22/05/2026
WUF 13 cərçivəsində 2-ci tədbir.
20 may 2026-cı il tarixində Bakı Olimpiya Stadionunda, Global South NGO Platform Pavilyonunda, BMT-nin Ümumdünya Şəhərsalma Forumunun (World Urban Forum - WUF13) 13-cü sessiyası çərçivəsində Hemofiliya və digər Hemostaz Pozuntuları Assosiasiyası tərəfindən regionlarda yaşayan pasiyentlərin həyat keyfiyyətinə və müalicə imkanlarına həsr olunmuş genişmiqyaslı tədbir keçirilmişdir.
Tədbirin əsas mövzusu "Regionlarda hemostaz pozuntularından əziyyət çəkən pasiyentlər üçün müalicənin əlçatanlığı və infrastrukturun təşkili standartları" olmuşdur. Təsbirin keçirilməsində əsas məqsəd şəhər və rayon yaşayış məntəqələrinin inklüziv inkişaf konsepsiyasına uyğun olaraq, xüsusi qayğıya ehtiyacı olan hər bir koaqulopatiyalı (qan laxtalanma pozuntusu ilə) pasiyentin müasir tibbi xidmətlərə çıxışını və həyati vacib laxtalandırıcı faktor preparatlarının regional əlçatanlığını təmin etmək olmuşdur.
Tədbirdə səhiyyənin müxtəlif sahələrini təmsil edən aparıcı mütəxəssislər çıxış edərək xəstəliyin idarə olunmasında regional infrastrukturun formalaşdırılması ilə bağlı mühüm məsələləri diqqətə çatdırıblar:
Ayaz Hüseynov (Hemofiliya və digər Hemostaz Pozuntuları Assosiasiyasının sədri) “Hemofiliya və digər Hemostaz Pozuntuları Assosiasiyasının dövlət səhiyyə qurumları ilə əməkdaşlığı nəticəsində pasiyentlərin müalicəsində əldə edilən nailiyyətlər və gələcəyə olan əsas məqsədlər” mövzusunda çıxış edib. Ayaz Hüseynov dövlət qurumları ilə tərəfdaşlıq sayəsində əldə olunan uğurlardan danışaraq, xüsusilə region mərkəzi xəstəxanalarında Assosiasiyanın dəstəyi ilə yaradılmış multidisiplinar müalicənin təmini üçün stomatoloji, fizioterapevtik xidmətlərin və laboratoriyaların qurulmasının, habelə regional tibb heyəti üçün sistematik seminarların və təcrübə mübadiləsinin vacibliyini vurğulayıb.
Dr. Ələmdar Cəfərzadə (Respublika Klinik Xəstəxanasının Hematologiya şöbəsinin həkim-hematoloqu) “Azərbaycanın bölgələrində hemofiliyalı və digər koaqulopatiyalardan əziyyət çəkən vətəndaşlar üçün müalicəyə çıxışın təşkili” mövzusunda məruzə edib. Həkim bölgələrdə fərdi müalicə planlarının və dərman preparatlarının davamlı tədarükünün pasiyentlərin həyat keyfiyyətinin həlledici rolunu diqqətə çatdırıb.
Mirvarid Siracova (Hemofiliya və digər Hemostaz Pozuntuları Assosiasiyanın və Sumqayıt Hospitalın Baş tibb bacısı) “Qanın laxtalanma pozuntularının müalicəsinin təşkilində tibb bacısının rolu” mövzusunda çıxış edərək koaqulopatiyalı pasiyentlərin müalicə prosesində ixtisaslaşmış orta tibb heyətinin vacib rolunu və tibb bacıları tərəfindən pasiyentlərin xəstəlik barədə maarifləndirilməsi standartlarını izah edib.
Dr. Həmid Tapdıqov (MediClub klinikasının anestezioloq-reanimatoloqu) “Xarici və daxili qanaxmalarda təcili və təxirəsalınmaz yardımın təşkili” mövzusunda çıxış edib. Dr. Tapdıqov kəskin qanaxmalar zamanı ilkin tibbi müdaxilənin elmi əsaslarını izah edərək, iştirakçılar üçün həm nəzəri, həm də praktiki elementlər ilə tədbir davam edib.
Forum iştirakçıları və beynəlxalq nümayəndələr tərəfindən böyük maraqla qarşılanan sessiya interaktiv sual-cavab hissəsi ilə davam edib.
Tədbir çərçivəsində, həmçinin Hemofiliya və digər Hemostaz Pozuntuları Assosiasiyasının regional fəaliyyət strategiyasını və nailiyyətlərini əks etdirən geniş poster sərgisi nümayiş olunub və qonaqlar tərəfindən yüksək qiymətləndirilib.
Hemofiliya və digər Hemostaz Pozuntuları Assosiasiyası
