14/07/2026
Hallo alle, heut bin i echt a trauriger und sogar a bissl verzweifelter Filou🐾
Mei Bericht is heut leider net lustig. 😱Was si in di letzten Tag obgspüht hat bei uns in Dogcity. So vü Hund die von ernan Privatpersonal ganz affoch aussigschmissen worn san und die dann draussen allanig auf da Strossen herumgrennt san. 😭Junge und oide Hund. War erna die Arbeit auf amoi zfü? Hams ka Zeit mehr ghabt für erna und wüittens schnö anbringen? 🤔Echt traurig. Na und ganz orm san die Hund, die zwar no daham bei ernan Personal san, oba si des Personal nimma gscheit kimman tuat um erna. Net gscheit füttern, net zum Spezialpersonal fahrt wenns krank san und sie vielleicht no irgendwo einsperrn, damits a Ruah ham von erna. Die letzten zwa was bei uns jetzta einzogn san, oiso so was hab i no net gsehn. 😱😱Moga wia a Banerhaufen, lauter nockate Stöhn auf da Haut, Kretzen, und da ane hat a ganz vapicktes Glubschi. Sowas tust ma kan Hund, oiso gor kan Lebewesen an. 😡Die tan ma sooo lad. 😭Die san zwar jetzt amoi bei uns in Dogcity und unser Personal und des SpezialpersonaI kimmat si liab um erna, oba hoffentlich miassen die net wieda zruck zu diese grauslichen Zweibeiner. I vastehs jo net warum die Grosse Zweibeinerregierung da nix gscheits macht. ☹️Wenn mia Hund was Schlimmes anstellen, werma gestraft. Solche Zweibeiner sollten a gstraft werden für des oba ganz ordentlich. 😡I tat am liabsten denan ordentlich ins Haxi beissen, besser no in alle zwa. 🤬Was denkt si so a Zweibeiner? Hat der ka Gfüh net und ka schlechts Gwissen? Warum nehmans sa si an Job bei an Hund, wenns dann so grauslich san zu erna? Und warum dauert des so lang bis solche Hund grettet wern vor so an grauslichen Personal? Traun sie die andern Zweibeiner nix sagen?
I kann euch nur ans song, wann jetzta no mehr ausgsetzte oder so vanochlässigte Hund kumman, des warat echt a Katastrophe. Mia ham echt ka anziges Appartement mehr frei. 🙈Und fast jeden Tag wü irgend a Zweibeiner sein Hund ins Tierheim bringan, weil a erm loswerden wü. oder schreibens ans Tierheim a Computernachricht, dass da Hund weg muass. Da Pumuckl hat ma dessöbe gsagt. Zweibeiner bringan enere Katzen 🐈oder die kriang junge Katzal, die irgendwo draussen gfunden worn san. 🐱🐈⬛Manche san no so klan, die kennan net amoi no fressen. Da muass des Personal dann die Katzal mit da Hand füttern. 🍼Die ham a scho boid kan Platz mehr. I kenn mi nimmer aus, warum san manche Zweibeiner so😭😭😭.
Bis morgen, euer wirklich trauriger Filou😓🐾