Azərbaycan-Türkiyə İş Adamları Birliyi

18/06/2026

İyunun 17-də Bakı Ekspo Mərkəzində Kiçik və Orta Biznesin İnkişafı Agentliyi (KOBİA) və “Marsol Group”un birgə təşkilatçılığı ilə “7-ci Yerli Şirkətlərin Tanıtım Sərgisi”nə start verilib.

Sərginin açılış mərasimində Azərbaycan Türkiyə İş Adamları Birliyininin (ATİB) İdarə Heyətinin üzvü Rafiq Qarayev və Katibliyin əməkdaşları iştirak ediblər.

Açılış mərasimində çıxış edən iqtisadiyyat nazirinin müavini Rövnəq Abdullayev, kənd təsərrüfatı nazirinin müavini Seymur Səfərli, ekologiya və təbii sərvətlər nazirinin müavini Vüqar Kərimov, əmək və əhalinin sosial müdafiəsi nazirinin müavini Rəşad Mustafayev, KOBİA-nın İdarə Heyətinin sədri Orxan Məmmədov və “İş adamları Cəmiyyətinin Milli Assosiasiyası” İctimai Birliyinin İdarə Heyətinin sədri Tural Mustafayev ölkəmizdə sahibkarlığın inkişafı, özəl sektorun dəstəklənməsi, yerli məhsulların ixrac potensialının artırılması və sərgilərin “Made in Azerbaijan” brendinin tanıdılmasında oynadığı mühüm rol barədə fikirlərini bölüşüblər.

Sərgidə ATİB üzvləri “Tonuby Group”, Veysəloğlu Şirkətlər Qrupuna daxil olan “Ulduz” şokolad fabriki və “Xonça” fabriki, “Evrika” liseyi, “İstanbul Reklam Market” və “İnci Group of Companies” şirkətlərı öz stendləri ilə iştirak edib.

ATİB nümayəndə heyəti Sərgidə stendləri ziyarət edib, təqdim olunan məhsul və xidmətlərlə yaxından tanış olub, iştirakçı şirkətlərə gələcək fəaliyyətlərində uğurlar arzulayıblar.
Qeyd edək ki, Sərgi iyunun 20-dək davam edəcəkdir.

18/06/2026

İyunun 16-da Beynəlxalq Muğam Mərkəzində Bakı Yunus Əmrə İnstitutunun təşkilatçılığı ilə “Keçmişdən gələcəyə – ənənəvi izlər” adlı təzhib və miniatür sərgisi açılıb.

Sərgi Türkiyə və Azərbaycan arasında ortaq mədəni dəyərləri əks etdirən əsərləri bir araya gətirərək sənət vasitəsilə qardaşlıq bağlarını daha da gücləndirmək məqsədi daşıyır.

Sərgidə Türkiyə Respublikasının Azərbaycandakı fövqəladə və səlahiyyətli səfiri Prof.Dr Birol Akgün, Milli Məclisin Ailə, qadın və uşaq məsələləri komitəsinin sədri Hicran Hüseynova, Milli Məclisin Mədəniyyət komitəsinin sədr müavini Günay Əfəndiyeva, Şimali Kipr Türk Respublikasının Azərbaycandakı mümayəndəliyinin rəhbəri Ufuk Turganer, səfirliyin əməkdaşları, Azərbaycanda fəaliyyət göstərən türk iş adamları, elm və təhsil müəssisələrinin və ictimaiyyətin nümayəndələri, o cümlədən Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov və birliyin üzvü Cemal Yangın iştirak ediblər.

Türkiyənin Azərbaycandakı səfiri Birol Akgün və həyat yoldaşı Zöhrə Akgün , Yunus Əmrə İnstitutunun Azərbaycan üzrə koordinatoru Gökhan Seyhan, sərginin kuratoru Zühal Alodalı, eləcə də Milli Məclisin deputatları, xalq rəssamı Arif Hüseynov və digər rəsmi şəxslər çıxışlarında incəsənətin xalqlar arasında mədəni körpü rolunu oynadığını və bu kimi layihələrin ortaq mədəni dəyərlərin inkişafına mühüm töhfə verdiyini bildiriblər.

