06/10/2026
Սիրելի՛ ուսուցիչներ, կրթության ոլորտի հարգելի՛ ներկայացուցիչներ,
Հայաստանի արհմիությունների կոնֆեդերացիայի և անձամբ իմ անունից ջերմորեն շնորհավորում եմ ձեզ Ուսուցչի տոնի առթիվ։
Ուսուցչի աշխատանքը մասնագիտությունից շատ ավելին է։ Այն ամենօրյա պատասխանատվություն է, նվիրում ու հավատ՝ յուրաքանչյուր երեխայի կարողությունների և ապագայի հանդեպ։ Դպրոցում ստացած գիտելիքների հետ միասին մենք մեզ հետ ամբողջ կյանքում տանում ենք նաև մեր ուսուցիչներից սովորած արժեքները՝ աշխատասիրությունը, ազնվությունը, պատասխանատվությունը, միմյանց լսելու և հարգելու կարողությունը։
Այսօր հատկապես կարևոր է արժևորել ուսուցչի աշխատանքը ոչ միայն շնորհակալության խոսքերով, այլև նրա արժանապատիվ աշխատանքի, սոցիալական պաշտպանվածության և իրավունքների ապահովմամբ։ Ուսուցիչը պետք է զգա, որ իր աշխատանքը գնահատված է, իր ձայնը՝ լսելի, իսկ իր իրավունքները՝ պաշտպանված։
Սիրելի՛ ուսուցիչներ, շնորհակալություն ձեր համբերության, հետևողական աշխատանքի և այն մեծ ներդրման համար, որ ամեն օր ունենում եք մեր երեխաների, մեր հասարակության և մեր երկրի ապագայի ձևավորման գործում։
Մաղթում եմ ձեզ առողջություն, ուժ, մասնագիտական նոր հաջողություններ, արժանի գնահատանք և շնորհակալ աշակերտներ։ Թող ձեր աշխատանքը միշտ ուղեկցվի հարգանքով, վստահությամբ և այն գիտակցությամբ, որ ձեր կատարած գործն իսկապես կարևոր է։
Շնորհավոր Ուսուցչի տոնը։
Էլեն Մանասերյան
Հայաստանի արհմիությունների կոնֆեդերացիայի նախագահ
