18/08/2026
احم نفس و عائلتك من الإحتيال في تركيا! بسم الله نبدأ بأبشع و أخطر و أهم طرق الإحتيال في تركيا و كثيرا ما يكون العرب ضحية لها ...
1. حيلة تاكسي المطار الذي يأخذ طريق جانبي بحجة تفادي الإزدحام المروري و هو راه يطلعلك فالعداد باه تكون الفاتورة ساخنة ... أفضل شيء هو حجز الترونسفار مطار فندق / فندق مطار قبل السفر ...و من بعد استعمال بطاقة النقل اشحن و اركب المواصلات العامة
2. من أشهر طرق الإحتيال طريقة إسقاط الفرشاة ...يعدي أمامك إنسان يحمل وسائل عمله في تلميع الأحذية و يسقط عمدا فرشاته أمامك تشوف أنت الحنين تقول الزوالي راه طاحلو الماتريال تهز ترجعهالو يشكرك و يضحكلك و يقلك نمسحلك حذاءك مجانا و يبدا يحكيلك بلهحة سورية تع أپو پري برك تفهم عليه أنه محتاج و فقير و إبنه مريض الخ ... عند الإنتهاء يقلك حك جيبك تقلو قلت ببلاش يقلك المسحة بلاش بصح الصبغة بالفلوس ... و يبدا يدرلك فالنش و يجيو جماعة متفاهم معاهم يتلمو عليك و راك وقعت في الشباك مبروك ...أغلى مسحة في مجرة درب التبانة
3. حيلة المطاعم لي نتا تقعد و هم يبداو يجيبولك في ماكولات أنت ماطلبتهاش و أحيانا أمور ثانوية كالخبز لي عندنا في دزاير ناكلو باڤيطة قبل ماتوجد اللوبيا ولا بالهريسة و الزيت قبل ما يطيب الشواء ههههه والله بلادنا بلاد خير ... المهم في آخر المطاف تجيك الفاتورة مضاعفة تجي تقرا تلقى حوايج ما طلبتهاش تقلو ترجملي يقلك "براد" خخخخ خبز بالأنجليزية و هادي الحية المكربعة شن هي ؟ يقلك هداك حق السارفيس هههه تخلص حتى الأكسجين و البقشيش ليس اختياري بل إجباري
4. خدعة تبديل الورقة ...تعطيه ورقة تع 50 ليرة مثلا بخفة يده يخرجلك ورقة 5 ليرة و يقلك زيد يا بوزيد تقلو لا راني متأكد يقلك هدا وش مديتلي و ماعنديش أصلا 50 الخ ... الحل كي تمد الورقة قولو على وش مديتلو بالانجليزية و ارفعها شوية باه تبينلو أنك شايف مليح وش راك تمد
5. خدعة الشاي هههه تلقى واحد يتكلم العربية جيدا ممكن سوري أو تركي خالط العرب و يبدا يقلك نعرف وهران و نعرف عنابة و و و...أرواح نعتلك حانوت يبيع بثمن مليح خلاه راه مداير تخفيضات و ماكش ملزم باه تشري إذا ماعجبكش ماتشريش ...ساعات يكون المحل بعيد على الطرق السياحية الكبرى يدخلك في أزقة حتى توصل للمحل تلقاه يبيع يا ملابس يا أمر آخر يستقبلوك كالملك و يحطولك شاي اشرب راه من عندنا إكراما للضيف من بعد ينزلك الحانوت كامل و تجيك العروض من كل جيهة باه يحشمك تشري ... لي يجيك يهدر معاك قلو أي دونت سبيك أرابيك خخخخ يحكي إنجليزية قلو اي دونت اندرستاند انجليش 😂 تكون صامط خيرمن تكون مغدور العافية
6. خدعة مكاتب الصرف المحتالة ...يكتبلك سعر من برا أكبر من سعر الصرف الحقيقي تقول نصرف اليورو هنا نديرد لافار ...تدخل يجبد معاك يمدلك أقل تسقسيه يقلك هاديك عمولات داخلة فالعملية و تصبح خاسر بسبب طمعك