Sərgidə Türkiyə və Azərbaycanlı qadın sənətçilərin təzhib və miniatür sahəsindəki orijinal əsərləri ziyarətçilərin diqqətinə təqdim olunmuşdur.

Sərgi 3 gün ərzində Beynəlxalq Muğam Mərkəzində ziyarətçilərə açıq olacaq.

17/06/2026

İyunun 16-da Bakı Konqres Mərkəzində İslam İnkişaf Bankı (İİB) Qrupunun 51-ci İllik Toplantıları çərçivəsində Azərbaycan Respublikasının Kiçik və Orta Biznesin İnkişafı Agentliyi (KOBİA), İİB-in Kuala Lumpur Mükəmməllik Mərkəzi (KLCoE), Malayziyanın Halal İnkişaf Korporasiyası (HDC) və Səudiyyə Ərəbistanı Krallığının Halal Məhsulların İnkişafı Şirkətinin (HPDC) əməkdaşlığı, “Paşa Holding”in maliyyə dəstəyi ilə İİB-in Halal İqtisadiyyat Liderlik Forumu ( ) və Azərbaycan Halal Biznes Forumu 2026 (AZHAB Forum) birgə təşkil olunub.

“Davamlı regional inteqrasiya üçün halal iqtisadiyyat” mövzusuna həsr olunmuş HELF/AZHAB Forumu İİB Qrupunun İllik Toplantılarının tərkib hissəsi olan Özəl Sektor Forumu (PSF 2026) çərçivəsində baş tutub.

Tədbirin məqsədi daha dayanıqlı, davamlı və qlobal əlaqələrə malik halal ekosistemlərin inkişafına töhfə verəcək praktiki tərəfdaşlıqların, investisiya imkanlarının, texniki əməkdaşlıq təşəbbüslərinin və bilik mübadiləsinin təşviq edilməsidir.

Forumda İİB Qrupuna üzv və digər ölkələrdən yüksək səviyyəli dövlət rəsmiləri, siyasətçilər, sənaye liderləri, maliyyə institutları, inkişaf təşkilatları, investorlar, özəl sektor nümayəndələri, o cümlədən Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov, İdarə Heyətinin üzvləri Rafiq Qarayev və Seymur Bünyatov iştirak ediblər.

Tədbirin açılış mərasimində çıxış edən İİB-in Kuala Lumpur Mükəmməllik Mərkəzinin (KLCoE) rəhbəri Samer Elesavi və KOBİA-nın İdarə Heyətinin və AZHAB Forumun sədri Orxan Məmmədov dayanıqlı və inklüziv iqtisadi inkişafda özəl sektorun, xüsusilə KOB-ların rolu, halal iqtisadiyyatın qlobal dəyər zəncirlərində artan payı və bu sahədə əməkdaşlıq imkanları barədə fikirlərini bölüşüblər.

Forum panel müzakirələrlə öz işini davam etdirib. Forum çərçivəsində “Dayanıqlı regional inteqrasiya üçün halal iqtisadiyyat” mövzusunda Nazirlər Sessiyası keçirilib.

17/06/2026

17 İyun – Tibb İşçilərinin Peşə Bayramı Günüdür.

Yüksək peşəkarlıq və fədakarlıqla sağlamlığımızın keşiyində dayanan bütün tibb işçilərini peşə bayramları münasibətilə təbrik edirik.

Cəmiyyətimizin sağlamlığı naminə göstərdiyiniz əvəzsiz xidmətlərə görə Sizə təşəkkür edir, hər birinizə möhkəm cansağlığı, uğurlar və yeni nailiyyətlər arzulayırıq.

̇şçilərininpeşəbayramıgünü ̇şçilərigünü

15/06/2026

İyunun 13-də Bakıda Şimali Kipr Türk Respublikasının Mədəniyyət Günlərinin açılış mərasimi keçirilib.

