقد والمراجعة في مقولته الخالدة "كلامي صواب يحتمل الخطأ وكلام غيري خطأ يحتمل الصواب" ❤
ف خلي بالك من تأثير دانينج وكروجر والمرة الجاية قبل ما تتكلم اسأل نفسك هل انت بتتكلم عن علم ولا عن ثقة 🧠
