08/10/2026
https://www.facebook.com/share/p/1DcpruSzfp/?mibextid=wwXIfr
နှစ်ရှည်လများ အထီးကျန်ထားခဲ့တဲ့ မြန်မာစစ်ဗိုလ်ချုပ်တွေကို အမေရိကန်က တိုက်ရိုက် ဆွေးနွေးမှုတွေ စတင်
အောက်တိုဘာ ၈ - ၂၀၂၆ (ရိုက်တာသတင်းဖေါ်ပြချက်)
ထရမ့်အစိုးရဟာ စစ်တပ်က တက်လာတဲ့ မြန်မာအစိုးရနဲ့ တိုက်ရိုက် ဆွေးနွေးမှုတွေ စတင်လိုက်ပြီလို့ အမေရိကန် တာဝန်ရှိသူတွေနဲ့ ဒီအကြောင်းအရာကို သိရှိသူတွေက ပြောပါတယ်။
ဝါရှင်တန်ဟာ ၂၀၂၁ စစ်အာဏာသိမ်းပြီးနောက်ပိုင်း မြန်မာ စစ်ဗိုလ်ချုပ် တွေ ကို အထီးကျန် ထားခဲ့တာဖြစ်ပြီး အခုတော့ အံ့ဩဖွယ် ရုတ်ခြည်း ပြောင်းလဲလိုက်တာဖြစ်ပါတယ်။
အမေရိကန် နိုင်ငံခြားရေးဝန်ကြီးဌာန၊ ထောက်လှမ်းရေးနှင့် သုတေသန ဆိုင်ရာ လက်ထောက်ဝန်ကြီး မိုက်ကယ် ဗန့်စ် (Michael Vance) ဟာ ဒီ ထိတွေ့ ဆက်ဆံမှုမှာ ဦးဆောင်အခန်းကဏ္ဍ ကနေ ပါဝင်ခဲ့တာဖြစ်ပြီး၊ အမေရိကန်နိုင်ငံသားတွေကို ပစ်မှတ်ထားတဲ့ ကျားဖြန့်/ငွေလိမ် စခန်းတွေကို ပိတ်သိမ်းဖို့ အဓိကထား ဆွေးနွေးခဲ့တာဖြစ်ပေမဲ့ မြန်မာနိုင်ငံ ရဲ့ မြေရှားသတ္တု သိုက်တွေ အပါအဝင် ပိုမိုကျယ်ပြန့်တဲ့ ထိတွေ့ ဆက်ဆံမှုတွေဆီ ဦးတည် သွားနိုင်တယ်လို့ (လက်ရှိနဲ့ အငြိမ်းစား) တာဝန် ရှိသူ ခုနစ်ဦး အပါအဝင် မူဝါဒ အပြောင်းအလဲကို သိရှိသူတွေက ပြောပါ တယ်။
ဗန့်စ်ဟာ စက်တင်ဘာ ၁၅ ရက်နဲ့ ၁၆ ရက်နေ့တွေက မြို့တော် နေပြည်တော် မှာ မြန်မာခေါင်းဆောင် မင်းအောင်လှိုင်နဲ့ ဆွေးနွေးပွဲတွေမှာ ပါဝင်ခဲ့ ပါတယ်။
ဒီတွေ့ဆုံမှုဟာ အမေရိကန် စီးပွားရေးသမား အဒမ် ကက်စတီလို (Adam Castillo) လွတ်မြောက်ရေးကို အဓိက ရည်ရွယ်တာဖြစ်ပေမဲ့ နောက်ထပ် ထိတွေ့ ဆက်ဆံမှုတွေ အတွက် လမ်းစ ပွင့်သွားစေခဲ့တယ်လို့ ဒီကိစ္စကို သိတဲ့ သိရှိသူ လေးဦးက ပြောပါတယ်။
ပြီးခဲ့တဲ့လက တွေ့ဆုံမှုဟာ အာဏာသိမ်းပြီးနောက်ပိုင်း အမြင့်ဆုံးအဆင့် ထိတွေ့ ဆက်ဆံမှုဖြစ်ပြီး၊ ဒီမိုကရေစီ မြှင့်တင်ရေးထက် အပြန်အလှန် အကျိုးအမြတ် အပေါ် အခြေခံတဲ့ ထိတွေ့ ဆက်ဆံမှုဆီ ဦးတည်သွားတဲ့ ထရမ့်အစိုးရရဲ့ ပိုမိုကျယ်ပြန့်တဲ့ နိုင်ငံခြားရေး မူဝါဒ ယိမ်းယိုင်မှုကို ပေါ်လွင် စေပါတယ်။