Tədbirdə Şimali Kipr Türk Respublikasının Baş naziri Ünal Üstel, Baş nazirin müavini və turizm, mədəniyyət, gənclər və ətraf mühit naziri Fikri Ataoğlu və Azərbaycan Milli Məclisinin Azərbaycan-Şimali Kipr Türk Respublikası parlamentlərarası əlaqələr üzrə İşçi qrupunun sədri Cavanşir Feyziyev, Milli Məclisin Ailə, qadın və uşaq məsələləri komitəsinin sədri Hicran Hüseynova, Türkiyə Respublikasının Azərbaycandakı fövqəladə və səlahiyyətli səfiri Prof.Dr Birol Akgün, Şimali Kipr Türk Respublikasının Azərbaycandakı mümayəndəliyinin rəhbəri Ufuk Turganer, “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud, səfirliyin əməkdaşları, Azərbaycanda fəaliyyət göstərən türk iş adamları, elm və təhsil müəssisələrinin və ictimaiyyətin nümayəndələri, o cümlədən Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov və İdarə Heyətinin üzvü Seymur Bünyatov iştirak ediblər.

Tədbirdə çıxış edənlər qeyd ediblər ki, Azərbaycan ilə Şimali Kipr Türk Respublikası arasında müxtəlif sahələr üzrə fəaliyyət göstərən işçi qrupları əməkdaşlığın inkişafına əhəmiyyətli töhfə verir, mədəniyyət və incəsənət sahəsində isə birgə layihələrin həyata keçirilməsi əlaqələrin daha da möhkəmlənməsinə xidmət edir.

Sonra Şimali Kipr Türk Respublikasının incəsənətini və milli-mənəvi dəyərlərini əks etdirən musiqi nömrələri nümayiş olunub.

15/06/2026

15 İyun – Milli Qurtuluş Günüdür.

Milli Qurtuluş Günü Azərbaycanın müstəqilliyinin qorunmasının, dövlətçiliyimizin möhkəmləndirilməsinin və gələcək uğurlarımızın təməlini təşkil edən əlamətdar bir tarixdir.

Azərbaycan-Türkiyə İş Adamları Birliyi (ATİB) olaraq xalqımızı Milli Qurtuluş Günü münasibətilə təbrik edir, ölkəmizə davamlı inkişaf və rifah arzulayırıq.

14/06/2026

İyunun 11-də TÜRKPA Beynəlxalq Katibliyinin və Dünya Türk İş Şurasının (DTİK) Azərbaycandakı nümayəndəliyinin birgə təşkilatçılığı, Türkiyə Respublikasının Azərbaycandakı səfirliyinin dəstəyi ilə “DTİK Bakı Görüşü” keçirilib.

1-ci Türkoloji Qurultayın 100 illik yubileyinin qeyd olunması çərçivəsində təşkil edilən tədbir Türk dünyasının mədəni irsinin təbliği, iqtisadi əməkdaşlığa dair yanaşmanın formalaşdırılması, işgüzar əlaqələrin genişləndirilməsi, həmçinin türk dövlətləri arasında mədəni və iqtisadi inteqrasiyanın gücləndirilməsi məqsədlərini daşıyıb.

Tədbirdə türk dövlətlərinin diplomatik nümayəndəliklərinin rəhbərləri, dövlət qurumlarının nümayəndələri, Azərbaycan Respublikasında fəaliyyət göstərən türk sahibkarları və qeyri-hökumət təşkilatlarının nümayəndələri eləcə də Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov, İdarə heyətinin sədr müavini Alper Yaycılı və birliyin üzvləri iştirak ediblər.

Açılış nitqi ilə çıxış edən DTİK-in Azərbaycandakı nümayəndəliyinin rəhbəri Barış Altıparmak, TÜRKPA-nın Baş katibi Ramil Həsən və Türkiyə Respublikasının ölkəmizdəki fövqəladə və səlahiyyətli səfiri Prof. Dr. Birol Akgün çıxışlarında Türk dünyasında siyasi, iqtisadi və parlamentlərarası əməkdaşlığın gücləndirilməsinin, Türk Dövlətləri Təşkilatının strateji rolunun və ortaq dəyərlər əsasında inteqrasiyanın əhəmiyyətini vurğulayıblar.

Tədbir iştirakçıları türk dövlətləri arasında əməkdaşlığın və əlaqələrin daha da gücləndirilməsi perspektivləri ətrafında fikir mübadiləsi aparıblar.

