26/07/2026
Կենդանի Լեգենդ՝ Ներսես Սիմոնյան
Կան մարդիկ, ում կյանքի պատմությունն ավելին է, քան պարզապես կենսագրությունը. նրանք պատմության քայլող վկաներն են ու մեր օրերի իսկական հերոսները: Այդպիսի կենդանի լեգենդ է Հայրենական մեծ պատերազմի վետերան Ներսես Հովհաննեսի Սիմոնյանը: Նա մարդ է, ում մարդկային տեսակի, մանկավարժական մեծ վաստակի և բարի անվան մասին կարելի է խոսել անդադար ու հպարտությամբ:
Ծնված լինելով 1924 թվականի օգոստոսի 20-ին Նինոծմինդայի շրջանի Հեշտիա գյուղում՝ Ներսես Սիմոնյանն արդեն թևակոխել է իր կյանքի 102-րդ տարին: Չնայած պատկառելի տարիքին՝ նա դեռ պահպանում է երիտասարդական ավյունն ու հոգու կորովը:
Նրա պատանեկությունն անցել է պատերազմի դաժան հնոցով. շատ երիտասարդ տարիքում մեկնելով ռազմաճակատ՝ նա անցել է մարտական ծանր ու փառավոր ուղի: Մասնակցել է Նովորոսիյսկի, Կերչի, Սևաստոպոլի ազատագրմանը, մարտնչել Կերչ-Էլտիգենի և Ղրիմի բեկումնային գործողություններում: Նինոծմինդայի շրջանից պատերազմ մեկնած շուրջ 5000 հայրենակիցներից տուն վերադարձան միայն 2000-ը, իսկ այսօր այդ հերոսներից ողջ են միայն երկուսը, որոնցից մեկը հենց ինքն է:
Պատերազմից հետո Ներսես Սիմոնյանն իր կյանքը նվիրեց հայրենի գյուղին ու սերունդների կրթությանը: Լինելով երկար տարիների մանկավարժ և դպրոցի տնօրեն՝ նա սերմանեց գիտելիք ու լույս:
Ավելի քան մեկ դար քայլելով կյանքի խորդուբորդ ճանապարհներով՝ նա կերտել է խաղաղ ու բարեկեցիկ ընտանիք, դաստիարակել արժանավոր զավակներ, որոնք այսօր նույնպես վայելում են համագյուղացիների անվերապահ հարգանքը:
Փա՛ռք ու պատիվ մեր մեծերին, փա՛ռք նրանց հաղթական կյանքին, որի արգասիքն այսօրվա խաղաղությունն է: Խորին խոնարհում և առողջություն Ձեզ, սիրելի՛ հերոս:
