22/09/2026
اليومين دول بيتم النظر في استئناف القاضي السابق، (اللي تتبّع طليقته وقتـ.ـلها بدم بارد).. على الحكم عليه بالمؤبد. المجرم ده رفض الاعتراف بطلاق مراته، (رغم إنه بحكم محكمة) لإنه رافض حق طليقته في النجاة من جحيمه، فوقف قدام المحكمة يكدب ويقول إنها كانت على ذمته ورفعت عليه قضية نفقة.
حاول القاتـ.ـل يبرر جريمته بإنه ضحية للست اللي قـ.ـتلها، والصحافة روّجت كلامه المنحط بدون تفكير في إن اللي بيقول كده واحد ترصّد لست بينهم عِشرة سنين وأطفال، وراح لها بمسـ.ـدس، وهو بيطـلق رصـ.اص في الهوا عشان محدش يتدخل، وضربـها بالرصـ.اص وهي في السيارة، فوارد جداً يكون كداب. وبينما مفيش أي دليل على كلامه، ظهرت بعد كده أدلة دامغة على كدبه وخسّته.
وقتها حصلت موجة تعاطف كبيرة مع القاتـ.ل المختل، استغلها كارهي النساء في تبرير الجرايم اللي الستات بتتعرض لها يومياً، ودي كارثة وصلت لمستوى الجريمة من بعض المواقع، اللي بَرْوِزت كلام المجرم على إنه الحقيقة، زي إنها حرمته من رؤية ولاده، اللي شهدوا في المحكمة بالعكس تماماً، وزي إنها كانت متعددة العلاقات وبتدخّل رجّالة سوابق على بنته، وطلع كداب، وأهل المرحومة قدموا ما يثبت إنها اتجوزت بشكل رسمي، في حفل عائلي بعد طلاقها منه.
النهاردة اتنشرت أقوال بنت المجرم في التحقيقات.. وحكت تفاصيل مرعبة عن إجرامه في حق طليقته وأطفاله، وإنه كان عاملهم بلوك، لدرجة إن المرحومة جابت خط جديد لبنتها عشان تتحايل عليه يشوفها، لإن نفسها تحس إن ليها أب زي كل البنات. البنت حكت كمان إنه كان هايقـ.ـتلها هي وإخواتها مرتين، منهم مرة كان عايز يرميهم في النيل، والناس اتلموا وأنقذوهم.
حكت للنيابة كمان إنه مرة، بعد إلحاح أطفاله، استقبلهم، وشتم أمهم قدامهم، ولما جت تاخدهم نزل ضربها في الشارع، ولما جدّتهم حاولت تحوش عنها ضربها، والمرحومة راحت المستشفى لإنها كانت متعورة، ورفضت تعمل له محضر.. تفاصيل تشيّب لمجرم سايكوباتي ادّعى في المحكمة إنه اضطر يستقيل من القضاء بسبب أذية طليقته، في حين إنه مستقيل من القضاء من قبل ده كله عشان يتفرّغ لإدارة أعماله التجارية، لإن ماينفعش يجمع بينهم. كل ده محدش كان عارفه يوم تريند كلامه في المحكمة.
كارثة حقيقية إن الصحافة تتسرّع وتتبنّى رواية مجرم مختل، ولزوم الريتش والتريند، تضيف تحابيش وعناوين منحطة تتضمّن اتهامات لضحية مش هاتقدر تدافع عن نفسها، ووصل الأمر أحياناً لإضافة موسيقى حزينة كخلفية لكلام المجرم عشان نتعاطف معاه.. كل ده بيكرّس العنف ضد النساء ويبرّره، عشان كده هانتكلم عنه في سلسلة تدوينات.
