Իջևանում ՍՕՍ մանկական գյուղը հիմնադրվել է 2009թ.-ին: Երեխաների ընդունելությունը մեկնարկել է 2010թ.-ի սկզբում: Ընդհանուր առմամբ Իջևանի մանկական գյուղում կարող է իրականացվել 91 երեխայի խնամք 14 ընտանեկան տներում:
Վերջին տարիների ընթացքում դիտարկվում է ընտանեկան հանգամանքների պատճառով ժամանակավոր կացարանի և անհետաձգելի միջամտության կարիք ունեցող երեխաների թվի կտրուկ աճ: Այս կարիքը բավարարելու համար
2013թ.-ի նոյեմբերից ՍՕՍ Մանկական Գյուղեր Հայաստանն իրականացնում է ճգնաժամային իրավիճակներում գնտվող ընտանիքների երեխաների համար կարճաժամկետ խնամքի մոդելը: Ներկայումս Իջևանի մանկական գյուղում կան երկու կարճաժամկետ խնամքի կենտրոններ, որոնք ծառայում են որպես ՍՕՍ ընտանիքում երեխաների կարճաժամկետ խնամքի իրականացման վայրեր:
Մեր կազմակերպությունը ձգտում է ապահովել երեխաների խնամքի հնարավորինս լավագույն պայմաններ՝ մշտապես վերանայելով և բարելավելով մեթոդներն ու ներդնելով նորամուծություններ: 2013թ.-ին մենք սկսեցինք փորձարկել ընտանեկան տիպի խնամքի վրա հիմնված նոր մոդել նույն համայնքում բնակվող ամուսնական զույգի հետ որպես ՍՕՍ ծնողներ, որը նման է մասնագիտացված խնամատարությանը: Ներկայումս գյուղում կան երեք ՍՕՍ ամուսնական զույգեր:
2011թ.-ից սկսած բոլոր մեր ծառայություններն ու միջամտությունները, ուղղված մասնավորապես դժվարին իրավիճակներում գտնվող երեխաներին Տավուշի մարզում, գործում են մեկ հովանու ներքո: Ընտանիքների ամրապնդման ծրագիրը, Ընտանիքների ամրապնդման «Տավուշ» ծրագիրը, Մանկական Գյուղը (ընտանեկան տիպի խնամք), Կրթական ծրագիրը և Շահերի պաշտպանության գործունեությունը այժմ կյանքի են կոչվում Մեկ ծրագրի շրջանակներում՝ «Իջևան» մանկական գյուղ ծրագիր, ինչը հնարավորություն է տալիս մեզ դժվար իրավիճակում հայտնված յուրաքանչյուր երեխայի անհատական կարիքներին առավել արդյունավետ արձագանքել:
