17/06/2026
Përmbledhje e mbledhjes së Kryesisë së KMSHZ-së me përgjegjësit e departamenteve
Mbledhja e Kryesisë së KMSHZ-së me përgjegjësit e departamenteve u hap me lexim nga Kur’ani Famëlartë nga Irfan ef. Musliji.
Më pas, kryetari i KMSHZ-së, i nderuari Fehim ef. Abazi, mbajti fjalën përshëndetëse, ku falënderoi të pranishmit për pjesëmarrjen dhe angazhimin e tyre. Ai theksoi rëndësinë e hartimit të një planprogrami të qartë për të ardhmen e KMSHZ-së. Ky planprogram duhet të dorëzohet në Kryesi deri në fund të tetorit 2026, në mënyrë që të paraqitet për shqyrtim dhe miratim në Kuvendin e ardhshëm.
Në vazhdim, përgjegjësi për departamentet pranë kryesisë i nderuari Besim ef. Nuzi theksoi se komisionet përbëjnë një prej shtyllave më të rëndësishme të aktiviteteve të KMSHZ-së. Ai nënvizoi se planprogrami duhet të përcaktojë qartë drejtimin dhe veprimtarinë e KMSHZ-së në të ardhmen. Gjithashtu, ai paraqiti versionin zyrtar të rregullores për komisionet, të miratuar në Kuvendin e fundit, dhe theksoi nevojën që secili komision të angazhohet në mënyrë aktive dhe të koordinojë punën me komisionet e tjera.
Në emër të Komisionit Juridik, i nderuari Rejhan ef. Neziri falënderoi Kryesinë për ftesën dhe shprehu gatishmërinë për bashkëpunim. Ai sqaroi se draftet janë përgatitur nga ekspertë të fushave përkatëse, në përputhje me ligjet e Zvicrës dhe me parimet fetare. Po ashtu, ai njoftoi se ky komision deri në fund të tetorit 2026 do të rishikojë ndryshime të domosdoshme në statut apo në disa rregullore të rëndësishme, si: rregullorja për kodin zgjedhor, rregullorja për komisionet, rregullorja për imamët dhe rregullore e drafte të tjera të nevojshme, me qëllim përgatitjen e tyre për t'u paraqitur në Kuvendin e ardhshëm të KMSHZ-së.
Në emër të Komisionit për Veprimtari Botuese, i nderuari Nehat ef. Ismaili foli për planin e botimit të Kur’anit Famëlartë me logon e KMSHZ-së, me përkthimin e Sherif Ahmetit i cili është redaktuar nga BIK-u. Ai përmendi edhe mundësinë që ky botim të mbështetet nga donatorët dhe xhamitë e Zvicrës. Gjithashtu, u theksua se përparësi do t’u jepet botimeve të veprave të imamëve në Zvicër. Njëkohësisht, u përmend edhe rëndësia e organizimit të simpoziumeve shkencore dhe ligjëratave për imamët e teologet në Zvicër.
Për Komisionin për Mektebe, raportoi i nderuari Azir ef Aziri, si anëtar i këtij komisioni. Ai theksoi nevojën për profesionalizëm në hartimin e planprogrameve arsimore të mektebeve. Gjithashtu, ai njoftoi se planprogrami është drejt përfundimit dhe se është i ndarë në cikle për grupmoshat 6–8 dhe 9–12 vjeç.
Në lidhje me këtë çështje, kryetari Fehim ef. Abazi theksoi nevojën për përfshirjen e ekspertëve në përpilimin e kurikulave, në mënyrë që ato të jenë sa më cilësore dhe të përshtatshme për nevojat e fëmijëve.
Ndërsa Rejhan ef. Neziri shtoi se duhet të hartohet një metodologji që i përshtatet kushteve dhe realitetit të jetës në Zvicër.
Në emër të Komisionit të Rinisë, i nderuari Fesal ef. Fetahi paraqiti disa ide dhe aktivitete të mundshme. Ndër propozimet kryesore ishin: organizimi i turnirëve të futbollit, krijimi i rrjetit të forumeve rinore, mbajtja e seminareve me imamë vendorë nëpër xhami, organizimi i kuizeve përmes platformës Kahoot, si dhe formimi i një kori të KMSHZ-së me nxënësit e mektebeve.
Për Komisionin për Pajtime, foli i nderuari Irfan ef. Musliji. Ai theksoi se që nga zgjedhja e tij si koordinator ka zhvilluar takime për disa raste që i janë paraqitur këtij komisioni dhe se ato janë protokolluar. Gjatë diskutimit u theksua se ky komision, në përputhje me rregulloren për komisionet, duhet të raportojë sa më shpejt në Kryesinë e KMSHZ-së për rastet dhe aktivitetet e tij.
Në emër të Komisionit të Gruas, raportoi Elona Muça. Ajo prezantoi aktivitetet e zhvilluara gjatë vitit të kaluar dhe gjatë muajit të Ramazanit 2026. Ndër aktivitetet e përmendura ishin përgatitja e materialeve audio me teologe, realizimi i videove me fëmijë nga xhamitë, si dhe organizimi i konkursit me rastin e ditëlindjes së Pejgamberit a.s. i cili do të zhvillohet në muajin gusht. Ajo kërkoi mbështetje nga imamët dhe xhamitë në Zvicër që të mbështesin këtë aktivitet me qëllim që të ketë një pjesëmarrje së më të madhe në të.
Në fund të mbledhjes, kryetari Fehim ef. Abazi falënderoi të gjithë pjesëmarrësit për punën, kontributin dhe angazhimin e tyre. Ai shprehu shpresën për një bashkëpunim edhe më të mirë ndërmjet Kryesisë dhe komisioneve, me qëllim realizimin e projekteve të reja dhe avancimin e veprimtarisë së KMSHZ-së në të ardhmen.
