04/12/2024
Հայկական Կարմիր խաչի ընկերության նախագահ
Աննա Եղիազարյանի շնորհավորական ուղերձը՝
Կամավորների միջազգային օրվա կապակցությամբ
Սիրելի կամավորներ,
Մարդկության պատմության ամենավեհ էջերը միշտ գրվել են նրանց կողմից, ովքեր անձնվիրաբար ծառայում են ուրիշներին՝ հաղթահարելով դժվարությունները և անտեսելով սեփական հարմարավետությունը: Այսօր՝ դեկտեմբերի 5-ին, կամավորների միջազգային օրվա կապակցությամբ, մենք խոնարհվում ենք աշխարհի բոլոր կամավորների անսահման նվիրումի, մարդասիրական ոգու և վսեմ արժեքների առջև:
Գրեթե 105 տարվա պատմություն ունեցող Հայկական Կարմիր խաչի ընկերության կամավորները՝ որպես մարդասիրության դեսպաններ, տարիներ շարունակ ապացուցում են, որ մարդկային համերաշխությունն ու փոխօգնությունը ամենահզոր ուժն են ցանկացած մարտահրավերի դիմակայելիս:
Ձեր գործունեության աշխարհագրությունը և բնույթը լայն են ու բազմաշերտ. լինի դա արտակարգ իրավիճակների ժամանակ արագ արձագանքում, ամենահեռավոր համայնքներում մարդասիրական օգնության բաշխում, թե սոցիալապես անապահով խմբերին սոցիալ-հոգեբանական աջակցության տրամարդում:
Դուք ամենուր եք՝ քաղաքներում և հեռավոր համայնքներում, աշխատում եք տարեցների, երեխաների, փախստականների, աղետներից տուժածների, խոցելի ընտանիքների հետ։ Ձեր մարդասիրության, եռանդի և ջերմության շնորհիվ են կյանքի կոչվում մեր բոլոր գաղափարներն ու ծրագրերը, և, ամենակարևորը, տարածվում մարդասիրական արժեքները։
Հատկապես կարևորում ենք ձեր նվիրումը վերջին տարիներին. COVID-19 համավարակի, բնական ու տեխնածին աղետների, ինչպես նաև զինված հակամարտությունների ժամանակ մեր իրականացրած արձագանքների ընթացքում, դուք եղել եք առաջին շարքերում՝ աջակցելով Հայկական Կարմիր խաչի ընկերության մարդասիրական առաքելության իրականացմանը:
Անձնական անվտանգությունից վեր դասելով հոգատարությունն ու անձնվիրությունը՝ դուք ապացուցում եք, որ մարդկային ջերմությունը և փոխօգնությունը պարզապես բառեր չեն:
Կամավորական աշխատանքը պահանջում է հսկայական ներքին ուժ, համբերություն, կարեկցանք և անսահման նվիրում: Դա ոչ թե պարզ աշխատանք է, այլ կյանքի փիլիսոփայություն, ծառայություն մարդկային արժանապատվության պաշտպանության և փոխադարձ օգնության գաղափարներին:
Հայկական Կարմիր խաչի ընկերությունը, հպարտ է իր կամավորներով: Դուք մեր ամենամեծ հարստությունն եք, մեր առաքելության կենսական ուժը: Ձեր յուրաքանչյուր գործ, յուրաքանչյուր ժպիտ, յուրաքանչյուր աջակցություն թանկ է և կարևոր այն մարդկանց համար, ում դուք օգնում եք, որովհետև բացի օգնությունից դուք նաև հույս եք բերում տառապյալներին:
Վստահ եմ, որ Ազգային ընկերության կառավարման ճգնաժամը շուտով կավարտվի, և մենք միասին նորից կլծվենք մեր շահառուներին ծառայելու նվիրական գործին:
Թող Ձեր կամավորական ոգին միշտ այրվի անշեջ լույսով, իսկ մարդասիրության դրոշը՝ բարձր պահվի մարտահրավերներով լի մեր ժամանակներում: Ձեր բարությունը, անձնվիրությունը և հավատարմությունը արժանի են ամենախորը հարգանքի և երախտագիտության:
Շնորհավոր կամավորների միջազգային օրը՝ մեր հավատարիմ և նվիրյալ կամավորներ:
