12/03/2026
A***n Bajraktari
U nderuam nga pritja e organizuar nga Ambasada e Republikës së Shqipërisë në Bruksel, nën kujdesin e Shkëlqesisë së Saj, Znj. Albana Dautllari, kushtuar Ditës së Mësuesit në një ceremoni vlerësimi për kontributin e jashtëzakonshëm të misionarëve të dijes, mësuesve në Belgjikë dhe Luksemburg.
Me këtë rast u shpërdanë edhe ''Çertifikata Mirënjohjeje'' për të gjitha shkollat plotësuese shqipe prezente në sallë, si dhe u falenderuan mësuesit për rolin e jashtëzakonshëm në ruajtjen e gjuhës shqipe, transmetimin e saj te brezat e rinj, duke kontribuar direkt në mosasimilimin gjuhësor dhe kulturor.
Edhe shkolla ''Faik Konica'' Namur, me Drejtor Z. A***n Bajraktari, mësues Anila Celami, Muhamed Bektashi, Tefta Abedinaj, Enxhi Luta dhe Presidentin e Shoqatës 'Nënë Tereza'', Z. Adnan Rexhepi, u nderuan me një çertifikatë mirënjohjeje krahas simotrave shkollave shqipe në Belgjikë e Luksemburg ''Vatra'', ''Iliriada'', ''Rozafa'' etj
Aktiviteti kishte tërhequr edhe vëmendjen e të sapozgjedhurit Ministrit të Jashtëm të Republikës së Shqipërisë, Shkëlqesisë së Tij, Z.Ferit Hoxha, i cili e përshëndeti takimin duke theksuar rolin aq të çmuar të mësuesit në Diasporë, por mbi të gjitha me një vëmendje dhe qasje të re, i hapur në dialog për të gjetur mundësi dhe pista të reja për të mundësuar mësimin e gjuhës shqipe kudo ku ka fëmijë shqiptar. Gjithashtu prania e Ambasadorit të Republikës së Kosovës, Shkëlqesia e Tij, Z. Agron Bajrami dhe e Përfaqësuesit të Republikës së Maqedonisë së Veriut pranë Bashkimit Europian, Shkëlqesisë së Tij, Z, Zulfi Ismaili, tregonte vëmendjen e shtuar mbi këtë mision aq delikat në ruajtjen e trashëgimisë kulturore në mërgim.
Përfitojmë nga rasti të bëjmë sërish një thirrje gjithë bashkëatdhetarëve tanë veçanërisht në Namur, por edhe në Belgjikë, Luksemburg, Europë e kudo në botë: Afroni fëmijët tuaj pranë shkollave plotësuese shqipe, ju jepni atyre mundësinë të mos asimilohen dhe të ruajnë vazhdimësinë gjuhësore dhe kulturore aq të çmuar në identifikimin shqiptar. Bëni detyrën tuaj prindërore përpara se të jetë shumë vonë dhe familja, fëmijët tuaj, historia dhe kombi t'ju gjykojnë. Shkollat shqipe kudo j'ua japin këtë mundësi, në shumicën e rasteve pa pagesa.