ဩဂုတ်လကမှ နိုင်ငံခြားရေးဝန်ကြီးဌာနရဲ့ ထိပ်တန်း ထောက်လှမ်းရေး အရာရှိအဖြစ် အတည်ပြုခံခဲ့ရတဲ့ ဗန့်စ် ရဲ့ မြန်မာနိုင်ငံဆိုင်ရာ အမေရိကန် မူဝါဒမှာ ဆက်လက် ပါဝင်နေတဲ့ အခန်းကဏ္ဍကိုတော့ အရင်က သတင်းထုတ်ပြန် ထားခြင်း မရှိသေးပါ။
-
#စစ်ခေါင်းဆောင်ဟာ အမေရိကန် ပိတ်ဆို့အရေးယူမှုအောက်မှာ ဆက်ရှိနေဆဲ
စစ်တပ်ကာကွယ်ရေးဦးစီးချုပ်ဟောင်း မင်းအောင်လှိုင်ဟာ ၂၀၁၆-၂၀၁၇ အစုလိုက် အပြုံလိုက် သတ်ဖြတ်မှုတွေနဲ့ ရိုဟင်ဂျာမွတ်စလင် ရာပေါင်း များစွာကို မောင်းထုတ်ခဲ့မှု အပါအဝင် လူ့အခွင့်အရေး ချိုးဖောက်မှုတွေ ကြောင့် အမေရိကန်ရဲ့ ပိတ်ဆို့ အရေးယူမှုအောက်မှာ ဆက်ရှိနေဆဲ ဖြစ်ပြီး ဒီဖြစ်စဉ်ကို ဝါရှင်တန်က လူမျိုးတုန်း သတ်ဖြတ်မှု အဖြစ် ကြေညာထား ပါတယ်။
ဗန့်စ်ရဲ့ ခရီးစဉ်အပြီး သီးတင်းနှစ်ပတ် မပြည့်ခင်မှာပဲ မြန်မာစစ်တပ်ဟာ ရခိုင်ပြည်နယ်က လူစည်ကားရာ ဈေးတခုကို လေကြောင်းကနေ တိုက်ခိုက် ခဲ့တာကြောင့် လူ ၅၀ ကျော် သေဆုံးပြီး မြောက်မြားစွာ ဒဏ်ရာ ရရှိခဲ့တယ်လို့ ကုလသမဂ္ဂ လူ့အခွင့်အရေး တာဝန်ရှိသူတွေက ပြောပါ တယ်။
နိုင်ငံခြားရေးဝန်ကြီးဌာန ကတော့ အမေရိကန်ရဲ့ အကျိုးစီးပွားကို ထိခိုက် စေတဲ့ ကိစ္စရပ်တွေနဲ့ ပတ်သက်ပြီး မြန်မာနိုင်ငံရှိ အုပ်စုအားလုံးနဲ့ ထိတွေ့ ဆက်ဆံ နေပြီး အကြမ်းဖက်မှုတွေ ရပ်တန့်ဖို့နဲ့ နိုင်ငံရေးအကျဉ်းသား တွေကို လွှတ်ပေးဖို့ လိုအပ်ချက်တွေကို ထည့်သွင်း ပြောဆိုနေတယ်လို့ ဆိုပါ တယ်။
"ပြဿနာတွေကို လျစ်လျူရှုထားရုံနဲ့ ဖြေရှင်းလို့ မရပါဘူး။ ပြဿနာ တွေကို ဖြေရှင်းမှပဲ ရပါလိမ့်မယ်" လို့ ပြောရေးဆိုခွင့် ရှိသူ Tommy Pigott က ထုတ်ပြန်ချက်တခုမှာ ပြောကြားထားပါတယ်။
စစ်တပ်ကျောထောက်နောက်ခံပြု အစိုးရရဲ့ ပြောရေးဆိုခွင့်ရှိသူ ကတော့ မှတ်ချက်ပေးဖို့ တောင်းဆိုထားမှုကို တုံ့ပြန်ခြင်း မရှိသေးပါ။
မဲမသမာမှုကို အကြောင်းပြပြီး အာဏာသိမ်းမှုဟာ တရားဝင် ကြောင်းနဲ့ အတိုက်အခံတွေကို အကြမ်းဖက်သမားတွေ အဖြစ် တံဆိပ်ကပ်ထားတဲ့ မင်းအောင်လှိုင်ဟာ သူ့ရဲ့ အမည်ခံ အရပ်ဘက် အစိုးရ အတွက် နိုင်ငံတကာ ရဲ့ တရားဝင် အသိအမှတ်ပြုမှုကို ရှာဖွေနေတာဖြစ်ပါတယ်။
