26/08/2026
🇳🇵 सहयोगको अपिल 🙏
तिब्बतबाट आएको भीषण बाढीका कारण रसुवा, नुवाकोट, धादिङलगायत विभिन्न जिल्लामा भएको मानवीय क्षति तथा अपूरणीय भौतिक क्षतिप्रति गैरआवासीय नेपाली संघ, राष्ट्रिय समन्वय परिषद् (NRNA NCC) बेल्जियम गहिरो दुःख व्यक्त गर्दछ।
यस दुःखद प्राकृतिक विपद्मा ज्यान गुमाउनुहुने सम्पूर्णप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा गहिरो समवेदना व्यक्त गर्दछौँ। घाइतेहरूको शीघ्र स्वास्थ्यलाभको कामना गर्दै विस्थापित तथा प्रभावित नागरिकप्रति हार्दिक सहानुभूति र ऐक्यबद्धता व्यक्त गर्दछौँ।
विपद्को यस कठिन घडीमा उद्धार, राहत तथा प्रभावित नागरिकको सुरक्षित व्यवस्थापनका लागि हामी सबै तत्पर रहँदै आ–आफ्नो स्थानबाट सक्दो योगदान गर्नु आजको आवश्यकता हो।
स्वदेश तथा विदेशमा रहनुभएका सम्पूर्ण नेपाली दाजुभाइ तथा दिदीबहिनीहरू, संघ–संस्था, व्यवसायी, समाजसेवी तथा शुभेच्छुक महानुभावहरूलाई यस मानवीय संकटमा एकताबद्ध भई राहत तथा उद्धार कार्यमा हातेमालो गर्न हार्दिक अनुरोध गर्दछौँ।
🤝 NRNA NCC बेल्जियमको राहत सहयोग अभियान
यसै जिम्मेवारीलाई आत्मसात् गर्दै NRNA NCC बेल्जियमले आफ्नो आकस्मिक सहयोग कोषमार्फत राहत सहयोग अभियान सञ्चालन गरेको छ।
बेल्जियममा रहनुभएका सम्पूर्ण नेपाली समुदायलाई आ–आफ्नो क्षमता र इच्छाअनुसार सहयोग गरी विपद्मा परेका नेपाली दाजुभाइ तथा दिदीबहिनीहरूको दुःखमा साथ दिन हार्दिक अपिल गर्दछौँ।
🏦 सहयोग पठाउने बैंक विवरण
Account Name: NRNA NCC Belgium
IBAN: BE53 3632 0211 0553
Communication: Rasuwa Flood Relief
हाम्रो जिम्मेवारी तत्काल राहतमा मात्र सीमित हुनु हुँदैन। विपद्पछिको पुनर्स्थापना तथा पुनर्निर्माण कार्यमा समेत गैरआवासीय नेपाली समुदायले अग्रणी र जिम्मेवार भूमिका निर्वाह गर्नुपर्ने आवश्यकता छ। त्यसैले विश्वभर रहनुभएका सम्पूर्ण गैरआवासीय नेपालीहरूलाई आवश्यक पर्दा एकताबद्ध भई सहयोगका लागि तयार रहन हार्दिक आह्वान गर्दछौँ।
सानो–ठूलो हरेक सहयोगले विपद्मा परेका परिवारहरूका लागि आशा र भरोसाको आधार बन्न सक्छ।
आउनुहोस्, मातृभूमि संकटमा परेको यस घडीमा हामी जहाँ रहे पनि मन र कर्मले एक ठाउँमा उभिऔँ।
संकलित सहयोग प्रभावितहरूको आवश्यकता र प्राथमिकताका आधारमा पारदर्शी तथा जिम्मेवार ढङ्गले परिचालन गरिनेछ।
गैरआवासीय नेपाली संघ
राष्ट्रिय समन्वय परिषद् (NRNA NCC) बेल्जियम
