20/10/2026
علاش هكة
كل ليلة الدنيا تضلام ويخرجو كيما les escadrons de la mort يقتلوا في الكلاب الي ذنبها الوحيد وانها توجدت في الشارع بفعل الإنسان ولي من جيهتو جزء منو احرض عليها .
كل ليلة صوت الكرطوش اخيط وريحة الدخان طالعة وعوي الكلاب يوجع القلب .
كل ليلة الدم سواقي في الكياس وهوما يرميو فيهم في الكميونة الي ميت ولي ما زال حي .
علاش هكة ؟
علاش تحرضوا عالبكمة وصفحات نهار وطولو تبرتاجي في الغل والكره الي في الناس للكلاب .
نهار وطولو وهوما يطلبوا من البلدية بش تقنصهم والغريب وأنو عمرو ما كان القنص لا بش يقضي على هالظاهرة ولا بش يلقى حل لداء الكلب .
ناس تتكلم وتندد اما ما تعاونش .
تستنى منك وأنك تلقى الحلول .
تستنى منك وانك انت تمشي وتوقف القنص .
اي احنا ضد القنص وضد هالسلوك الغير انساني والعنف الي قاعدين نشوفو فيه لكن يلزم لكل نكونوا يد وحدة يا جماعة .
بش نطلبو الوقف الفوري للقنص يلزم نعقموا ونلقحو وهذا اطلب فلوس واذا لكلكم ما تساهموش ما نجموش نفرضوا وقف القنص .
فما كلاب نعرفوهم وعمرهم ما ضروا حد وقتلوهم.
فما كلاب والدة وترضع قتلوهم وخلاو أولادهم اموتوا.
فما كلاب راقدة وقتلوهم .
علاش هكة ؟
كل ليلة نبداو مرعوبين على خاطر خايفين لا غدوة ما نلقاوش الكلاب الي ستانسنا بيهم ونعرفوهم.
كل ليلة ولات أعنف من أختها .
علاش هكة ؟
بلديات اخرين قاعدين اعاونو بش يلقاو حلول أكثر رحمة واحنا بلديتنا اطيح الليل والكرطوش اولي اخيط فيها قدام الماشي والجاي .
علاش هكة ؟
ليوم نطلبو كجمعية للناس الي تهمها وضعية الكلاب السائبة وانها تكتب اسمها على المنشور الي بش نبعثوه للبلدية ونطالبوها بش توقف القنص وكل واحد منكم احاول اعاون بش نعقمو ونلقحو للكلاب . الي احب اعاون انجم احط مساهمتو سواء في الحساب البنكي متاعنا او عند الدكتور البيطري الي بش نتعاملو معاه.
يلزم تكونوا عمليين ويزيونا من الكلام .
موش عاجبتكم الوضعية تحركوا عاونوا أضعف الإيمان جيبو لقوحوا للكلاب الي عزاز عليكم .
كونوا عمليين وساهمو بش البكمة تعيش .
يد وحدها ما تصفق.
كونوا جزء من الحل وبعد قولو بصوت عالي
لا لا للقنص ... عندو الحق اعيش .