7. خدعة الهاتف المكسور و هادي تخليك ترفض تصور أي واحد ماتعرفوش في تركيا هههه يعطيك هاتف تصورو ترجعهولو يلعبها ماحكموش مليح و يطيح مانيش عارف خفة يد أو شي آخر لكن يجبدلك هاتف مكسور و يقلك يا تشريلي هاتف جديد يا تعوضني 💸 ماديا ...ماتصورش الناس خويا ماكش فوتوڤراف
8. خدعة الأطفال اليتامى و أمهم ...يجيبولك ورقة تقراها زعمة راهم يطلبو و يتلمو عليك من كل جهة و فالوقت لي أنت تلهى بوش مكتوب يكون پيكپوكات (نشال) محترف خلفك يسرقك ...دير الخير درك نتا
9. حيلة الشيخ الصالح هههه قدام آية صوفيا يجيك شيخ الهيئة تاعو مليحة لابس لباس ديني هاز سبحة و يحطهالك في ✋🏻 بالسيف و يبدا يقلك تبرعلنا و ما إلى ذلك ... و حيلة الشاب بائع الورد لي يحط وردة في يدك أو يد زوجتك أو ابنك و من بعد يرفض ترجعهالو تخلص بالسيف
10. خدعة وكالات كراء السيارات ...الجماعة لي كراو داو سيارات فيها خدوش سطحية في الهيكل ما تولهوش بعد ما رجعوهم يخرج يفلي السيارة من كل جهة و يبدا يحسبلك فالضربات و يقلك تقاست عندك خلص بابا ولدي ... لي اضطر لكراء سيارة يصورها جيدا قبل مايديها باه يكون عندو دليل
11.
خدعة الجولة المجانية في البوسفور لي تبدا قصتها في المول خليتها الأخيرة لخطورتها ...و ليكن في علمكم أنها انتقلت عندنا في الجزائر لكن بطريقة أخرى رح نحطهالكم في المنشور الموالي 😉 و رح تلقاو بزاف ضحايا يجيو يحكيو فالتعليقات أنا متأكد ... المهم تكون فالمول تدور تجيك وحدة تطرح عليك سؤال تافه لي الناس كامل تعرف جوابه تجاوب تقلك مبرررروك ربحت جولة مجانية فالبوسفور... تذكر إذا كان شيء ما مجاني هناك فأنت هو السلعة ... يجيو اشخاص يبانولك محترمين لابسين كوستيم عوالي تع الترك لي يبيعولنا فيهم هنا 5 أضعاف السعر يقولولك هيا تروح للجولة تلقى عائلات أخرى باه يطمنوك ...يديوكم في سيارة عائلية أو فان تقول خاطفينكم في فيلم تايكن للمثل الشهير ليام نيسون و يركبوكم فالسفينة من مكان مايبشرش بالخير و بعيد شوية و يقولولك متهني ذهابك و ايابك على عاتقنا ... بعد ما تركب كل عائلة أو مجموعة يحطوها في طاولة و تنطلق الجولة ...يبعدو غييير شوية على المرسى و يوقفو المحركات هههه اختطاف يا جدك ...لتم يخرجولكم نساء و رجال يعرضو عليكم شراء عقارات في تركيا للحصول على الإقامة في فترة قصيرة و هم رايحين يسهلولكم الخ...تقلو ماعنديش دراهم يقلك ماعليش احجز بالدينار الجزائري بالشي لي راك هاز بخاتم بسنسلة تع ذهب المهم تمدلهم حويجة... إذا رفضت يحاولو الضغط عليك و إطالة الأمر لتخويفك ...كي يكون راسك صحيح (كون جا راسك صحيح ماكنتش أصلا تطيح فالفخ سامحني) تتغير المعاملة ينزلوك و يقولولك دبر راسك ارجع وحدك منين جيت في ظلمات الليل...تقول غير كي منعت ههههه
تذكر : في عالم متوحش مثل عالمنا... حتى أحلامك الوردية قد تتحول لكوابيس مظلمة لذا لا تتحمس كثيرا و كن يقظا
