10/08/2024
Qanlı bolşevik ordularına qan udduran əfsanəvi qaçaq Samuxlu Məmmədqasımın "Allah qoruyunca" adlı xatirələri Salman Mümtaz yayımları tərəfindən çap edildi. Xatirələr ilk dəfə mərhum tədqiqatçı Xanlar Bayramov tərəfindən Azərbaycan oxucusuna çatdırılıb. Yeni və nəfis tərtibatda S.Mümtaz yayımlarının xatirə seriyasından 1-ci kitab olan "Allah qoruyunca" 1920-ci il sovet işğalından sonra 12 illik mənzərənin dəhşətlərini öyrənmək üçün çox önəmli mənbədir. Birinci Dünya Müharibəsində Dikaya Diviziyanın tərkibində döyüşmüş, Ümumrusiya Müvəqqəti Hökümətinin rəhbəri Aleksandr Kerenskinin mühafizə alayında yer almış, Azərbaycan Cümhuriyyəti dönəmində Gürcüstan sərhədinin mühafizəsini təşkil etmiş, 1920-ci il Gəncə üsyanın fəal iştirakçısı, 12 il dayanmadan Sovet hakimiyyətinə qarşı müqaviməti təşkil etmiş və ömrünü Türkiyədə başa vurmuş Samuxlu Məmmədqasım öz yazılı xatirələrini bizlərə miras buraxmış tək qaçaq, xalq qəhrəmanıdır.
Yeni kitabda ön söz və şərhlərin müəllifi mənəm. Kitabı Salman Mümtaz Yayımlarının səhifəsindən və kitab mağazalarından əldə edə bilərsiniz.
Kitabın çap edilməsi üçün böyük əmək sərf etmiş S.Mümtaz Yayımlarının rəhbəri Zaur Həsənzadə 'yə və heyətinə təşəkkür edirəm.
Ceyhun Nəbi
