«Ծնողական Համայնք» Հանուն Երեխաների Բարեկեցության հասարակական կազմակերպությունը Հայաստանում բնակվող ծնողներին միավորող կառույց է, որն իրականացնում է շահերի պաշտպանության գործողություններ հանուն երեխայակենտրոն և ընտրանիքակենտրոն որոշումների կայացման և վարքագծի դրսևորման: Կառույցն իր առջև նպատակ է դրել մոբիլիզացնել և հզորացնել ծնողական համայնքի ակտիվ դերակատարներին, ոչ ֆորմալ խմբերին և ծնողներին միա
վորող կառույցներին, նպաստել ծնողավարման բավարար մակարդակի գիտելիքներով և հմտություններով օժտված ծնողական հանրույթի ձևավորմանը:
ՀԿ-ն 2022-2023 թթ. իր գործունեության նպատակ է սահմանել երեխաների համար պետական և համայնքային կրթական կառույցներում սանիտարահիգիենիկ նորմերին համապատասխան ջուր խմելու հնարավորության և խմելու ջրի առկայության խնդրակազմն ընդունել որպես առաջնահերթ և ռազմավարական կարևորություն ունեցող խնդիր:
Պետական և համայնքային կրթական կառույցների մեծ մասում խմելու ջրի հասանելիությունը դեռևս խորհրդային ժամանակների քաղաքաշինության նորմերից բխող մոտեցումներով և ենթակառուցվածքային լուծումներով է, ըստ որոնց խմելու ջրի հասանելիությունն ապահովվել է հիմնականում սանհանգույցներում տեղադրված ծորակների և մասնակիորեն՝ խոհանոցային կամ մերձ սանհանգույցային տարածքներում տեղադրված, բարոյապես և ֆիզիկապես մաշված կոնտակտային հին ծորակներով: Դպրոցներին և այլ կրթական կառույցներին մոտ տարածքներում հաճախ, հիմնականում մասնավոր միջոցներով, տեղադրվել են ցայտաղբյուրներ, հուշաղբյուրներ, որոնք սակայն, ելնելով Հայաստանի ողջ տարածքի կլիմայական առանձնահատկություններից, ունեն սեզոնային բնույթ, իսկ նրանց մի ստվար մասը ջրի բաշխման օպերատորի վարած քաղաքականության արդյունքում, պարզապես անջատվել են ջրի բաշխիչ ցանից, կամ գործում են մասնակի:
Արդյունքում երեխաներից շատերը կրթական գործընթացի ընթացքում խուսափում են այդպիսի միջավայրերից ջուր խմել և հագեցնել իրենց ծարավը կամ ստիպված են իրենց հետ անհրաժեշտ ջուր ունենալ՝ լրացուցիչ և դպրոցական նորմաներում չհաշվառված բեռ ավելացնելով իրենց պայուսակներին: Սա հիմնականում պրակտիկա է դարձել մանկական տարիքի աշակերտների համար, երբ ծնողներին խորհուրդ է տրվում ջուր դնել երեխաների հետ: Պատանեկան տարիքի աշակերտները հիմնականում խուսափում են իրենց հետ ջուր վերցնել և նախընտրում են ծարավը հագեցնել դպրոցի տարածքից դուրս կամ պարզապես ծարավ մնալ մինչև դասերի ավարտը:
Այսպիսով, Ծնողական Համայնք հասարակական կազմակերպությունը կոչ է անում ծնողներին, ծնողական և երեխաների պաշտպանության կառույցներին, դպրոցական խորհուրդներին և պատասխանատու կառույցներին միավորել ջանքերը և՝
• Իրականացնել բազմաշերտ հետազոտություն ՀՀ կրթական հաստատություններում ջուր խմելու հնարավորությունների առկայության և սահամանափակումների ամբողջական խնդրակազմերը և ծավալները պարզելու նպատակով,
• Ուսումնասիրել սույն խնդրակազմի պարագայում երեխաների մոտ ջրի օգտագործման պակասով պայմանավորված ռիսկերը և դրա վերաբերյալ հանրային իրազեկվածության բարձրացմանն ուղղված գործողություններ իրականացնել,
• Մոբիլիզացնել բոլոր շահագրգիռ կողմերի ջանքերը խնդրի հրատապ լուծման գործում պետական և համայնքային կառույցների հետ շահերի պաշտանության և լոբբինգ գործողությունների իրականացման անհրաժեշտության հարցում,
• Իրականացնել սույն խնդրակազմի լուծման միջազգային փորձի և արտաքին շուկաներում առկա տեխնիկական միջոցների ուսումնասիրություն և դրա հիման վրա առաջարկությունների փաթեթ մշակել, ներկայացնել թե պետական և համայնքային պատասխանատու մարմիններին, և թե անմիջապես կրթական ու մշակութային հաստատությունների պատասխանատուներին,
• Մոբիլիզացնել ծնողական համայնքի և երեխանեի պաշտպանությամբ զբաղվող այլ ինստիտուտների մարդկային և ֆինանսական ռեսուրսները խնդրի լուծման գործում անմիջական և թիրախային ազդեցություն ունենալու նպատակով:
