11/10/2026
Երեկ «1000 ՎԱՀԱՆ» Բարեգործական հիմնադրամը գործընկերների հետ Խնձորեսկում էր։
Խնձորեսկի պատմության թանգարանի հրավերով հիմնադրամը տեղի երեխաների համար կազմակերպել էր կրթամշակութային ծրագիր՝ նպատակ ունենալով նրանց համար նորովի բացահայտել մեր ազգային մշակույթը, պատմությունն ու արվեստը։
Ծրագիրն իրականացվեց «1000 ՎԱՀԱՆ» հիմնադրամի գործընկերների մասնակցությամբ՝ կոմպոզիտոր, երաժիշտ և ռեժիսոր, ՀՀ վաստակավոր արտիստ Արա Գևորգյանի և ժողովրդական երգիչ, ազգագրական երգերի կատարող, ՀՀ վաստակավոր արտիստ Արսեն Գրիգորյանի, «Արար» հայ ազգային արվեստի պահպանման կենտրոնի, «Ավետիս» շրջիկ թատրոնի, փորձագետ Ռուբեն Սարգսյանի, Պատմության թանգարանի ներկայացուցիչ Լիլիթ Գասպարյանի հետ։
Խնձորեսկի, Ներքին Խնձորեսկի և Հարթաշենի երեխաների համար օրը հագեցած էր հետաքրքիր հանդիպումներով ու փորձառություններով։
Երեխաները ծանոթացան վահանների կիրառությանը, վերհիշեցին մեր պատմության կարևոր էջերը, զրույց ունեցան Արա Գևորգյանի հետ, իսկ «Ավետիս» շրջիկ թատրոնը նրանց ներկայացրեց «Աշխատասեր Հուռի» ինտերակտիվ ներկայացումը։ Երեխաները նաև մասնակցեցին կավագործության վարպետաց դասի՝ հնարավորություն ունենալով սեփական ձեռքերով ստեղծել և ճանաչել հայկական ավանդական արհեստներից մեկը։
Դե իսկ օրվա վերջում երեխաների համար ելույթ ունեցավ սիրված ժողովրդական երգիչ, ազգագրական երգերի կատարող, ՀՀ վաստակավոր արտիստ Արսեն Գրիգորյանը՝ օրը եզրափակելով ազգային երգ ու երաժշտությամբ։
Այսպիսի ծրագրերը հնարավորություն են տալիս երեխաներին ոչ միայն սովորել ու բացահայտել, այլև սեփական փորձառությամբ ճանաչել մեր պատմությունը, մշակույթն ու արվեստը՝ ստեղծելով կենդանի և անմիջական կապ։
