10/06/2026
«Իրավական նախաձեռնությունների կենտրոն» ՀԿ-ն մեկնարկել է «Գենդերազգայուն պատրաստվածություն՝ ի նպաստ քրեական արդարադատությանն առնչվող կանանց պաշտպանության և բարեկեցության» ենթադրամաշնորհային ծրագրի իրականացումը։
Նպատակն է բարելավել քրեական արդարադատությանն առնչվող կանանց իրավունքների պաշտպանությունը և բարեկեցությունը Հայաստանի քրեակատարողական համակարգում՝ նրանց հետ աշխատող մասնագիտական խմբերի իրազեկվածության բարձրացման, գենդերազգայուն վերապատրաստման և մասնագիտական դիմակայունության ամրապնդման միջոցով։
Ծրագրին մասնակցում են քրեակատարողական և պրոբացիայի ծառայողներն ու աշխատողները։
Դասընթացների ժամանակ մասնակիցները քննարկել են մասնագիտական այրումը, դրա ճանաչման և կանխարգելման մեխանիզմները, ինքնախնամքի ռազմավարությունները և հոգեբանական հիգիենան, սթրեսի կառավարումը, հուզական դիմակայունությունն ու ինքնակարգավորումը, թիմային աջակցությունը, սուպերվիզիան և փոխվստահելի մասնագիտական միջավայրի ձևավորումը։
Մասնակիցներին ներկայացվել են նաև կանանց կողմից հանցագործությունների կատարման սոցիալական և ինստիտուցիոնալ պատճառները (աղքատություն, բռնություն, խնամքի բեռ, խտրականություն), կանանց պատժի կրման առանձնահատկությունները (մայրություն, ընտանիքի հետ կապ, խնամքի պատասխանատվություն և այլն), երկրորդային վիկտիմիզացիայի կանխարգելման և անվտանգ միջավայրի ձևավորման սկզբունքները, նախկինում վերապրած բռնության ազդեցությունը կանանց վարքագծի և հոգեբանական վիճակի վրա, տրավմա-ինֆորմացված մոտեցումները կանանց հետ աշխատանքում, ինչպես նաև գենդերին, գենդերային կարծրատիպերին, գենդերազգայուն հաղորդակցությանը և անհատականացված աշխատանքին վերաբերող թեմաներ։
Տեսական գիտելիքից բացի դասընթացները հագեցած են եղել թիմային խաղերով, ինտերակտիվ վարժություններով, գործնական առաջադրանքներով և դեպքերի քննարկումներով, որոնք նպաստել են մասնակիցների ակտիվ ներգրավվածությանը, միջմասնագիտական համագործակցության ամրապնդմանը, փոխըմբռնման և վստահության մթնոլորտի ձևավորմանը։ Դասընթացները նաև հնարավորություն են տվել մասնակիցներին բաց քննարկել իրենց աշխատանքային փորձը, վեր հանել համակարգային մի շարք խնդիրներ, փոխանակվել արդյունավետ գործելակերպերով և համատեղ որոնել դրանց հաղթահարման հնարավոր ուղիները։
Դասընթացն իրականացվել է «Իրավական նախաձեռնությունների կենտրոն» ՀԿ-ի կողմից, Women's Fund Armenia - Հայաստանում կանանց հիմնադրամ -ի ֆինանսական աջակցությամբ, ՀՀ ԱՆ Իրավական կրթության և վերականգնողական ծրագրերի իրականացման կենտրոն ՊՈԱԿ-ի հետ համագործակցությամբ