ဗန့်စ်ဟာ မြန်မာနိုင်ငံရဲ့ ရှုပ်ထွေးလှတဲ့ ပဋိပက္ခမှာ ပါဝင်နေတဲ့ အဖွဲ့အစည်း ပေါင်းစုံက အဓိကလူတွေနဲ့ တွေ့ဆုံခဲ့ပြီး မြန်မာနိုင်ငံအပေါ် ထရမ့်အစိုးရရဲ့ မူဝါဒကို ကူညီပုံဖေါ် ပေးခဲ့တာလို့ လက်ရှိနဲ့ အငြိမ်းစား တာဝန်ရှိသူ တွေက ပြောပါတယ်။
-
ဖမ်းဆီးခံ အမေရိကန်နိုင်ငံသားကိစ္စနဲ့ #လမ်းစပွင့်
မြန်မာနိုင်ငံ အမေရိကန်ကုန်သည်ကြီးများအသင်းရဲ့ ဥက္ကဋ္ဌဟောင်း ကက်စတီလိုဟာ ဇွန် ၁၁ ရက်က ရန်ကုန်လေဆိပ်မှာ မြန်မာ အာဏာပိုင်တွေ ရဲ့ ဖမ်းဆီးခြင်းကို ခံခဲ့ရတာဖြစ်ပြီး၊ ဒါဟာ လုပ်ကြံ ဖန်တီးထားတဲ့ စွပ်စွဲချက်တွေဖြစ်တယ်လို့ သူ့ကို ထောက်ခံသူတွေက ပြောကြပါတယ်။
ကက်စတီလိုဟာ မတရား ဖမ်းဆီးခံခဲ့ရတာလားဆိုတာနဲ့ ပတ်သက်လို့ အမေရိကန် အစိုးရဘက်က မှတ်ချက်ပေးထားခြင်း မရှိသေးပါဘူး။
အိမ်ဖြူတော် အမျိုးသားလုံခြုံရေးကောင်စီနဲ့ နိုင်ငံခြားရေးဝန်ကြီးဌာန တာဝန်ရှိသူတွေဟာ ကက်စတီလို လွတ်မြောက်ရေးအတွက် မြန်မာ တာဝန်ရှိသူတွေနဲ့ နောက်ကွယ် ကနေ တီးတိုးညှိနှိုင်းမှုတွေ ပြုလုပ်ခဲ့တယ် လို့ ဒီကိစ္စကို သိရှိသူတွေက ပြောပါတယ်။
တုံ့ပြန်မှု အနေနဲ့ မြန်မာဘက်က "အမေရိကန်အစိုးရနဲ့ သင့်တော်တဲ့ အဆင့် တခုမှာ တရားဝင် ထိတွေ့ ဆက်ဆံခွင့်ရဖို့" သာ တောင်းဆိုခဲ့တာလို့ တဦးက ပြောပါတယ်။
ကက်စတီလို ကတော့ သူ့ကို လွှတ်ပေးခဲ့တဲ့အတွက် သမ္မတ ဒေါ်နယ်ထရမ့် ကို ကျေးဇူးတင်ကြောင်းက လွဲရင် တခြား မှတ်ချက်ပေးဖို့ ငြင်းဆိုခဲ့ ပါတယ်။
ဒီတွေ့ဆုံမှုဟာ ဗန့်စ် ပါဝင်ခဲ့တဲ့ အမေရိကန်နဲ့ မြန်မာတာဝန်ရှိသူတွေကြား ဇွန်လတုန်းက တိုကျိုမှာ ပြုလုပ်ခဲ့တဲ့ တွေ့ဆုံမှုကို အခြေခံပြီး ဖြစ်ပေါ် လာတာလို့ လူလေးဦးက ပြောပါတယ်။
ပိတ်ဆို့အရေးယူမှုတွေကို ကြီးကြပ်တဲ့ ဘဏ္ဍာရေးဝန်ကြီးဌာန၊ ပြည်တွင်း လုံခြုံရေး ဝန်ကြီးဌာနနဲ့ ပန်တဂွန်စစ်ဌာနချုပ်က တာဝန်ရှိသူတွေလည်း ပါဝင်ခဲ့တယ်လို့ အဲဒီအထဲက တဦးက ပြောပါတယ်။
ဒီဆွေးနွေးပွဲမှာ မြန်မာဘက်က ဘယ်သူတွေ ကိုယ်စားပြု တက်ရောက် ခဲ့လဲ ဆိုတာကိုတော့ မသိရသေးပါ။
