Հայաստանի Համայնքների Միություն / Union of Communities of Armenia

29/09/2026

📢 Եվրոպական տարածաշրջանների կոմիտեն (European Committee of the Regions, CoR)՝ Արևելյան գործընկերության տարածաշրջանային և տեղական իշխանությունների համաժողովի (CORLEAP) միջոցով, և Հայաստանի համայնքների միությունը իրականացնում են Արևելյան գործընկերության՝ տեղական և տարածաշրջանային մակարդակներում հանրային կառավարման ակադեմիայի (EPA) առցանց կրթական ծրագիրը։

Ծրագիրը նախատեսված է Հայաստանի տեղական ինքնակառավարման ոլորտի աշխատակիցների և պաշտոնյաների համար։

📚 Մեկ կիսամյակի ընթացքում նախատեսվում է 6 առցանց հանդիպում, որոնց ընթացքում ԵՄ կառույցների և ակադեմիական ոլորտի փորձագետները կներկայացնեն տարբեր թեմաներ, ինչպես նաև ԵՄ քաղաքների և տարածաշրջանների փորձն ու կիրառվող լուծումները։

Մասնակիցները հնարավորություն կունենան ԵՄ կառույցների ներկայացուցիչներից տեղեկանալու Եվրոպական միության, կառավարման և ֆինանսավորման հնարավորությունների մասին, ծանոթանալու ԵՄ քաղաքների և տարածաշրջանների փորձին, կապեր հաստատելու Արևելյան գործընկերության երկրների գործընկերների հետ։

25/09/2026

24/09/2026

Երևանի քաղաքապետի տեղակալ Լևոն Հովհաննիսյանը քաղաքապետարանում հյուրընկալել է Հայաստանի համայնքների միության գլխավոր տնօրեն Արմեն Հարությունյանին և SALAR International-ի ներկայացուցիչներին։

Հանդիպմանը մասնակցել է նաև Երևանի քաղաքապետարանի աշխատակազմի հանրակրթության վարչության պետի ժամանակավոր պաշտոնակատար Կարինե Կոստանյանը։

Հանդիպման ընթացքում քննարկվել են Հայաստանում ֆիսկալ ապակենտրոնացման գործընթացին, համայնքների ֆինանսական կարողությունների ամրապնդմանը, ինչպես նաև համայնքային կրթության զարգացմանն առնչվող հարցեր։

Առանձին անդրադարձ է կատարվել կրթության ոլորտում իրականացվող և նախատեսվող նախաձեռնություններին, դրանց զարգացման հնարավորություններին, ինչպես նաև համայնքային մակարդակում կրթական ծրագրերի արդյունավետ իրականացմանը։ Կողմերը մտքեր են փոխանակել այս ուղղությամբ փորձի փոխանակման և համագործակցության հնարավորությունների շուրջ։

Քննարկվել են նաև ֆիսկալ ապակենտրոնացման ուղղությամբ իրականացվող աշխատանքները, տեղական ինքնակառավարման մարմինների կարողությունների զարգացումն ու մասնագիտական գիտելիքների և հմտությունների շարունակական կատարելագործման կարևորությունը։

Հանդիպման ավարտին կողմերը կարևորել են Երևանի քաղաքապետարանի, Հայաստանի համայնքների միության և SALAR International-ի միջև շարունակական համագործակցությունն ու համատեղ նախաձեռնությունների իրականացումը՝ տեղական ինքնակառավարման համակարգի զարգացմանն աջակցելու նպատակով։

24/09/2026

Հայաստանի համայնքների միության գլխավոր տնօրեն Արմեն Հարությունյանը Միության գրասենյակում հյուրընկալել է SALAR International-ի գործընկերներին։

Հանդիպման ընթացքում քննարկվել են Միության և SALAR International-ի միջև համագործակցության ընթացքն ու հետագա զարգացման հեռանկարները, ինչպես նաև ֆիսկալ ապակենտրոնացման ուղղությամբ իրականացվող աշխատանքներին առնչվող մի շարք ընթացիկ հարցեր։

Կողմերը մտքեր են փոխանակել ֆիսկալ ապակենտրոնացման գործընթացի առաջընթացի, համայնքների ֆինանսական կարողությունների ամրապնդման և տեղական ինքնակառավարման համակարգի զարգացմանն ուղղված հետագա քայլերի շուրջ։

