عقول فاسدة _ Rotten minds

12/05/2026

كاين لي لقاها شاعله ، وكاين لي هذا وين بدى يلم في الحطب ...
المعنى بإختصار ما تعاندش وما تقيسش حياتك ورزقك على اي عبد خلافك ، كل منا في شأن يغنيه ، وكل واحد وش عطالوا ربي رزق في دنيا هذي وكل هي و وقته وقتاه ناره تزهر
المقارنه الوحيده هي شكون فيهم لي يقدر يخلي ناره شاعله ومضويه طريقوا نهار تغيم الدنيا وطيح عليه الامطار ، لي تعب وشقى وحطب ، ولا لي خلق من العدم ولقاها شاعله وعلى جنبوا تكب*
______
تكب : مصطلح جلفاوي بحت يعني رقد

12/05/2026

département des langues étrangères
زيد مع اللغات الاجنبية انه ديبارتومو الأفكار و الموروثات الأجنبية ... و تالمو يولو عايشين في عالم موازي بعيد على الموروثات تاع البلاد رغم رداءتها حتى هي .... و بصريح العبارة ديبارتومو الإلحاد ... و المسحيية .. بعيدا عن اختلاف الأذواق و تقبل الغير ووو ديما كي نكون فكاش débat و نطلق من فمي هاد الكلام اقابل ب الواو. و شاراك تقول و هاذا حكم مسبق. و مشي ڨاع معيار .طبعا ما نهدروش على قاع العباد و انما الفئة المعينة و لي راهي دروك غالبة ..

المفارقة تقول أنه طلبة اللغات الاجنبية يقولو بلي ماكان ما دخل نمط عيشهم في توجههم و اعتقادهم الديني . بينما بعد سنوات قليلة من التواجد فهداك المبنى تلقى خالوطة مسلم ولا مسيحي. مسيحي يتايهودا لي متدين يلحد. لي يتحول جنسيا.. و اغلبهم كي يقلبو الفيستا يولو يحتقرو المعتقدات الدينية الاخرى عمدا و يتمسخرو بتعاليم الدين الاسلامي غير باش يبروفوكو كاش مسلم ما يتحكمش في غضبو و فنفس الوقت ما يقدرش يدافع على معتقدو كيما يلزم و يقولو بلي هاه شفت المسلمين كي دايرين؟
و بالنسبة ليهم اي انسان مسلم لا تراوده شكوك و لم يلحد و يرجع للدين تاعو ... فهو مشكوك في اسلامه و هو انسان مسلم بلفطرة برك و ما يخممش و يتبع برك .

كانت عندي زميلة انسانة عادية مسلمة متدينة قرات معايا عام اول جامعة مبعد راحت هي عاودت باك و دارت لغة انجليزية فنفس الجامعة ... تلاقيتها بعد ثلث سنين ما عرفتهاش قعدت نأكد و نعاود اذا هي مبعد قلت نسقسيها .. نتي فلانة ؟ ايا تفاجئت و هدرنا نورمال مي لي راهي فراسك هديك هي .. رحلتي من الفضفاض الى الڨوث ، تبادلنا أنستڨرام .. دخلت للكونت روماركيت بداو يبانو عليها صفاتهم .. سخرية من احاديث نبوية و طبعا كوفت روحي لكم دينكم و لي دين الا اذا هي بغات تفتح الموضوع .
... تساءلات وجودية ! فراغ داخلي ! نقص معرفة بالدين ! علاه؟

11/05/2026

ياحسراه وقت كنت نرفد الستيلوا ، تتستف الحروف كما الجيش تع ضيق العينين ، وقت كنت ننحر فيهم ونعاود تشكيل الالفاظ كما الscrabble باه نخرج لوحه فنيه ، واليوم تجي بنت البارح تشكك في وقار وفصاحه السيد لوك ، حمقاء مش عارفه مسكينه انوا المجهود الوحيد لي متعبني هي اني نخفض في IQ تاعي باه نواكب حماقه الوهم لي عايشاتوا في موطنها غابات الحلايه لي المخير فيهم يشوف فيها سلعه ناوي يسرق منها عز ماتملك ...
مش عارفه حواء تع هذا الوقت انوا السكوت مش ديما يعني انك راضي ولا انك غبي ماكش فاهم ، ماتخافش مني كي نعاتب ونقول علاه ذيك ولالا ماديرش ذيك ، خافي مني كي نسكت عليك وماعادش يهمني ، لانوا وقتها نخدم البوزولوف تاعي وثم وين تكوني مجرد صفحه مخليها لرياح القدر باه تطويها في اي لحظه وانا قاعد نستنى في الجديد باه نبدى الnext chapter من مسرحيه الحياه المتكرره .
_______
عدنا والعود احمد