ဒုတိယသမ္မတ ဂျေဒီ ဗန့်စ် (JD Vance) ကို အာရှရေးရာ ကိစ္စတွေ အကြံပေးစဉ် ကတည်းက မြန်မာ့မူဝါဒမှာ ပါဝင်ခဲ့သူ မိုက်ကယ် ဗန့်စ်ဟာ စစ်တပ်ကို တိုက်ခိုက်နေကြတဲ့ ဒီမိုကရေစီ အတိုက်အခံတွေ၊ တိုင်းရင်းသား လက်နက်ကိုင် အဖွဲ့အစည်းတွေနဲ့လည်း လူကိုယ်တိုင်ရော အွန်လိုင်းကပါ တွေ့ဆုံခဲ့တယ်လို့ လူငါးဦးက ပြောပါတယ်။
အမေရိကန်ရဲ့ တွန်းအားပေးမှုမှာ အဓိကထားတဲ့ အချက်ကတော့ အမေရိကန် နိုင်ငံသားတွေဆီကနေ ဒေါ်လာဘီလီယံပေါင်း များစွာ လိမ်လည် လှည့်ဖြားနေတဲ့ လိမ်ညာချစ်ကြိုက်မှုနဲ့ တခြားလိမ်လည်မှုတွေ ပြုလုပ်နေတဲ့ မြန်မာနယ်မြေအတွင်းက ကျားဖြန့်/ငွေလိမ် စခန်းတွေကို ပိတ်သိမ်းနိုင်ဖို့ မြန်မာ့ အကူအညီ ရယူရေးပဲ ဖြစ်ပါတယ်။
ဒီကိစ္စကို သိရှိသူ နှစ်ဦးကတော့ ဆိုင်ဘာလိမ်လည်မှုတွေနဲ့ ပတ်သက်လို့ FBI အဖွဲ့ဟာ မြန်မာအာဏာပိုင်တွေနဲ့ တိုက်ရိုက် ထိတွေ့ ဆက်ဆံ ခဲ့တယ် လို့ ပြောပါတယ်။
ငွေလိမ်စခန်း အတော်များများကို ပြည်သူ့စစ် ထိန်းချုပ်နယ်မြေတွေ ကနေ စီမံခန့်ခွဲ နေတာဖြစ်ပြီး ရရှိလာတဲ့ ဝင်ငွေအချို့ဟာ စစ်တပ်ဆီ စီးဝင် နေတာ ကြောင့် မြန်မာခေါင်းဆောင်တွေ အနေနဲ့ နှိမ်နင်းရေး လုပ်ဆောင်ဖို့ အမှန်တကယ် ဆန္ဒရှိရဲ့လား ဆိုတာကို လေ့လာသူတွေက သံသယ ဖြစ်နေကြ ပါတယ်။
အမေရိကန် တာဝန်ရှိသူတွေဟာ လျှပ်စစ်ကားတွေနဲ့ လေအားလျှပ်စစ် တာဘိုင်တွေမှာ အသုံးပြုတဲ့ မြန်မာနိုင်ငံက မြောက်မြားစွာသော မြေရှားသတ္တုသိုက်တွေ ရယူနိုင်ရေး အတွက်လည်း ဆွေးနွေးခဲ့ကြ ပါတယ်။
အမေရိကန် တာဝန်ရှိသူတွေက အခက်အခဲတွေ ရှိနေတာကို အသိအမှတ် ပြုထားကြပါတယ် - အဓိက သတ္တုသိုက်တွေဟာ မြန်မာစစ်အစိုးရကို တိုက်ခိုက်နေတဲ့ တိုင်းရင်းသား တပ်ဖွဲ့တွေ ထိန်းချုပ်ထားတဲ့ နယ်မြေတွေ ထဲမှာ တည်ရှိနေပြီး၊ အမေရိကန်ရဲ့ ဘယ်လို ပါဝင်လာမှုကို မဆို လက်ရှိ အဓိက တင်သွင်းနေသူဖြစ်တဲ့ တရုတ်နိုင်ငံက စိန်ခေါ်မှုတခုအဖြစ် မြင်တွေ့ သွားနိုင် ပါတယ်။