Հանդիպման ընթացքում ընդգծվել է շարունակական համագործակցության և փորձի փոխանակման կարևորությունը՝ Հայաստանում առավել արդյունավետ և ֆինանսապես կայուն տեղական ինքնակառավարման համակարգի ձևավորմանն աջակցելու նպատակով։

23/09/2026

Հայաստանի համայնքների միության գլխավոր տնօրեն Արմեն Հարությունյանը սեպտեմբերի 22-ին մասնակցել է «Համայնքների հզորացման ճանապարհը․ հիմնական արդյունքները, ապակենտրոնացման բարեփոխումների առաջընթացն ու հեռանկարները Հայաստանում» խորագրով միջոցառմանը։

Միջոցառումն ամփոփել է 2022 թվականի սեպտեմբերից մինչև 2026 թվականի սեպտեմբերն իրականացված «ԴեաԼոԳ» ծրագրի հիմնական արդյունքներն ու ձեռքբերումները՝ միաժամանակ հնարավորություն ստեղծելով քննարկելու Հայաստանում ապակենտրոնացման բարեփոխումների ընթացքը, առկա մարտահրավերներն ու հետագա անելիքները։

Արմեն Հարությունյանը մասնակցել է «Պահպանելով բարեփոխումների սլացքը» խորագրով պանելային քննարկմանը, որի ընթացքում անդրադարձ է կատարվել իրականացված բարեփոխումների շարունակականության ապահովմանը, տեղական ինքնակառավարման համակարգի հետագա զարգացմանը և համայնքների կարողությունների ամրապնդմանը։

Քննարկման ընթացքում կարևորվել է պետական կառույցների, տեղական ինքնակառավարման մարմինների, համայնքները ներկայացնող կազմակերպությունների և միջազգային գործընկերների միջև շարունակական համագործակցությունն ու երկխոսությունը՝ ապակենտրոնացման օրակարգն առաջ մղելու և համայնքների դերն ու կարողությունները հետևողականորեն ամրապնդելու նպատակով։

Միջոցառմանը մասնակցել են ՀՀ պետական կառույցների, համայնքների, Հայաստանի համայնքների միության, զարգացման գործընկեր կազմակերպությունների, SALAR International-ի, Հայաստանում Շվեդիայի Թագավորության դեսպանության և այլ շահագրգիռ կառույցների ներկայացուցիչներ։

«ԴեաԼոԳ» ծրագիրն իրականացվել է SALAR International-ի կողմից՝ կենտրոնանալով Հայաստանում տեղական ինքնակառավարման զարգացման, ապակենտրոնացման գործընթացների և պետական ու տեղական մակարդակների միջև արդյունավետ երկխոսության խթանման վրա։

17/09/2026

Հայաստանի համայնքների միության գլխավոր տնօրեն Արմեն Հարությունյանը հանդիպում է ունեցել Համաշխարհային բանկում՝ Համաշխարհային բանկի հանրային հատվածի հաշվառման և հաշվետվողականության (PULSAR) ծրագրի ղեկավար և Հանրային ծախսերի կառավարման գործընկերային ուսուցման (PEMPAL) ծրագրի առաջատար Արման Վաթյանի և Երևանի քաղաքապետարանի ֆինանսական վարչության պետի տեղակալ Նարեկ Մինասյանի հետ։

Հանդիպման հիմնական թեման էր արհեստական բանականության (AI) գործիքների կիրառման հնարավորությունների քննարկումը տարբեր տեսակի հաշվետվությունների պատրաստման, մշակման և վերլուծության գործընթացներում։

Քննարկման ընթացքում անդրադարձ է կատարվել ֆինանսական և վարչական գործընթացներում արհեստական բանականության գործիքների ներդրման հնարավորություններին։ Մասնավորապես, քննարկվել են մեծածավալ տվյալների մշակման, անհրաժեշտ տեղեկատվության համակարգման, հաշվետվությունների նախապատրաստման և տվյալների վերլուծության գործընթացների առավել արդյունավետ կազմակերպման հնարավորությունները։

Հանդիպման ընթացքում քննարկվել է նաև արհեստական բանականության գործիքների կիրառման գործընթացը նախևառաջ Երևանից սկսելու գաղափարը՝ որպես հետագայում այլ համայնքներում նմանատիպ լուծումների ներդրման հնարավոր փորձնական և կիրառական հիմք։

