04/08/2026
✨ ՆՎԻՐՈՒՄԻ ՃԱՆԱՊԱՐՀՈՎ․ ՄԵՐ ՀՈՒԼԻՍՅԱՆ ՀՈԲԵԼՅԱՐՆԵՐԸ
💫 Զուբեյդա Մելիքյանն այն առաջամարտիկն է, ում շնորհիվ ժեստերի լեզուն հնչեղություն ու լայն տարածում է գտել մեր երկրում։
Տիկին Զուբեյդայի ղեկավարությամբ
գործող ԵՀՍԿ Ժեստերի երգի համույթն ապացուցում է, որ
երաժշտությունը դուրս է լսողական սահմաններից:
🕊️ Թանկագի՜ն տիկին Զուբեյդա, Դուք մեր սաներին ո՛չ միայն երգել եք սովորեցնում, այլև տալիս եք աշխարհի հետ սեփական լեզվով հաղորդակցվելու հնարավորություն՝ էմոցիաները և ռիթմը փոխանցելով ձեռքերով, աչքերով ու հոգով:
Մեր խորին շնորհակալությունը՝ Ձեր անմնացորդ նվիրումի, սիրո և գիտելիքը փոխանցելու պատրաստակամության համար: Դուք այն եզակի մասնագետներից եք, ում ամենօրյա վաստակը իրական ու չափելի փոփոխություն է բերում մարդկանց կյանքում։
Մաղթում ենք Ձեզ քաջառողջություն և անսպառ ուժ՝ Ձեր կարևոր առաքելության մեջ։
☀️ Էդիկ Թունյանի մանկավարժական աշխատանքը կարևոր դեր ունի մատաղ սերնդի զարգացման գործում։ Փայտարվեստի նուրբ ու բարդ գիտելիքները պատանիներին փոխանցելով՝ Էդիկը նրանց ո՛չ միայն արհեստ ու գեղարվեստական հմտություններ է սովորեցնում, այլև Հայաստանի հեռավոր շրջանում՝ ԵՀՍԿ Ստեփանավանի մասնաճյուղում տղաների համար ապահովում է որակյալ կրթություն և իմաստալից զբաղվածություն։
✨ Սիրելի՜ Էդիկ, Ձեր բացառիկ պատասխանատվությունը, կազմակերպչական ձիրքն ու անհատական մոտեցումը տղաներին կենտրոնացնելու, ոգեշնչելու և միավորելու լավագույն գրավականն են։ Ինչպես շախմատային տախտակի առջև, այնպես էլ կյանքում Դուք յուրաքանչյուր քայլ կշռադատում եք իմաստնությամբ ու հեռատեսությամբ՝ երեխաների համար դառնալով աշխատասիրության և արժանապատվության կենդանի օրինակ։
Շնորհակալություն ենք հայտնում՝ Ձեր նվիրումի, լայնասիրտ մարդկային տեսակի և մեր սաների կյանքում ունեցած լուսավոր դերի համար։ Մաղթում ենք Ձեզ ամուր առողջություն, անսպառ էներգիա և միայն հաղթանակներ՝ ինչպես շախմատի տախտակին, այնպես էլ՝ կյանքի բոլոր պարտիաներում։
🌸 Սյուզաննա Շահինյանը ԵՀՍԿ մեծ ընտանիքի այն նվիրված ու պրպտող մանկավարժներից է, ում պատասխանատվությունն ու նախաձեռնողականությունը ջերմ ու ստեղծագործ մթնոլորտ են ստեղծում կենտրոնում։ Նա կարողանում է արագ շահել երեխաների վստահությունը և բացահայտել յուրաքանչյուրի ներուժը։
Մեր սաների ակնհայտ առաջընթացը ասեղնագործության նուրբ արվեստի ու հայկական նախշակարերի ոլորտում լավագույնս է վկայում մանկավարժի բարձր պրոֆեսիոնալիզմի և անվերապահ նվիրումի մասին։
✨ Շնորհակալ ենք, սիրելի՛ Սյուզաննա, ԵՀՍԿ Ստեփանավանի մասնաճյուղում իրականացվող որակյալ աշխատանքի և մեր կենտրոնի առաքելությանը հավատարիմ մնալու համար։ Մաղթում ենք Ձեզ ստեղծագործական անսպառ ներշնչանք և նորանոր ձեռքբերումներ։
☀️ Ջեմմա Սահակյանի աշխատանքը ԵՀՍԿ Գյումրու մասնաճյուղում հատուկ ձեռագիր ունի: Նա այն մանկավարժներից է, ում հաջողվում է ներդաշնակորեն համատեղել ներքին հանդարտությունն ու անսպառ էներգիան՝ պարի աշխարհում երեխաների համար դառնալով վստահելի ու սիրելի ուղեցույց։
Ջեմմայի նրբանկատ վերաբերմունքն ու համբերատարությունը պարի պարապմունքները դարձնում են հաճելի ու սպասված, իսկ փոխանցած ջերմությունը մեր սաներին տալիս է ազատ ստեղծագործելու և ինքնավստահ դառնելու բանալին։
🌸 Սիրելի՜ Ջեմմա, Դուք ո՛չ միայն շարժում ու ռիթմ եք սովորեցնում մեր սաներին, այլև ձևավորում եք արվեստի ու կյանքի նկատմամբ սեր։ Շնորհակալ ենք՝ Ձեր նվիրվածության, բարության և ԵՀՍԿ Գյումրու մեր սաների կյանքում ունեցած գեղեցիկ դերի համար։ Մաղթում ենք Ձեզ անսպառ ներշնչանք և լուսավոր ժպիտներ:
✨ Նարինե Ենգոյանի ներկայությունը ԵՀՍԿ Գյումրու մասնաճյուղում յուրահատուկ կոլորիտ ու կենդանություն է հաղորդում ստեղծագործական աշխատանքին։ Նարինեն վարպետորեն համադրում է մասնագիտական խստապահանջությունն ու անսպառ կենսուրախությունը՝ երգի համույթում ապահովելով բարձր որակ և միևնույն ժամանակ դասապրոցեսը լցնելով ուրախությամբ ու ժպիտներով։ Նրա յուրահատուկ հումորն ու դրական էներգիան ոգեշնչում են սաներին և երգի փորձը դարձնում սպասված իրադարձություն։
🌸 Սիրելի՜ Նարինե, շնորհակալ ենք՝ երեխաների միջավայրում երգն ու լույսը վառ պահելու, Ձեր անմիջականությամբ մեր սաներին ոգեշնչելու և նրանցից յուրաքանչյուրի երաժշտական պոտենցիալը բացահայտելու համար։ Մաղթում ենք Ձեզ անսպառ ներշնչանք և անընդհատ հաջողություն:
#ԵրեխաներիՀատուկՍտեղծագործականԿենտրոն #ԱմսվաՀոբելյարները #ՇնորհակալԵնք #ԵՀՍԿ #ԱրվեստիԿրթություն
