16/04/2025
AMTA üzvləri ilə AQTA rəsmiləri arasında “Bitki sağlamlığı haqqında” Qanun layihəsinin ictimai müzakirəsi keçirilib
2025-ci il aprelin 16-da Azərbaycan Meyvə-Tərəvəz İstehsalçıları və İxracatçıları Assosiasiyasının (AMTA) üzvləri ilə Azərbaycan Qida Təhlükəsizliyi Agentliyinin (AQTA) rəsmi nümayəndələri arasında “Bitki sağlamlığı haqqında” yeni qanun layihəsinin ictimai müzakirəsi keçirilmişdir.
Tədbirin məqsədi layihənin sahibkarların təcrübə və ehtiyaclarına uyğun şəkildə formalaşdırılması, həmçinin bitki mühafizəsi sahəsində mövcud çağırışların və imkanların birlikdə dəyərləndirilməsi olmuşdur.
Müzakirədə çıxış edən AMTA-nın İdarə Heyətinin sədri Bəşir Quliyev, qanun layihəsinin ictimai rəy əsasında hazırlanmasını yüksək qiymətləndirmiş, bunun sahibkarların maraqlarının nəzərə alınması baxımından əhəmiyyətini vurğulamışdır. O, həmçinin gələcəkdə bitki mühafizə tədbirlərinin təkmilləşdirilməsi istiqamətində Assosiasiya üzvlərinin təkliflərini təqdim etmişdir.
Görüş zamanı Assosiasiya üzvlərinin fikir və rəyləri dinlənilmiş, səsləndirilən suallar AQTA nümayəndələri tərəfindən cavablandırılmışdır.
Bu cür dialoq platformaları dövlət qurumları ilə kənd təsərrüfatı sektorunun nümayəndələri arasında qarşılıqlı anlayış və əməkdaşlığın möhkəmlənməsinə mühüm töhfə verir.
