16/06/2026
Təbiətlə iç-içə, səmimi bir görüş:
Qundanlı kəndinin zəhmətkeş
arıçısı.🐝🌼
Qubadlının hər guşəsi bir cənnət, hər kəndi bir xəzinədir. Bu dəfə yolum təbiətin bütün gözəlliklərini qoynunda saxlayan, havası dərman, suyu şirin Qundanlı kəndinə düşdü. Burada ruhu dincəldən səmimi bir görüşün, doğma yurda sevgiylə bağlı olan bir ömrün şahidi oldum.
Qunadanlı kənd sakini, tanınmış arıçı Elxan Bayramovla həmsöhbət oldum.
Elxan bəy arıçılıq təsərrüfatına addım atan kimi insan özünü təbiətin təmiz ritmində hiss edir. Onun işinə olan sevgisi, hər pətəyə, hər arıya göstərdiyi xüsusi qayğı sadəcə bir peşə deyil, əsl könül işidir.
Saatlarla çəkən söhbətimizdə Elxan bəyin zəhmətkeşliyi, doğma Qubadlı torpağına olan sonsuz bağlılığı bizə çox təsir etdi. O, bu dağların, bu yamacların min bir çiçəyindən süzülən təmiz, şəfalı Qubadlı balını ərsəyə gətirmək üçün gecəsini gündüzünə qatır. Onun dilindən süzülən hər kəlmədə yurd sevgisi, torpaq ətri var idi.
Biz də bu gözəl insana, zəhmətkeş həmyerlimizə işində bərəkət, cansağlığı və yeni-yeni uğurlar arzulayırıq!
Qubadlının torpağı qızıl, insanı isə bax belə qızıl kimi dəyərlidir.🇦🇿
