19/10/2024
Gəncə şəhərində “Kod da Vinci” intellektual yarışı keçirildi
Gəncə şəhəri, Heydər Əliyev parkında Azərbaycan Respublikasının Gənclər Fondunun həyata keçirdiyi “İdeyanı Reallaşdır 2023” adlı müsabiqə çərçivəsində “Kod da Vinci” intellektual yarışı baş tutdu. Gəncə Dövlət Universitetinin dəstəyi ilə 50 nəfər gənc bu intellektual tədbirdə iştirak etdi.
Yarışın əsas məqsədi yalnız intellektual biliklərin yoxlanılması deyil, eyni zamanda Gəncə şəhərinin tarixi və mədəni irsinin öyrənilməsi və təbliği idi. Yarış iştirakçıları Heydər Əliyev parkında yerləşən abidə, küçə adları və digər mədəni obyektlər haqqında şifrələnmiş sualları cavablandıraraq ərazinin dərin tarixi və mədəni dəyərlərini kəşf etdilər.
Yarış 5 sualdan ibarət idi və hər bir sualda 5-6 gizli cavab şifrələnmiş şəkildə təqdim olunmuşdu. İştirakçılar məntiq və axtarış bacarıqlarından istifadə edərək bu cavabları taparaq, aparıcılara düzgün izah etməli idilər. Hər sualın doğru cavablandırılması növbəti mərhələyə keçid üçün şərt idi. Bu mərhələlər arasında əlaqə yaradılaraq yarışçılar hər sualın cavabını bir-birinə bağlamaqla uğur qazandılar.
Tədbirin sonunda 1-ci, 2-ci və 3-cü yerləri tutan iştirakçılar sertifikatlar, medallar, kuboklar və dəyərli hədiyyələrlə təltif edildilər. Yarışın bütün iştirakçıları sertifikatlarla təltif olunaraq mükafatlandırıldı. Təltifetmə mərasimi Gəncə Gənclər Evində keçirildi.
Layihənin əsas məqsədi gənclərin intellektual bacarıqlarını inkişaf etdirməklə yanaşı, onların doğma şəhərlərinin tarixi, mədəni irsi və mədəni obyektləri ilə yaxından tanış olmalarına şərait yaratmaqdır. Bu cür tədbirlər gənclərin milli dəyərlərimizə və tariximizə daha dərindən bələd olmalarına töhfə verəcəkdir.
