01/09/2026
13 համայնքից միայն 4-ն ունեն մշտական հանձնաժողովների աշխատակարգեր
Ինչպե՞ս պետք է աշխատի ավագանու մշտական հանձնաժողովը։
Այս հարցի պատասխանը պետք է ամրագրված լինի հանձնաժողովի աշխատակարգում՝ հստակեցնելով դրա գործունեության ընթացքը, անդամների դերերն ու պատասխանատվությունը և հարցերի քննարկման ընթացակարգերը։
Մեր իրականացրած դիտարկումն ընդգրկել է ՀՀ 10 մարզկենտրոնները՝ Կապան, Եղեգնաձոր, Արտաշատ, Արմավիր, Աշտարակ, Հրազդան, Գավառ, Գյումրի, Վանաձոր և Իջևան, ինչպես նաև Լոռու մարզի Ստեփանավան, Տաշիր, Ալավերդի և Սպիտակ համայնքները։
Դիտարկված համայնքներից 13-ի ավագանու կանոնակարգերով նախատեսվում է, որ մշտական հանձնաժողովների գործունեությունը պետք է կարգավորվի հանձնաժողովների կողմից ընդունված աշխատակարգերով։
Մենք ուսումնասիրություն ենք իրականացրել՝ պարզելու, թե գործող մշտական հանձնաժողովներն արդյոք ունեն հաստատված աշխատակարգեր։
📊 Ի՞նչ ցույց տվեց ուսումնասիրությունը։
🟢 4 համայնքում՝ Ալավերդի, Տաշիր, Եղեգնաձոր և Հրազդան, գործող մշտական հանձնաժողովներն ունեն հաստատված աշխատակարգեր։
🔴 9 համայնքում հաստատված աշխատակարգեր չկան։
Ինչո՞ւ է աշխատակարգը կարևոր․
Մշտական հանձնաժողովները ավագանու աշխատանքի կարևոր օղակներից են։ Հենց այստեղ են նախնական քննարկվում ավագանու նիստերի օրակարգում ընդգրկվող բազմաթիվ հարցեր, ուսումնասիրվում առաջարկները և ձևավորվում համապատասխան դիրքորոշումներ։
Աշխատակարգը պարզապես ձևական փաստաթուղթ չէ։ Այն հստակեցնում է, թե ինչպես է կազմակերպվում հանձնաժողովի աշխատանքը։
Մասնավորապես, աշխատակարգով կարող են սահմանվել՝
▪️ հանձնաժողովի նախագահի, քարտուղարի և անդամների գործառույթները,
▪️ հարցերի քննարկման և քվեարկության կարգը,
▪️ համատեղ և հեռավար նիստերի անցկացման ընթացակարգերը,
▪️ հանձնաժողովի անդամների բացակայությունների հաշվառումը,
▪️ հանձնաժողովի գործունեությանն առնչվող այլ ընթացակարգեր։
Հստակ և հրապարակային ընթացակարգերը կարևոր են հանձնաժողովների աշխատանքի թափանցիկության, վերահսկելիության և հաշվետվողականության ապահովման համար։
Սա կարևոր է նաև քաղաքացիների համար, քանի որ մշտական հանձնաժողովներում քննարկվող հարցերը կարող են անմիջականորեն վերաբերել համայնքի բյուջեին, գույքին, ծրագրերին և բնակիչների առօրյային։
Տեղական ժողովրդավարության արդյունավետությունը կախված է նաև նրանից, թե որքան հստակ, թափանցիկ և հաշվետու են ավագանու աշխատանքի ընթացակարգերը։
Այս հրապարակումը պատրաստվել է ԵՄ կողմից ֆինանսավորվող «Կայուն, ազդեցիկ և ներառական քաղհասարակություն» (ԿԱՆՔ) ծրագրի շրջանակում։ Ծրագիրն իրականացվում է Ժողովրդավարության զարգացման հիմնադրամի (ԺԶՀ), «Մարդը կարիքի մեջ» հասարակական կազմակերպության և «Բուն» գիտամշակութային հիմնադրամի կողմից: Այն նպատակ ունի ամրապնդել քաղաքացիական հասարակության դերը Հայաստանում՝ որպես դիմակայուն, անկախ և վստահելի գործոն ժողովրդավարական կառավարման, քաղաքականությունների մշակման և համայնքային հզորացման գործում։
Այս հրապարակման բովանդակության համար պատասխանատու է «Ուղղակի ժողովրդավարություն» ՀԿ-ն, և այն պարտադիր չէ, որ արտացոլի Եվրոպական միության պաշտոնական դիրքորոշումը։
#կանքծրագիր #ԿԱՆՔ
