03/06/2026
Սիրելի՛ հայրենակիցներ,
խնդրում եմ կարդալ ՈւՇԱԴԻՐ:
2018 թվականի թավշյա հեղափոխությունից հետո Հայաստանի իշխանությունների կատարած աշխատանքները Ջավախքի և ջավախքցիների համար.
1. Հեղափոխությունից հետո վարչապետ Նիկոլ Փաշինյանը մայիսի 30-31-ը իր առաջին պաշտոնական այցը կատարեց Վրաստան: Այցի շրջանակներում վարչապետը նախ աննախադեպ շրջայց կատարեց Ծալկայի, Նինոծմինդայի ևԱխալքալաքի շրջանների մի շարք բնակավայրեր և շփումներ ունեցավ տեղի հայ բնակչության հետ՝ արժանանալով ջերմ ընդունելության: Ապա Վրաստանի իշխանությունների հետ ձեռք բերեց խորխորատների վերածված Նինոծմինդա-Հայաստանի սահման ճանապարհի վերակառուցման համաձայնությունը: Ախալքալաք քաղաքում բնակչության հետ հանդիպման ժամանակ ևս մարդկանց կողմից բարձրացվեց վերոնշյալ խնդիրը, և Վրաստանի փոխվարչապետ Միխեիլ Ջանելիձեն վերահաստատեց Վրաստանի կառավարության պատրաստակամությունը: 2018-2019 թվականներին կառուցվեց Նինոծմինդա-Հայաստանի սահման ճանապարհը, որի համար մեր խորին երախտագիտությունն ենք հայտնում եղբայրական Վրաստանի իշխանություններին:
2. 2018թ.-ին վարչապետ Նիկոլ Փաշինյանը միլիարդավոր դրամների համաներում կիրառեց արագաչափ տեսախցիկների արձանագրած տուգանքների մասով: Առանձին որոշմամբ համաներումը տարածվեց նաև վրացական պետհամարանիշներով ավտոմեքենաների տուգանքների վրա, որով ջավախքցիներին ներվեց ավելի քան կես միլիարդ (513 000 000) ՀՀ դրամի տուգանք:
3. Covid համավարակի ամենածանր ժամանակահատվածում, երբ փակ էին բոլոր պետական սահմանները, Հայաստանի և Վրաստանի համապատասխան գերատեսչությունների սերտ համագործակցության արդյունքում մեծաթիվ ջավախքցիների հնարավորություն է ընձեռվել մուտք գործել Հայաստան և օդային ճանապարհով մեկնել Ռուստաստան արտագնա աշխատանքի, որով էականորեն մեղմվեց սոցիալական լարվածությունը Ջավախքում: Միաժամանակ հնարավորություն ընձեռվեց ՀՀ կրթական հաստատություններ դիմած բոլոր դիմորդներին մուտք գործել Հայաստան և հանձնել ընդունելության քննությունները:
4. Հայաստանի կառավարության որոշմամբ 2023-2024 թվականներին կառուցվեց խորխորատների վերածված Աշոցք-Բավրա ճանապարհահատվածը, որի հիմնական շահառուներից են ջավախքցիները, ովքեր անընդհատ բողոքում էին ճանապարհի վատթար վիճակից: Այդ ճանապարհը տարիներ շարունակ անմխիթար վիճակում էր: Նշենք, որ այդ ճանապարհահատվածը ներառված էր հյուսիս-հարավ մայրուղու մեջ, սակայն կառուցվեց արտահերթ՝ ելնելով առաջնահերթությունից:
5. 2023 թվականի ապրիլի 6-ին ՀՀ կառավարության որոշմամբ սփյուռքահայերի համար պարզեցված կարգով ՀՀ բուհեր ընդունված ջավախքցի ուսանողներին տրվեց ռոտացիայի իրավունք, որով բարձր առաջադիմություն ունեցող ջավախքցի ուսանողները ուսումնառության ընթացքում կարող են պայքարել անվճար տեղերի համար:
6. 2024 թվականի հունվարի 26-ին Թբիլիսիում ստորագրվեց Հայաստան-Վրաստան ռազմավարական գործընկերության մասին հռչակագիրը, որով երկու պետությունների միջև հարաբերությունները բարձրացան ռազմավարական մակարդակի, ինչը, բնականաբար, ամրապնդում է վիրահայության տեղն ու դերը Վրաստանում:
7. 2025 թվականի հուլիսի 3-ին ՀՀ Ազգային ժողովն ընդունեց օրենք, որով այն երկքաղաքացիները, ովքեր Հայաստանում երթևեկում են օտարերկրյա վարորդական իրավունքի վկայականներով, այլևս չեն տուգանվի: Բացի այդ, նրանք կարող են իրենց օտարերկրյա վարորդական իրավունքի վկայականի հիման վրա առանց քննություն հանձնելու ստանալ նաև հայկական վարորդական իրավունքի վկայական:
8. Վրաստանի և Հայաստանի երկքաղաքացի հանդիսացող շուրջ 7000 մարդ իրավունք է ստացել կենսաթոշակ և նպաստ ստանալ նաև Հայաստանում, որի գումարը այս պահի դրությամբ կազմում է տարեկան 3.1 մլրդ դրամ:
9. Հայաստանի կառավարության կողմից մշակույթի ոլորտում մի շարք դրամաշնորհային ծրագրեր են իրականացվում Ջավախքում, որոնք էականորեն նպաստում են տարածաշրջանում հայապահպանությանը և մշակութային կյանքի վերելքին։
Պետք է նշեմ, որ այս ամենը կյանքի է կոչվել իմ անմիջական նախաձեռնությամբ, միջնորդությամբ և խորհրդատվությամբ՝ ՀՀ կառավարության, խորհրդարանի և այլ պետական մարմինների հետ սերտ համագործակցության արդյունքում:
Բարեհաջող կերպով շարունակվում են նաև ՀՀ պետական բուհերի հայագիտական մասնագիտություններով սովորող ջավախքցի ուսանողների պետական պատվերով ուսուցումը և ՀՀ առողջապահական հաստատություններում պետական պատվերով սոցիալապես անապահով ջավախքցիների բուժումը:
Սա ոչ ամբողջական ցանկն է այն ամենի, ինչ արել է Հայաստանի կառավարությունը 2018թ.-ի թավշյա հեղափոխությունից ի վեր: Ներդրվել են մեծ ջանքեր և միջոցներ այս ամենն իրականացնելու համար՝ հանուն Ջավախքի մեր սիրելի հայրենակիցների:
Սիրելի՛ հայրենակիցներ,
հունիսի 7-ին Հայաստանում խորհրդարանական ընտրություններ են: Վստահ եմ, որ Հայաստանի անձնագիր կրող յուրաքանչյուր քաղաքացի իր երախտագիտությունն ու շնորհակալությունը կարտահայտի իր ճիշտ ընտրությամբ:
2026-ին մեր ձայնը՝ 16-ին 🇦🇲🫶🏻🇦🇲🫶🏻🇦🇲🫶🏻🇦🇲🫶🏻🇦🇲
