22/04/2026
🥔Belsj zitj allewiel op eine berg petatte diej de boore neet aane straotstein kwiët kinne gerake. Dao is mer leefst 860.000 tôn aerpelle euver dit jaor! Het zou neet allein zunj zeen ôm det good en voedzaam materjaol te laote verlore gaon, de landjbòwwers in kwestie môtte leefst ouch get mieë es allein mer het zaot op heur petatte verdeene. Veur niks geit allein de zôn op!
🫵Jo Brouns, minister van boorderieje en omg*eving, heet gelökkig alweer mèt ziën kabinèt ein oplossing op maot oëtgewirktj.
☝️Jo: “In feite is het simpel. Laot mich efkes eine raekensôm make!”
- 1 tôn is 1.000 kilo.
- Het geit dus euver 860.000.000 kilo aerpel.
- Ein gooj porsie frit is 400 gram.
- Det wiltj dus zègke desse 2,15 miljaard porsies frit kins snieje.
- In Belsj zeen wae mèt 11,7 miljoen luj.
- Det is dus ôngeviër 184 porsies frit veur eedere Belsj.
- Esse eedere vriedig fritte its, kumse 3,5 jaor tòw.
- Es eedere Belsj 73,5 kilo petatte geit hole (veur gezinne effe de kinjer mèttèlle en veur de aoj van dage môtte de rösthoeëze effe get raekene), zeen wae wiëd genôg.
- Petatte jasse kintj bèst ei fijn wirkske zeen, esse det same duis. Radio op, sjolk aan en juu!
- Nao het veurbakke (5 menuute op 140 graode in het vèt), leutse de frit röstig aafkeule op get keukepepeer.
- De kins det perfekt invreeze. Blieftj hiël lank good.
🍟Jo: “Belangriëk ouch ôm efkes te ôngerstrepe det het hiej euver ein ekstra fritmomentj môt gaon. De friture en de rest vanne ekonomiej môt ouch bliëve wiejer dreije. Dus neet oëtsloëtendj aane zelfgesneeje frit gaon!”
🤝“Ich raeken oppet gezôndj booreverstandj van eedere Vlaoming, eedere Belsj. Effe geine riëst of pasta oppe menuj: det zègk ich uch! Es wae effe same pin haoje, gerake wae door dae berg petatte haer. Ich bèn alvast zelf begôs mèt sjèlle!”
