15/09/2026
📍 Մինչ PISA-ի արդյունքները Հայաստանում կրթության վերաբերյալ լայն քննարկումների առիթ են դարձել, մենք ցանկանում ենք այդ քննարկմանը ևս մեկ կարևոր բաղադրիչ ավելացնել՝ անկախ հետազոտության տվյալներ այն մասին, թե մեր աշխատանքում ինչն է արդյունք տալիս, և որ ուղղություններով դեռ անելիք ունենք։
2025 թվականի ապրիլին UCLA-ի CRESST հետազոտական կենտրոնը՝ ԱՄՆ-ի կրթական հետազոտությունների հեղինակավոր կառույցներից մեկը, հրապարակեց «Դասավանդի՛ր հանուն Հայաստանի» ծրագրի անկախ ուսումնասիրության արդյունքները։ Համեմատվել են մեր ծրագրում ընդգրկված 39 և 39 համադրելի դպրոցներ, որտեղ դեռ չենք աշխատում։
👉 Ի՞նչ ցույց տվեց հետազոտությունը։
Հայոց լեզվի գնահատմամբ՝ մեր ծրագրում ընդգրկված 5-րդ դասարանի աշակերտները մեկ ուսումնական տարվա ընթացքում գրանցել են նշանակալի առաջընթաց․
— ընդհանուր արդյունքը բարձրացել է 55%-ից մինչև 72%,
— գիտելիքահեն առաջադրանքների արդյունքը՝ 60%-ից մինչև 81%,
— գիտելիքի կիրառման առաջադրանքներինը՝ 58%-ից մինչև 76%։
Դասարանային դիտարկումները ցույց տվեցին նաև, որ մեր Ուսուցիչ-առաջնորդները ստեղծում են ավելի արդյունավետ ուսումնական միջավայրեր՝ ապահովելով աշակերտների ակտիվ ներգրավվածություն, համագործակցային աշխատանք, սովորածի կապ իրական կյանքի հետ և ավելի ապահով միջավայր։
Բոլոր դասարաններում աշակերտները նաև առաջընթաց են գրանցել առաջնորդական հմտությունների զարգացման մեջ՝ նպատակներ սահմանելու, հույզերը կառավարելու և սեփական համայնքում փոփոխություն ստեղծելու իրենց կարողության նկատմամբ վստահության առումով։
Միևնույն ժամանակ հետազոտությունը ցույց տվեց, թե որտեղ դեռ պետք է ավելի շատ աշխատենք՝ մասնավորապես բարձր դասարաններում քննադատական մտածողության զարգացման և տարբեր կրթական կարիքներ ունեցող աշակերտներին աջակցելու ուղղությամբ։
Այս արդյունքների հիման վրա վերանայեցինք Ուսուցիչ-առաջնորդներին տրամադրվող վերապատրաստման և քոուչինգի մոտեցումները։
Գնահատումները մեր աշխատանքի առանցքային մասն են՝ օգնելով համոզվել, որ որոշումները հիմնված են տվյալների վրա և մեզ տանում են ճիշտ ուղղությամբ։
2025–2026 ուսումնական տարվա արդյունքները ցույց են տալիս, որ առաջընթաց կա․
— աշակերտների ակադեմիական գնահատման արդյունքներն աճել են 20 տոկոսային կետով՝ 40%-ից հասնելով 60%-ի,
— գիտելիքահեն առաջադրանքների արդյունքը հասել է 76%-ի,
— մեր Ուսուցիչ-առաջնորդները Teach For All-ի արդյունավետության համաշխարհային հարցման արդյունքներով զբաղեցրել են 1-ին տեղը Եվրոպայում՝ գրանցելով 85% արդյունք՝ ցանցի 77% միջին ցուցանիշի համեմատ,
— մեր Ուսուցիչ-առաջնորդների 79%-ը, ըստ արդյունավետության ներքին գնահատման գործիքների, ցուցաբերում է բավարար կամ բարձր արդյունավետություն։
🔶 PISA-ն ցույց է տալիս Հայաստանի կրթական համակարգի մարտահրավերի մասշտաբը։ UCLA-ի հետազոտությունն օգնեց հասկանալ մեր ազդեցությունն ու բացերը, իսկ շարունակական գնահատումները՝ տեսնել, թե արդյոք մեր որոշումները մեզ տանում են ճիշտ ուղղությամբ։
Մենք չենք պնդում, որ լուծել ենք բոլոր խնդիրները։ Բայց ունենք ապացույցներ, հստակ մեթոդաբանություն և պատրաստակամություն՝ շարունակաբար սովորելու թե՛ հաջողություններից, թե՛ բացերից։
Ամբողջական հետազոտությունն այստեղ՝ https://drive.google.com/file/d/1uth-wY0eI8cTXtFxwnwZ93qqsu8TYsqp/view?usp=sharing
