بعد بدء الحرب على سوريا بالـ 2011 وازدياد حاجة الناس بالبلد للدعم بمختلف أشكاله بادرت مجموعة من الأصدقاء الألمان والسوريين منهن آثاريين وأطباء وأفراد محبّين لسوريا بتأسيس جمعية غير ربحية مقرها ألمانيا تحت اسم (إغاثة سوريا) ليقدروا من خلالها جمع التبرعات بشكل نظامي ودعم كتير مشاريع إغاثية وتنموية خاصة بالسوريين.
بالـ 12.12.2021، صار عمر الجمعية التسع سنين، وبهدول التسع سنين عملت الجمعية كتير مشاريع
منها يلي مستمر لحد الآن: متل دعم المدارس والسلة الغذائية ودعم الأسر وتأمين السكن لعدد كبير من العائلات، بالإضافة لمبادرات موسمية متل ألبسة المدارس والقرطاسية وألبسة الأطفال والطبابة.
بفضل من الله ورعايته، استطاعت الجمعية سنة بعد سنة تأسيس مشاريع جديدة ودعم عدد أكبر من السوريين. ومع مرور السنين وتأزم أوضاع السوريين بالداخل والخارج أكتر وأكتر توجهت قناعة القائمين على الجمعية للتعليم وأهميته، بالذّات إنه جيل كامل عم ينشأ بدون رؤية واضحة للمستقبل.
مع بداية الـ 2016، كرّست الجمعية كتير من تبرعاتها للمشاريع التعليمية الخاصة باللاجئين السوريين بلبنان وتركيا وإدلب ووصلت لحوالي (1900 طالب).
من خلال القناعة إنه العلم هو الحل لجيل الحرب، وبدون العلم منخسر البلد وأهل البلد.
وبناءاً على مبدأ الجمعية بضرورة التعليم وتمكين الجيل القادم ليقدر يوقف على رجليه ويمضي بمستقبله بشكل يناسب أولادنا وبلدنا لح تكون حملاتنا موجهة حصراً لدعم التعليم ودعم مشروع ذوي الاحتياجات الخاصة (أصحاب الهمم) (إلا إذا حصل ظرف طارئ واضطراري).