07/05/2026

#الجودي

. شخصية " سيدي" من فيلم القلعة للمخرج محمد الشويخ شخصية مقودة بزاف هو الفيلم كومبلي مقود الداب راكب مولاه كان يحكي واقع فترة زمنية فاتت على دزاير وين كان الجهل مداير حالة في المناطق الداخلية للجزائر وتلك كانت مخلفات الأمية لي سببها الاستعمار لذالك اغلب الشخصيات مقودين مي شخصية سيدي هي اقود شخصية لدرجة انو متزوج بربع نساء يشري اللحم ياكلو غير هو وهوما يتفرجو
عندو بنو مربيه برك يسميوه قدور قدور هذا المعنى الحرفي تاع الكبت كي تقول الكبت ولا تقول قدور سي كيف كيف الله غالب كبر مسكين لدرجة بدا يتلاح على البغلة تاع الجيران المهم قدور هذا كل صباح كي يروح يجيب الحليب فطريقو يصبح يكحل على( نوال زعتر ) لي لعبت دور مرت السيد واحد السيد من الدوار لي بدورها كانت بيتش كبيرة تصبح حالة التاقة وتضحكلو المهم شافو راجلها فركتهم وطارشو ولم بني عمو. وراح لدار تاع السيد لي مربي قدور. نطق راجل البيتش قالو هاذ الطفل لي مربيه راه كل صباح يصبح يكسرلي فلحرمة ومقابلي الدار ياتحكم فيه ياراح نربيوه حنا. نطق المدعو سيدي قالهم حقكم علياا وراح نعاقبو وامسحوها فياا وسمحولي بزاف وكيما كان لحالة رونجاوها لأنو المدعو سيدي عندو جاه في الدوار. المهم بعد ماراحو روحو الصباح وتحلت على خير هو لعشية بذات كان مع مرت السيد لي كان يكحل عليها بنو في دارها مرندفين ويغازل فيها وغير خرج من عندها تلقى راجلها قالو مرتك على حساب ماشفت تستاهل كل خير وجبدلو الحديث لأنو بدورهم نساب وكان يحكو على امور العائلة
المهم المدعو سيدي عندو حانوت تاع صوف وقماش لحقاتو سلعة جديدة فيها مانكا تاع نيلو لي كانت حاجة جديدة فذاك الوقت وقدور المكبوت كان يهبط فسلعة المانكا كانت ملفوفة فقماش رفدها وغير نزلها حب يشوف واش هذا عراها لقى بزازلها خرجو ايا بقى يتلمس فيهم حتى دخل عليه باباه قالو مزلت برك ماكش حاشم ايا بعثو يليفري واحد لاكوموند وفطريق يفوت على دار نوال زعتر البيتش تاع الدوار وبقى يعس فتواقي والبيبان كشما تبان حتى شافو واحد المشعوذ يسكن غير ثم قالو راني كل يوم نشوفك هنا وعلابالي واش راك تحوس روحي جيبلي طرف قماش وطرف من شعرها انا نجيبهالك دير فيها شرع يديك ايا راح سرق لقماش وراح زدملها لدار لقاها فلحوش جبد الموس وهي ناضت تعيط حسبت حاب يقتلها نحالها طرف من شعرها وراح مي الغاشي سمع وراجلها سمع زاد لم بني عمو وراح لدار المدعو سيدي قالهم صاايي ليوم يسموني نزوجو واذا مازوجووش نسايا في ربعة راهم حارمين عليا ايا مور مافراها مع الجماعة دخل ليه ربطو وراح يحوسلو على عروسة. ووين راح راح عند وردية الله يرحمها لي كانت لاعبة دور تاع باطرونة قديمة كان يزورها المدعو سيدي بكري ايا قالها راني حاب نزوج الطفل ليوم ولازمني عروسة قاتلو ياحسراه قاتلو الدنيا ماباقاتش كيما بكري البنات لي كانو عندي لي تزوجت تزوجت ولي رحلت رحلت ولي ماتت ماتت حبيبنا كان حاب يزوجو بعاهرة. ديراكت بعد ما مالقاش عندها غايتو والعرس كان قايم رااح زوجو بلبوبية لي كان يتلمس فيها فلحانوت وماحلبوش حتى وقت الدخلة قدور مسكين فرحان ويحكي مع عروستو لي كانت تحت الحجاب ويسي يكون معاها رومنسي والناس طبطب عليهه واش فريتها وريلنا الدم بعد ماتقلق قالها احكي معايا ولا نضربك بعد مانصحو صاحبو بلي لازم يكون سادي مايرحمش غير عطاها كف طارت البوبية قربعت فلحيط تشوكا قدور مسكين وتشوكينا حنا موراها هزها قدور وخرج وناس دايرة بيه وتضحك حتى رما روحو من الجرف وهكذا خلاص الفيلم وقدور مسكين مات قبل مايذوق الحلوة ...