Մասնակիցները կարևորել են ժամանակակից թվային լուծումների կիրառումը համայնքային կառավարման և ֆինանսական հաշվետվողականության գործընթացների բարելավման համատեքստում։ Արհեստական բանականության ճիշտ և նպատակային կիրառումը կարող է նպաստել ժամանակի խնայողությանը, տվյալների ավելի արագ և համակարգված մշակմանը, ինչպես նաև հաշվետվությունների պատրաստման գործընթացների օպտիմալացմանը։

09/09/2026

Հայաստանի համայնքների միության գլխավոր տնօրեն Արմեն Հարությունյանը և «Հայաստանի վերականգնվող էներգետիկայի և էներգախնայողության» հիմնադրամի տնօրեն Կարեն Ասատրյանը առցանց հանդիպում են կազմակերպել Հայաստանի համայնքների ղեկավարների հետ՝ քննարկելու էներգաարդյունավետության, էներգախնայողության և վերականգնվող էներգետիկայի ոլորտներում համատեղ իրականացվելիք ծրագրերն ու նախաձեռնությունները։

Հանդիպման ընթացքում ներկայացվել են համայնքների համար նախատեսվող հնարավորությունները, ինչպես նաև այն ուղղությունները, որոնց շրջանակում Հայաստանի համայնքների միությունը և «Հայաստանի վերականգնվող էներգետիկայի և էներգախնայողության» հիմնադրամը պատրաստվում են համատեղ աջակցություն ցուցաբերել համայնքներին։

Հիշեցնենք, որ «Հայաստանի համայնքների միություն» հասարակական կազմակերպությունը և «Հայաստանի վերականգնվող էներգետիկայի և էներգախնայողության» հիմնադրամը համագործակցության հուշագիր են կնքել՝ Հայաստանի համայնքներում էներգաարդյունավետության, էներգախնայողության և վերականգնվող էներգետիկայի զարգացմանն ու կիրառմանը նպաստելու նպատակով։

Հանդիպման ընթացքում Արմեն Հարությունյանը ևս մեկ անգամ ընդգծել է Հայաստանի համայնքների միության պատրաստակամությունը՝ աջակցելու համայնքներին իրենց խնդիրների և կարիքների լուծման հարցում։ Նա համայնքների ներկայացուցիչներին կոչ է արել ներկայացնել առկա խնդիրներն ու առաջարկները, որպեսզի հնարավոր լինի համապատասխան աջակցություն ցուցաբերել և համատեղ գտնել արդյունավետ լուծումներ։

«Հայաստանի համայնքների միությունը բաց է համայնքների հետ համագործակցության համար և պատրաստ է աջակցել ցանկացած հնարավոր ձևով։ Կարևոր է, որ համայնքները ներկայացնեն իրենց խնդիրներն ու կարիքները, որպեսզի կարողանանք դրանք քննարկել և հնարավորության սահմաններում աջակցել դրանց լուծմանը»,– նշել է Արմեն Հարությունյանը։

03/09/2026

📍«Հայաստանի համայնքների միություն» հասարակական կազմակերպությունը և «Հայաստանի վերականգնվող էներգետիկայի և էներգախնայողության» հիմնադրամը համագործակցության հուշագիր են կնքել՝ Հայաստանի համայնքներում էներգաարդյունավետության, էներգախնայողության և վերականգնվող էներգետիկայի զարգացմանն ու կիրառմանը նպաստելու նպատակով։

Համագործակցության հիմքում համայնքներին ժամանակակից էներգետիկ լուծումների ներդրման գործում աջակցելու, նրանց մասնագիտական և ինստիտուցիոնալ կարողությունները զարգացնելու և կայուն էներգետիկ զարգացմանը նպաստող ծրագրերի իրականացումը խթանելու ընդհանուր նպատակն է։

Հուշագրի շրջանակում կողմերը նախատեսում են համատեղ աշխատել համայնքների ղեկավարների, աշխատակիցների և ոլորտային մասնագետների իրազեկվածության բարձրացման ուղղությամբ՝ ներկայացնելով վերականգնվող էներգետիկայի, էներգաարդյունավետության և էներգախնայողության ոլորտներում առկա հնարավորությունները։