Proqram çərçivəsində Azərbaycan bəstəkarı və pianoçu Turan Manafzadənin konserti, eləcə də rəsm sərgisi nümayiş etdirilib.

11/06/2026

9–10 iyun tarixlərində Bakıda “Beynəlxalq Maliyyə və Bankçılıq Sammiti 2026: Türk Dövlətlərinin Qlobal Maliyyə İnteqrasiyası” adlı ikigünlük beynəlxalq tədbir keçirilib.

Sammit Türkdilli Dövlətlərin Bank Assosiasiyaları Şurası, Azərbaycan Respublikasının Mərkəzi Bankı, Qazaxıstan, Qırğızıstan, Özbəkistan və Türkiyə bank assosiasiyaları, Qazaxıstan Maliyyəçilər Assosiasiyası, eləcə də digər tərəfdaş qurumların dəstəyi ilə təşkil olunub.

Tədbirdə dövlət qurumlarının, bank və maliyyə institutlarının, startapların, beynəlxalq və çoxtərəfli təşkilatların, sənaye və peşəkar assosiasiyalarının nümayəndələri, o cümlədən Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov, habelə beynəlxalq ekspertlər və media nümayəndələri iştirak ediblər.

Sammit çərçivəsində yüksək səviyyəli müzakirələr, panel sessiyaları və B2B görüşlər təşkil olunub.

Müzakirələr regional maliyyə inteqrasiyası, bankçılıqda rəqəmsal transformasiya, ödəniş və hesablaşma sistemləri, açıq bankçılıq və API ekosistemləri, süni intellekt əsaslı maliyyə həlləri, kibertəhlükəsizlik, AML/CFT, alternativ bankçılıq (o cümlədən İslam maliyyəsi), dayanıqlı maliyyə, investisiya imkanları və maliyyə savadlılığı kimi mövzuları əhatə edib.

Tədbirin əsas məqsədi Türk dövlətləri arasında maliyyə əməkdaşlığını gücləndirmək, tənzimləyici uyğunlaşmanı təşviq etmək, ödəniş sistemlərinin inteqrasiyasını inkişaf etdirmək və ortaq maliyyə baxışının formalaşdırılmasına töhfə vermək olub.

08/06/2026

08/06/2026

İyunun 5-də Gəncliyə Yardım Fondunun təşkilatçılığı ilə “Bir uşağın sabahına işıq ol!” şüarı ilə 22-ci Ənənəvi Xeyriyyə Sərgisi keçirilb.

Sərginin açılış mərasimində Türkiyə Respublikasının Azərbaycandakı Səfirliyinin müşavirləri, ictimaiyyətin və kütləvi informasiya vasitələrinin nümayəndələri, iş adamları, eləcə də Azərbaycan-Türkiyə İş Adamları Birliyinin İdarə Heyətinin sədri Mürsəl Rüstəmov iştirak ediblər.

Açılış nitqi ilə çıxış edən Gəncliyə Yardım Fondunun rəhbəri Salih Zeki Meriç, Türkiyə Respublikasının ölkəmizdəki fövqəladə və səlahiyyətli səfiri Prof. Dr. Birol Akgünün həyat yoldaşı Zöhrə Akgün, Şimali Kipr Türk Respublikasının Azərbaycandakı nümayəndəliyinin rəhbəri Ufuk Turqaner, “Bizim Ailə” jurnalının baş redaktoru Dr. Gülnarə Seyidova və Türkiyənin Azərbaycandakı Din Xidmətləri müşaviri İhsan Açık çıxışlarında Türk və Azərbaycan xalqlarının ortaq mədəniyyətində yardımlaşma, qonşuluq, həmrəylik və xeyriyyəçilik ənənələrinin mühüm yer tutduğunu vurğulayaraq, bu cür təşəbbüslərin cəmiyyətdə mərhəmət, paylaşma və sosial məsuliyyət dəyərlərinin güclənməsinə töhfə verdiyini bildiriblər.

Qeyd edək ki, Sərgidən əldə olunan vəsait valideyn himayəsindən məhrum olmuş uşaqların təhsil xərclərinə sərf ediləcəkdir.