ملاحظة لي فصورة هو قدور

#الجودي

07/05/2026

لا يمكن لعبثية عقلك و الجانب السوداوي لروحك و كرهك للغرق في الأمور أن يتجاوز الفجائع ، المعانات و إن كانت تصقل الإنسان فهي من جهة أخرى تطرده إلى مكان آخر ، يشغله شخص آخر طردته معانات أخرى
.
لذا ...مهما هدأت ملامحك ،و مهما سكن جسدك عن الحركات المبالغ فيها ، و مهما بلغت من رباطة الجأش إلا أنك و في أول فيراج مريع ستلجأ ، ستلجأ إلى إله ما ، إلى شخص ما ، إلى شيء ما ..

ستنسى كل التوصيات الذاتية التي كانت لتقودك على الأرجح إلى مواجهة الأمر بنفسك و لوحدك و بأن لا تبالغ في ردات فعلك . و شعور قاتل آخر في عدم الرغبة في أن تكون مثيرا للشفقة.
فلتذهب نظريات الحضارة لجهنم التالية ڨاع لأن إنسان القرن الواحد و العشرين مثير للشفقة دون أدنى محاولة منه , فما البال بمشاكل المجتمعات المحلية ، و المدن الصغيرة و القرى و الدشرات .
و لهذا اكتف بالكثير من الرصانة ، و لا بأس ببعض المشاعر الجياشة من حين لآخر .

#ماثيو

06/05/2026

السلام عليكم .. سؤال بلاك نلقاو افادة : مشكل البطاقات الرمادية بعد ما يبعتوك عند لانجينيور و تولي للبلدية هل يتم إصدار البطاقة الرمادية مباشرة و تقدر تكتب للشاري ولا تزيد تطول المدة باش تتمكن من كتابة السيارة للشاري ؟

05/05/2026

خطرة في رمضان مع العصر الشيباني مونك دخان و شمة و داير تخليطة زوج جبال و باين بلي نادم عليها مقابلها يخدم و يريح .. بعثنا انا و خويا كبير عليا و كنا صغار نشرولو زوج ڨوارا ريم خاطر ورا لمغرب يبدا ما يشوفش لازم ورا فطور ديركت .. ايا رحنا شرينا كيجينا راجعين خويا طاح و تڨرضولو لڨوارا ..تالمو كان محنك فهاد امورات شا دار مدهملي قالي ديهم لدار و راح كمل لعب و نا ديتهم و رايح كي الجاموس المتهور .. كي وصلت مع مديتهملو و نا نتبسم قتلو تڨرضو ههه ... شاف معاهم 0.2 ثانية ضربهم من يدي راحو في جهة و زاد ضربني بركلة للظهر تيراني في جهة ..و هو مرتديا الحذاء اسفل الصورة حسيت ظهري تحولولو الفقرات شغل شوية ماساج مع بزاف ألم.. و عاود بعثني نشريلو وحدخرين قائلا تڨرضهم مكانلاه تجيبهم و تجي ...من تما و نا حاقد على خويا لي سلك منها و نا ديت لمضرب
#ماثيو

02/05/2026

و إني لأحافظ على إنسانيتي ببعض الإنتماء القبائلي ، و أسمح لشخصي بأن يتلذذ ببعض العروبة و الجزائرية ، و بمسحة من الإستسلام للبدائية و التقليد و العادة ، اتناسى أنني أنا المتعال الناقم على عجلة الحياة و جل ما فيها من مجموعات و فصائل بشرية على أصنافها .