Առանձնահատուկ ուշադրություն է դարձվելու համայնքներին անհրաժեշտ տեղեկատվության տրամադրմանը՝ հնարավոր ծրագրերի, ֆինանսավորման աղբյուրների, ներդրումային գործիքների և աջակցության մեխանիզմների վերաբերյալ։ Սա հնարավորություն կտա համայնքներին ավելի արդյունավետ գնահատել իրենց էներգետիկ կարիքները, բացահայտել զարգացման հնարավորությունները և մասնակցել համապատասխան ծրագրերի մշակման ու իրականացման գործընթացներին։

Համագործակցության կարևոր ուղղություններից են նաև համատեղ հանդիպումների, քննարկումների, խորհրդատվական և տեղեկատվական միջոցառումների կազմակերպումը։ Դրանց միջոցով նախատեսվում է ձևավորել փորձի և գիտելիքի փոխանակման հարթակներ, որտեղ համայնքները, ոլորտի մասնագետներն ու այլ շահագրգիռ կողմերը կկարողանան քննարկել առկա խնդիրները, ներկայացնել լուծումներ և ձևավորել նոր նախաձեռնություններ։

Կողմերը նախատեսում են նաև համագործակցել համայնքների կարիքների գնահատման և էներգետիկ զարգացման ներուժի բացահայտման ուղղությամբ։ Այդ աշխատանքը կարող է հիմք հանդիսանալ համայնքների առանձնահատկություններին համապատասխան էներգաարդյունավետության և վերականգնվող էներգետիկայի ծրագրերի մշակման համար։

Հուշագրով նախատեսվում է նաև համատեղ առաջարկությունների, ծրագրերի և նախաձեռնությունների մշակում՝ ուղղված համայնքներում էներգետիկ արդյունավետության բարձրացմանը, էներգախնայողության խթանմանը և վերականգնվող էներգիայի աղբյուրների կիրառման ընդլայնմանը։

«Հայաստանի համայնքների միություն» ՀԿ-ի և «Հայաստանի վերականգնվող էներգետիկայի և էներգախնայողության» հիմնադրամի համագործակցությունը միտված է երկարաժամկետ և փոխշահավետ գործընկերության ձևավորմանը՝ համայնքներին հասանելի դարձնելով նոր գիտելիք, փորձագիտական աջակցություն, տեղեկատվություն և էներգետիկ զարգացման հնարավորություններ։

Այս համագործակցության միջոցով կողմերը նպատակ ունեն նպաստելու Հայաստանի համայնքների ավելի կայուն, արդյունավետ և ժամանակակից էներգետիկ համակարգերի ձևավորմանը՝ խթանելով էներգախնայողության մշակույթը և վերականգնվող էներգետիկ լուծումների կիրառումը համայնքային մակարդակում։

25/08/2026

📍Ավարտվել է «Երկխոսություն Հայաստանի համայնքների հետ․ Ֆիսկալ ապակենտրոնացումը և քաղաքականության բարեփոխումը» խորագրով տարածաշրջանային աշխատաժողովների հնգօրյա շարքը, որն անցկացվել է Գորիսում, Դիլիջանում, Աղվերանում և Ապարանում։

Աշխատաժողովները համատեղ կազմակերպվել են Հայաստանի համայնքների միության և ՍԱԼԱՐ Ինթերնեշնլի կողմից՝ «Աջակցություն Հայաստանում ապակենտրոնացման և տեղական ինքնակառավարման բարեփոխումներին» (ԴեաԼոԳ) ծրագրի շրջանակում։

Հնգօրյա հանդիպումների ընթացքում աշխատանքներին մասնակցել են Հայաստանի Հանրապետության բոլոր համայնքների ներկայացուցիչները, ինչը հնարավորություն է տվել ձևավորել համայնքների լայն մասնակցությամբ քննարկման և փորձի փոխանակման միասնական հարթակ։

Աշխատաժողովների հիմնական նպատակն էր ԴեաԼոԳ ծրագրի շրջանակում մշակված ֆիսկալ ապակենտրոնացման առկա իրավիճակի և բացերի վերլուծության քննարկումը, հավաստումն ու համալրումը՝ համայնքների հետ անմիջական երկխոսության միջոցով։

Քննարկումների ընթացքում մասնակիցները ներկայացրել են իրենց համայնքների փորձը և դիտարկումները՝ տեղական հարկերի, տրանսֆերտների, տեղական մակարդակում հանրային ֆինանսների կառավարման, ինչպես նաև տարբեր լիազորությունների իրականացման վերաբերյալ։

