04/06/2026
“Miqrasiya Könüllüsü” İctimai Birliyinin təşkilatçılığı, Azərbaycan Könüllü Təşkilatları İttifaqı (AKTİ), “BDU könüllüləri” təşkilatı və “EduLAB Chess School” şahmat məktəbinin birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr olunmuş şahmat turniri keçirilib.
Bakı Dövlət Universitetinin (BDU) rektoru Elçin Babayev Ulu Öndər Heydər Əliyevin irsinə həsr olunan layihənin keçirilməsinə görə təşkilatçılara təşəkkürünü bildirib. Tələbə təşkilatları tərəfindən reallaşdırılan belə təşəbbüslərin gənclərin intellektual səviyyəsinin artırılması istiqamətində əhəmiyyətli olduğunu deyib, turnirin iştirakçılarına uğurlar arzulayıb.
Dövlət Miqrasiya Xidmətinin Miqrasiya siyasəti və hüquqi təminat baş idarəsinin rəis müavini Kəyan Hacıyev Ulu Öndərin gənclərə diqqət və qayğısının bu gün də ölkə rəhbərliyi tərəfindən davam etdirildiyini, dövlət idarələrində könüllülük hərəkatına dəstək göstərildiyini deyib. Keçirilən turnirin də həmin siyasət və məqsədin parçası olduğunu bildirib.
AKTİ-nin baş katibi Kamran Məmmədov çıxışında könüllü gənclərin ölkənin gələcəyinin formalaşmasında, cəmiyyətin inkişafında və dövlətçilik dəyərlərinin qorunub saxlanılmasında mühüm rol oynadığını vurğulayıb. Kamran Məmmədov bu baxımdan könüllülərin inkişafına xidmət edən layihə və təşəbbüslərin əhəmiyyətini xüsusi qeyd edib.
“Miqrasiya Könüllüsü” İctimai Birliyinin sədri Şəbnəm İbrahimli turnirdə zəkanın, strateji düşüncənin və sağlam rəqabətin bir araya gəldiyini vurğulayıb, iştirakçılara uğurlar arzulayıb.
Daha sonra “EduLAB Chess School” şahmat məktəbinin direktoru Rəhimə Məcidova turnirin qaydalarını iştirakçılara izah edib.
Müxtəlif könüllü təşkilatlarından olan gənclər püşkatma yolu ilə qarşılaşdırılıb. Üç turluq mübarizədən sonra Yasəmən Məmmədova I, Aydın Əkbərov II, Nurlan Məmmədli isə III yerlərə layiq görülüb.
Qaliblər sertifikat və medallarla mükafatlandırılıblar.
̇b
