01/01/2024
அனைவருக்கும் புத்தாண்டு வாழ்த்தும் மனமார்ந்த நன்றியும்,
மாபெரும் வெற்றியளித்த "பூவரசம்பொழுது கலைவிழா 2023"
நேர்த்தியான ஒருங்கிணைப்பு, மண்டபம் நிறைந்த மக்கள், தரமான தொகுப்பாளர், நாட்டிய ஆசிரியைகளின் சிறப்பான நடனங்கள், மக்கள் கவனத்தை ஈர்ந்த நாடகம், நீதன் குழுவினரின் வாத்திய இசை, சிறுவர்களின் கண்கவர் ஜனரஞ்சக நடனங்கள் என விழா களை கட்டியது.
5:30 மணிக்கு விழாவை ஆரம்பித்து வெற்றி விழாவிற்கான விதை இடப்பட்டது. மங்கல விளக்கினை ஏற்றி, கீதங்கள் பாடி, வரவேற்புரை, ஆசியுரை வழங்கி மிக வேகமாக நிகழ்வுகள் ஆரம்பிக்கப்பட்டன.
ரொரண்ரோ மக்களின் அதிக வரவேற்பினை பெற்றிருக்கும் ஆசிரியை வனிதா குகேந்திரனின் மாணவர்களின் வரவேற்பு நடனமும் எழுந்துவாடா பாடலிற்காக அவர் வழங்கிய நடனமும் ஆரம்ப நிகழ்வினை சிறப்புறச் செய்தது. தாயக நினைவுகளை தாங்கி வந்த, ஆசிரியை பிரவீனா தீபனின் மாணவர்கள் வழங்கிய சிறப்பான நடனம் மக்கள் மனதில் நிலைத்தது. தொடர்ந்து சிவனை மையமாக வைத்து அழகிய நடனத்தை ஆசிரியை மலர்விழி வரதராஜனின் மாணவர்கள் வழங்கி நிகழ்வின் வீரியத்தை தக்க வைத்துக்கொண்டார்கள். பார்வையாளர்களால் அதிகம் எதிர்பார்க்கப்பட்ட ஆசிரியை கௌரி பாபுவின் மாணவர்கள் வழங்கிய நடனம் நிகழ்வினை உச்சஸ்தானிக்கு கொண்டு சென்றது.
கருத்து மிகுந்த பிரதம விருந்தினர் உரை, கண்ணியமான தலைவர் உரை, மதிப்பளித்தல் நிகழ்வுகளைத் தொடர்ந்து பூவரசம் பொழுதின் அடையாளமாக "பூவரசன்" நாடகம் மேடையேறியது. நீண்ட நாடகப் பாரம்பரியம் மிகுந்த புங்குடுதீவு கலைஞர்களின் தொடர்ச்சியாக புங்குடுதீவு மைந்தனால் எழுதி மேடையேற்றப்பட்ட இந்த நாடகம் கனடாவில் வாழுகின்ற புங்குடுதீவு மக்கள் அனைவரும் புங்குடுதீவை கட்டியெழுப்ப முன்வரவேண்டும் என அழகான கருத்தை விதைத்துச் சென்றது. இந்த நாடகத்தில் பிரதான கதாபாத்திரம் ஏற்று நடித்த தரன் வில்வரத்தினம் அவர்கள் அனைவரின் பாராட்டையும் பெற்றுக் கொண்டார். பின்னர் பூவரசம் பொழுது மலர் வெளியீடு செய்யப்பட்டது. சங்கத்தின் நிர்வாக சபை உறுப்பினர்கள் விழாவில் அறிமுகம் செய்யப்பட்டனர். இடைவேளை வரை நாடகமும் நாட்டியமுமாக நிகழ்வுகள் சிறப்பாக நடைபெற்றன.
இடைவேளைக்குப் பின்னர், "Rhythm of Rishi 2023" கலைஞர்கள் நவநீதன் மற்றும் ரிஷி அவர்களின் வாத்திய இசைக்கச்சேரி மிகவும் சிறப்பாக ஆரம்பித்தது, தொடர்ந்து சஜீனா சுரேன் மற்றும் ஆரூஸ் சுரேன் சிறப்பாக சினிமாப் பாடலிற்கான நடனத்தை வழங்கி நிகழ்வினை அழகுறச் செய்தார்கள். அதனைத்தொடர்ந்து AJ style cine dance குழுவினர் அழகிய இசை நடனத்தை வழங்கினார்கள். விளம்பர அனுசரணையாளர்களிற்கு மதிப்பளித்தல் நிகழ்வு நடைபெற்றது. மீண்டும் தொடர்ந்து நடைபெற்ற நீதன், ரிஷி இசைக்குழுவின் வாத்தியக் கச்சேரி எல்லோரின் பாரட்டையும் பெற்றுக்கொண்டது.
ஐந்து ஆண்டு கால இடைவெளியின் பின்னர் நடைபெற்ற "பூவரசம் பொழுது 2023" நிகழ்வு எல்லோராலும் வரவேற்கப்பட்டு அனைவரினது பாராட்டினையும் பெற்றுக்கொண்டது.
இவ்விழா சிறப்புற ஆதரவு வழங்கிய வர்த்தக நண்பர்கள் அனைவருக்கும் மனமார்ந்த நன்றி. நிகழ்வுகளை வழங்கிய ஆசிரியைகள், மாணவர்கள், கலைஞர்கள் நன்றி. ஊடக நண்பர்கள், புகைப்படக் கலைஞர்கள் அனைவருக்கும் நன்றி. விழா சிறப்புற உழைத்த அனைவருக்கும் நன்றியும் வாழ்த்தும்.
வருகை தந்து விழாவினைச் சிறப்பித்த அனைவருக்கும் வாழ்த்தும் நன்றியும்.