ဒါပေမယ့်လည်း ဝါရှင်တန်အနေနဲ့ တရုတ်နိုင်ငံ အပေါ် မှီခိုနေရတဲ့ (မြေရှား) ထောက်ပံ့ရေး ကွင်းဆက်တွေကို ခွဲထုတ်ဖို့ ကြိုးပမ်း နေတာကြောင့် မြန်မာ့သတ္တုသိုက်တွေဟာ ဆွေးနွေးပွဲတွေမှာ မကြာခဏ ပါဝင်လာတဲ့ အကြောင်းအရာ တခုအဖြစ် ရှိနေဆဲပဲလို့ ဒီအကြောင်း သိရှိသူတွေက ပြောပါတယ်။
-
#ပိတ်ဆို့အရေးယူမှုကနေ ထိတွေ့ဆက်ဆံမှုဆီသို့
၂၀၂၁ အာဏာသိမ်းပြီးနောက်ပိုင်း သမ္မတ ဂျိုး ဘိုင်ဒင်ရဲ့ အစိုးရအဖွဲ့ဟာ နယူးယောက် Federal Reserve Bank ဘဏ်မှာရှိတဲ့ မြန်မာ့ပိုင်ဆိုင်မှု တွေကို ထိန်းချုပ်လိုက်ပြီး စစ်တပ် အရာရှိကြီးတွေနဲ့ စစ်တပ်နဲ့ ဆက်နွှယ် နေတဲ့ စီးပွားရေး လုပ်ငန်းတွေကို ပိတ်ဆို့အရေးယူမှုတွေ ပြုလုပ်ခဲ့ ပါတယ်။
၂၀၂၂ ခုနှစ်မှာ လွှတ်တော်က အတိုက်အခံတွေအတွက် အသက်အန္တရာယ် မဖြစ်စေတဲ့ အကူအညီတွေကို ခွင့်ပြုပေးခဲ့ပြီး၊ လေကြောင်းတိုက်ခိုက်မှု ကြိုတင် သတိပေးစနစ် တွေနဲ့ အရာရှိတွေ ဘက်ပြောင်းလာစေရေး ဆွဲဆောင်ဖို့တို့ အတွက် ရန်ပုံငွေ ထောက်ပံ့ပေးခဲ့ပါတယ်။
ပြီးခဲ့တဲ့နှစ်က ထရမ့်ရဲ့ နိုင်ငံခြား အကူအညီပေးရေး မူဝါဒ ပြင်ဆင် ဖွဲ့စည်းမှု အတွင်း အဲဒီအစီအစဉ် အများစုကို ဖြတ်တောက်ခဲ့တယ်လို့ လက်ရှိနဲ့ အငြိမ်းစား တာဝန်ရှိသူ လေးဦးနဲ့ လွှတ်တော်ဆီ နိုင်ငံခြားရေး ဝန်ကြီး ဌာနရဲ့ ပေးပို့စာတွေ အရ သိရပါတယ်။
စစ်အစိုးရနဲ့ ထိတွေ့ဆက်ဆံတာဟာ တခြားအဖွဲ့အစည်းတွေနဲ့ ဆက်ဆံရေး ကို လျော့နည်းသွားစေတာ မဟုတ်ဘူးလို့ နိုင်ငံခြားရေးဝန်ကြီးဌာနက ပြောပါတယ်။
အမေရိကန်ဟာ မြန်မာ စစ်တပ်ထိန်းချုပ်မှု အပြင်ဘက်က ဒေသတွေကို ကူညီ ထောက်ပံ့မှုတွေ ဆက်လက် ပေးအပ်နေတယ်လို့ ဆိုပေမဲ့ အသေးစိတ် ကိုတော့ ပြောကြားခဲ့ခြင်း မရှိပါ။
အောက်လွှတ်တော် နိုင်ငံခြားရေးရာ ကော်မတီက ဒီမိုကရက်တစ် ထိပ်တန်းအမတ် Gregory Meeks ကတော့ ဒီလိုပြောင်းလဲလိုက်တာဟာ "ကျွန်တော်တို့ရဲ့ တန်ဖိုးထားမှုတွေရော အကျိုးစီးပွားတွေနဲ့ပါ ဆန့်ကျင် နေတယ်" လို့ ပြောပါတယ်။