#ماثيو

02/05/2026

#الجودي

حبيينا ماسمين يتكل ماليكولار تاعو شابين يسر بيهم الناظرين ماصوتو شباب يخلويك والو خدمتو ياكل الكرموس والمشماش والزرع قبل مايطيبو ويني/كلك الرقدة صباح مع طلوع الشمس خدايمو كامل تاع واحد فري ولد قح.. ضرك بعد راه واحد فتاقة معرش كون جات بيدي نضربو ببازوكا تبقى.غير الزعكة تاعو تدخن كي عود البخور...

#الجودي

01/05/2026

و لأنه باش يكون كاين بياض لازم يكون كاين سواد ، و لأن النهار يطلع من الليل ، و لأنه فالخير كاين الشر و فالشر كاين الخير و فالربح كاين خسارة و فالخسارة كاين ربح، و لأنه كي يسود النظام يجب أن تعم الفوضى و لأن جميع الكلمات و المعاني الموجودة تُعرف بنقيضهاو بأضدادها ،و لأن الإنسان ملتقى جميع التناقضات و الأضداد ، ف العقول الفاسدة كاين العقول السليمة
ادمن جديد .. وسمو #ماثيو

26/04/2026

#الجودي

الأمر مختلف تماما بين الوعي العاطفي والذكاء التحليلي كونك ذكي تحليلياًاو ممكن تكون نابغة لايعني بضرورة انك تكون ذكي عاطفيا العلاقات العاطفية عند الشعور بما يسمى الحب
مخك يفرز الدوبامين هرمون السعادة تولي تحس روحك ديما فرحان مع هذاك الإنسان
ويفرز الأوكسيتوسين هرمون التعلق والثقة تربي كونفيونص فشخص تولي تحس روحك والفت هذاك الشخص وبلا بيه دنيا سامطة

لاعليناا كي يصرالك الأمرين لي ذكرانهم مخك يقنع روحو من خلال افرازات هرمون الثقة والدوبامين انو في فضاء راحة يعني مكاش علاش يخدم بزااف باسكو الإفرازات الهرمونية عند الشعور بلحب راهي تانديكيلو فلاوعي تاعو انو رااه كلش ريقلو الشخص هذا نثيقو فيه ونحسو معاه بسعادة استراح مكاش على تستعمل 100٪ من قدراتك العقلية

لذالك الوعي العاطفي هو الحل الوعي العاطفي مايمنعكش انك تحب انما يخليك تحط خطوط تحت معايير الحب الحقيقي والأفعال الي فعلا تثبت الحب الوعي العاطفي هو لي مايخليش تركيزك وتفكيرك بلمنطق يدخل في حالة OFF اثناء العلاقة دئما بخليك تمشي بقاعدة نحب بقلبي انما تحليل الأمور واتخاذ القرارات يكون بعقلي والوعي العاطفي هنا يعتمد هلى انك تراقب الافعال وليس الكلام الاقوال ساهل باش تقولها نقدر نقول الف كلمة نحبك فنهار انما الصعيبة هي اني ندير فعل واحد فقط يدل صح على الحب
كمثال بسيط تقولك نحبك بصح ماتسمعلكش الهدرة التحليل يكون ديراكت =هاذا موش حب بلا ماتبقى تخلق في تبريرات وهمية
مثال بسيط اخر يقولك نحبك وهو مايغيرش عليك ويوريك لصحابو التحليل يكون ديراكت = هذا موش حب لا ماتبقاي تخلقي في تبريرات وهمية

في الحياة الواقعية عن نفسي نعتبر الوعي العاطفي اقصى درجات الذكاء باسكو لي يتقنو موحال تلقاه غبي في امور اخرى بينما تقدر تلقى واحد نابغة في تحليل امور اخرى وغبي في هاذ الكوتي لذالك الذكاء او الوعي العاطفي هو السيزو لخرة تاع الذكاء وهو راح يكون جمع بين الذكاء التحليلي والعاطفي باسكو موحال تقدر توصل لمرحلة الوعي العاطفي ونتا غبي في تحليل امور الحياة اليومية الأخرى بختصار باش تكون واعي عاطفيا لازم الوعي تاعك يغلب المواد والهرمونات لي يفرزها مخك عند الشعور بلحب ولي تعتبر مخذر لذكاء داخل العلاقة وكيفاش تغلبهم تغلبهم بلمنطق اي فعل قيسو بمنطق اذا لقيتو منطقي بصحتك اذا لقيتو غير منطقي دير stop ديراكت بلا اي تبريرات وهمية وصرفق روحك بجرعة منطق تفطنك والسلام عليكم

#الجودي بارطاجي مع ذكر المصدر