Հինգ օրերի ընթացքում Գորիսում, Դիլիջանում, Աղվերանում և Ապարանում անցկացված հանդիպումները հնարավորություն տվեցին ոչ միայն քննարկել առկա խնդիրներն ու մարտահրավերները, այլև համայնքներից ստանալ գործնական առաջարկներ և առաջնահերթություններ։

Աշխատաժողովների արդյունքում ձևավորվել են բարեփոխումների «ներքևից վերև» մոտեցմամբ համատեղ առաջնահերթություններ, որոնք կարևոր հիմք կհանդիսանան ֆիսկալ ապակենտրոնացման ճանապարհային քարտեզի մշակման համար։

Համայնքների ներկայացուցիչների ակտիվ մասնակցությունն ու անմիջական փորձի ներկայացումը կարևոր քայլ են՝ ապահովելու, որ առաջիկա բարեփոխումները համապատասխանեն համայնքների իրական կարիքներին և նպաստեն դրանց ֆինանսական ինքնուրույնության, պատասխանատվության ու կառավարման կարողությունների ամրապնդմանը։
Ֆիսկալ ապակենտրոնացման ճանապարհային քարտեզը նախատեսվում է Կառավարության քննարկմանը ներկայացնել սեպտեմբերին։

18/08/2026

Հայաստանի համայնքների միության գլխավոր տնօրեն Արմեն Հարությունյանը մասնակցել է «Երկխոսություն Հայաստանի համայնքների հետ․ Ֆիսկալ ապակենտրոնացումը և քաղաքականության բարեփոխումը» տարածաշրջանային աշխատաժողովին։ Միջոցառումը համատեղ կազմակերպվել է Հայաստանի համայնքների միության և ՍԱԼԱՐ Ինթերնեշնլի կողմից՝ «Աջակցություն Հայաստանում ապակենտրոնացման և տեղական ինքնակառավարման բարեփոխումներին» (ԴեաԼոԳ) ծրագրի շրջանակում։

Ելույթ ունենալով աշխատաժողովի ընթացքում՝ Արմեն Հարությունյանն ընդգծել է․ «Ուժեղ և ֆինանսապես ինքնուրույն համայնքները ժամանակակից, ժողովրդավարական պետության հիմնասյունն են, իսկ ֆիսկալ ապակենտրոնացումը լոկ վարչական բարեփոխում չէ, այլ համայնքային կյանքի որակի, տեղական ինքնակառավարման արդյունավետության և բնակիչների բարեկեցության բարձրացման ուղիղ ճանապարհը։ Մենք պետք է ապահովենք, որ յուրաքանչյուր համայնք ունենա բավարար ֆինանսական ռեսուրսներ, ինքնուրույնություն և գործիքակազմ՝ սեփական առաջնահերթություններն ու զարգացման ծրագրերը արդյունավետորեն կյանքի կոչելու համար։ Միայն համայնքային մակարդակում իրական պատասխանատվություն և ֆինանսական անկախություն ձևավորելով կարող ենք հասնել երկրի համաչափ ու կայուն զարգացմանը»։

Աշխատաժողովի հիմնական նպատակն է ԴեաԼոԳ ծրագրի շրջանակում մշակված ֆիսկալ ապակենտրոնացման առկա իրավիճակի և բացերի վերլուծության քննարկումը, հավաստումն ու համալրումը՝ համայնքների հետ ուղղակի երկխոսության միջոցով։ Քննարկումները հենվել են տեղական հարկերի, տրանսֆերտների, տեղական մակարդակում հանրային ֆինանսների կառավարման և տարբեր լիազորությունների իրացման հետ կապված մասնակիցների անմիջական փորձի վրա։

Հինգ օր տևողությամբ այս աշխատաժողովին մասնակցում են Հանրապետության բոլոր համայնքների ներկայացուցիչները։ Այս լայնամասշտաբ հարթակը հնարավորություն է տվել ձևավորելու բարեփոխումների «ներքևից վերև» համատեղ առաջնահերթություններ՝ ամրապնդելով համայնքային մասնակցությունն ու պատասխանատվությունը Ֆիսկալ ապակենտրոնացման ճանապարհային քարտեզի մշակման գործում, որը Կառավարության քննարկմանը կներկայացվի սեպտեմբերին։