"လွှတ်တော်က သတ်မှတ်ထားတဲ့ ပိတ်ဆို့အရေးယူမှုတွေကို အကောင်အထည် မဖော်ဘဲနဲ့ ခွဲဝေထားတဲ့ ဒီမိုကရေစီ ရန်ပုံငွေတွေကို မသုံးစွဲဘဲ မင်းအောင်လှိုင်နဲ့ ထိတွေ့ ဆက်ဆံခြင်းအားဖြင့် နိုင်ငံခြားရေး ဝန်ကြီး မာကို ရူဘီယိုဟာ အမေရိကန်ရဲ့ ခေါင်းဆောင်မှုကို စွန့်လွှတ် လိုက်တာဖြစ်ပြီး ဒီလူသတ် စစ်အစိုးရကို ပိုမိုကြီးမားတဲ့ နိုင်ငံတကာ တရားဝင်မှုကို ပေးအပ်လိုက်တာ ဖြစ်တယ်" လို့ Meeks က ထုတ်ပြန်ချက်မှာ ပြောကြားထားပါတယ်။
လူ့အခွင့်အရေး အဖွဲ့အစည်းတွေက အတုအယောင်အဖြစ် ဝေဖန်ခဲ့ကြတဲ့ ရွေးကောက်ပွဲအပြီး တက်လာတဲ့ မြန်မာအစိုးရဟာ ဝါရှင်တန်မှာ သူတို့ အရေးကို စည်းရုံး ပြောဆိုပေးဖို့ လော်ဘီသမားတွေကို ငှားရမ်းခဲ့ပါတယ်။
ထရမ့်ရဲ့ ရေရှည်အကြံပေး ရော်ဂျာ စတုန်း (Roger Stone) ဟာ ဧပြီလမှာ မြန်မာနိုင်ငံ သတင်းအချက်အလက် ဝန်ကြီးဌာန အတွက် DCI Group ရဲ့ ကိုယ်စား အကြံပေးအဖြစ် စတင် ဆောင်ရွက်ခဲ့ကြောင်း နိုင်ငံခြား ကိုယ်စားလှယ်များ မှတ်ပုံတင်ရေး အက်ဥပဒေ (FARA) ထုတ်ပြန်ချက် တွေ အရ သိရပါတယ်။
စတုန်းဟာ ၂၀၁၆ ရွေးကောက်ပွဲမှာ ရုရှားရဲ့ စွက်ဖက်မှုအပေါ် လွှတ်တော်ရဲ့ စုံစမ်းစစ်ဆေးမှုကို ဟန့်တားနှောင့်ယှက်မှုနဲ့ ၂၀၁၉ မှာ ပြစ်ဒဏ် ချမှတ်ခြင်း ခံခဲ့ရသူပါ။
နောက်ပိုင်းမှာ ထရမ့်က သူ့ကို လွတ်ငြိမ်းချမ်းသာခွင့် ပေးခဲ့ပါတယ်။
DCI က ဖြန့်ဝေခဲ့တဲ့ ဇွန်လ သတင်းလွှာ တခုမှာ ဝါရှင်တန်အနေနဲ့ မြန်မာနိုင်ငံနဲ့ ထိတွေ့ ဆက်ဆံခြင်း မရှိပါက အရေးပါတဲ့ သတ္တုသိုက် တွေကို ရယူနိုင်ခွင့် လုံးဝ ပိတ်ပင်ခံရမယ့် အန္တရာယ်ရှိတယ်လို့ သတိပေး ထားပါတယ်။
---------------------------
THN Public Media
-
YouTube ချန်နယ်ကြည့်ပြီး ပံ့ပိုးနိုင်ပြီ
https://www.youtube.com/channel/UCuKoPNBJF5hbn0X8ASUNkHA
THN Public Media တယ်လီဂရမ်မှာ သတင်းတွေကို အချိန်နဲ့အမျှ တင်ဆက်ပေးနေပါပြီ။
https://t.me/+iFZ9Q4hyodJkNjRk
https://t.me/THNjournalist
တစ်တော့ လာပြီ
https://www.tiktok.com/?lang=en
-
ဖေ့စ်ဘွတ်မှာ Subscribe လုပ်ပြီး ပံ့ပိုးနိုင်ပြီ
https://www.facebook.com/becomesupporter/100066613536888/
--------------------------
တွစ်တာလည်း ရှိတယ် Twitter - https://twitter.com/winburmese
