30/07/2025
🎥 Արայիկի լուրերը՝ մտքի և ժեստերի միջոցով
📌 Այս տեսանյութը նկարահանվել է "ՀԽՄ" ՀԿ-ի երիտասարդական հավաքատեղիում, որտեղ յուրաքանչյուր երկուշաբթի հավաքվում են միջինից բարձր տարիք ունեցող լսողության խանգարումներ ունեցող (ԼԽՈՒ) անձինք՝ շաբաթվա լրահոսը քննարկելու նպատակով։
📌 Այս գործընթացի մասին կարճ պատմում է Արայիկ Գալստյանը։ Նա ամբողջ շաբաթվա ընթացքում տարբեր լրատվական աղբյուրներից հավաքում է կարևոր տեղեկություններ, որոնցից հետո դրանք ներկայացնում է իր ընկերներին՝ ժեստերի լեզվով։ Արայիկը չի սահմանափակվում միայն մեկ լրատվամիջոցով. նա համադրում է տարբեր աղբյուրներից ստացված տեղեկությունները՝ վերլուծելով ու ճշտելով դրանք։
🔹 Նա պատմում է, որ հեռուստատեսային լրատվությունները ԼԽՈՒ անձանց համար հաճախ մատչելի չեն՝ սկսած ժեստերի լեզվի թարգմանություններից մինչև ենթագրերի բացակայություն։ Այս խնդիրներն ունեն պարզ լուծում, եթե օրենքով սահմանված մատչելիության պահանջները պատշաճորեն ապահովեն բոլոր հեռուստաընկերություններն ու մեդիաարտադրողները։
🔹 Արայիկը վստահեցնում է, որ իր ներկայացրած տեղեկատվությունը արժանահավատ է, սակայն նաև կարևորում է, որ յուրաքանչյուր մարդ ինքնուրույն վերլուծի ստացած տեղեկատվությունը, քննարկի այն և ձևավորի իր կարծիքը։ Նա հատկապես խորհուրդ է տալիս հետևել մի քանի վստահելի մեդիաաղբյուրների, որոնցից ինքը օգտվում է նախքան տեղեկությունները ժեստերի լեզվով ներկայացնելը շահառուներին։
🔹 Արայիկ Գալստյանը վառ օրինակ է միջինից բարձր տարիքի շահառուների շրջանում՝ իր վերլուծական մտածողությամբ ու տեղեկատվության նկատմամբ պատասխանատու վերաբերմունքով։ Նա ասում է.
📢 «Ստացած տեղեկությունը ստուգում եմ մի քանի աղբյուրներով և միայն հետո ներկայացնում ընկերներիս։ Այնուհետև քննարկում ենք՝ մեր կարծիքները փոխանակելով»։
Նա նշում է, որ ԼԽՈՒ անձինք հաճախ զրկված են ամբողջական տեղեկատվության հասանելիությունից, ինչն էլ նրանց մեջ առաջացնում է վստահության պակաս մեդիայի հանդեպ։ Մատչելի տեղեկատվությունը Արայիկը տեսնում է այս կերպ՝
- կարևորվող ուղերձների,
- ԱԺ ելույթների,
- տոնակատարությունների,
- կառավարության նիստերի,
- ֆիլմերի, մուլտֆիլմերի և այլ հաղորդումների՝ ժեստերի լեզվով թարգմանության և ենթագրերի առկայություն։
Տեսանյութի նկարահանման ընթացքում պարզ դարձավ, որ շահառուները գնահատում են թե՛ կենդանի թարգմանությունը, թե՛ յուրաքանչյուր երկուշաբթի կազմակերպվող քննարկումները։ Սակայն Արայիկը ընդգծում է՝ որքան կարևոր է կենդանի շփումը, նույնքան կարևոր է մեդիայի ընդհանուր մատչելիությունը ԼԽՈՒ համայնքի համար։
Տեսանյութում կարելի է տեսնել, թե ինչպես են շահառուները ակտիվորեն քննարկում շաբաթվա լրահոսից տարբեր նյութեր։
✊ Շնորհակալություն ենք հայտնում Արայիկ Գալստյանին՝ իր նվիրված աշխատանքի, ինչպես նաև համայնքում մեդիագրագիտության և տեղեկատվության շուրջ աշխույժ քննարկումների կազմակերպման համար։
«Մատչելի մեդիան և խոսող ձեռքերը» ծրագիրն իրականացվում է «STRIVE» ծրագրի շրջանակներում «Հայաստանի Խուլերի Միավորում» ՀԿ կողմից։ «STRIVE» ծրագիրը համաֆինանսավորվում է Եվրոպական միության կողմից և իրականացվում է ՆԵՖ Բելգիայի (NEF Belgium) կողմից՝ համագործակցությամբ չորս գործընկեր կազմակերպությունների․ «Ագաթ» հաշմանդամություն ունեցող կանանց իրավունքների պաշտպանության կենտրոն ՀԿ, «ԲԼԵՋԱՆ» բնապահպանական, սոցիալական, բիզնեսի աջակցության ՀԿ, «ՎԻՆՆԵԹ Գորիս» զարգացման հիմնադրամ և «Դիլիջանի երիտասարդների համագործակցության կենտրոն» ՀԿ:
