Հայաստանի Բուհերի Արհմիություն - Trade Union of Higher Education of Armenia

08/03/2026

Սիրելի՛ կանայք և աղջիկներ,

Սրտանց շնորհավորում եմ ձեզ Մարտի 8-ի՝ Կանանց միջազգային օրվա կապակցությամբ։

Այս գարնանային տոնը ոչ միայն գեղեցկության և մայրության խորհրդանիշ է, այլև հիշեցում է կանանց իրավունքների, հավասար հնարավորությունների և արժանապատիվ աշխատանքի կարևորության մասին։ Կանանց դերը հասարակության զարգացման, ընտանիքի ամրապնդման և աշխատանքային կոլեկտիվների առաջընթացի գործում անգնահատելի է։

Բարձր եմ գնահատում ձեր նվիրվածությունը, աշխատասիրությունը և ակտիվ մասնակցությունը հասարակական ու աշխատանքային կյանքին։ Հայաստանի բուհերի արհմիութենական կազմակերպությունը մշտապես կարևորում է կանանց աշխատանքային իրավունքների պաշտպանությունը, հավասար հնարավորությունների ապահովումը և անվտանգ ու արժանապատիվ աշխատանքային պայմանների ձևավորումը։

Մաղթում եմ ձեզ ամուր առողջություն, ընտանեկան երջանկություն, բարօրություն և նորանոր հաջողություններ ձեր կարևոր ու պատասխանատու գործունեության մեջ։

Թող գարնանային այս գեղեցիկ տոնը ձեր կյանք բերի նոր հույսեր, ուժ և լավատեսություն։ Շնորհավոր Մարտի 8-ը։

Սիրով և գնահատանքով՝
Հայաստանի բուհերի արհմիության նախագահ Արմեն ԱՎԵՏԻՍՅԱՆ

12/10/2025

ՀԱՅԱՍՏԱՆԻ ԲՈՒՀԵՐԻ ԱՇԽԱՏՈՂՆԵՐԻ ԱՐՀՄԻՈՒԹՅԱՆ ՀԱՄԱԺՈՂՈՎԸ ԸՆՏՐԵՑ ՆԱԽԱԳԱՀ

Հայաստանի բուհերի աշխատողների արհմիության հերթական 6-րդ համաժողովը կայացավ Ծաղկաձորում, համաժողովի եռօրյա աշխատանքների ավարտին նախագահ վերաընտրվեց Հայաստանի բուհերի աշխատողների արհմիության գործող նախագահ, բանասիրական գիտությունների թեկնածու, ԵՊՀ դասախոս Արմեն Ավետիսյանը։

Համագումարին մասնակցում էին անդամ հանդիսացող Հայաստանի բոլոր բուհերի և մուհերի արհմիությունների ղեկավարները և ներկայացուցիչները, կրթության և գիտության ոլորտի ներկայացուցիչներ, ինչպես նաև ՀԱՄԿ-ի ( Հայաստանի արհմիությունների կոնֆեդերացիա) նախագահը։

Իր հաշվետու ելույթում Արմեն Ավետիսյանը ներկայացրեց արհմիության 2020-2025 թվականների գործունեության արդյունքները՝ ընդգծելով, որ վերջին հինգ տարիներին կազմակերպությունը կարողացել է ոչ միայն պահպանել, այլև ամրապնդել իր դերը բուհական համակարգում և ավելացնել անդամ կազմակերպությունների թիվ։ Նրա խոսքով՝ արհմիության հիմնական ուղղությունները եղել են աշխատողների աշխատանքային իրավունքների պաշտպանությունը, կրթության և գիտության ոլորտում աշխատողների աշխատավարձերի բարձրացման և սոցիալական երաշխիքների բարելավման պայքարը, ինչպես նաև երիտասարդ մասնագետների ներգրավումը արհմիութենական շարժմանը։

«Մեր առաքելությունը շարունակվում է. բարձրագույն և մասնագիտական ուսումնական հաստատությունների աշխատողների արժանապատիվ աշխատանքի, սոցիալական արդարության և հավասար հնարավորությունների ապահովումը մնում է մեր գործունեության առանցքում», – նշեց Արմեն Ավետիսյանը՝ շնորհակալություն հայտնելով անդամ կազմակերպություններին վստահության և համագործակցության համար։

Համագումարի ընթացքում ներկայացվեցին նաև արհմիության առաջիկա հնգամյա ծրագրի առաջնահերթությունները, որոնց թվում են բուհական միջավայրում սոցիալական երկխոսության զարգացումը, արհմիութենական կառույցների աշխատանքների թվայնացումը և միջազգային համագործակցության խորացումը։

ՀԱՄԿ-ի նախագահ Elen Manaseryan-ը բարձր գնահատեց Արմեն Ավետիսյանի ղեկավարությամբ իրականացված աշխատանքը՝ ընդգծելով, որ Բուհերի աշխատողների արհմիությունը դարձել է Հայաստանի բարձրագույն ուսումնական հաստատությունների կարևոր սոցիալական գործընկերը և հանդիսանում է ՀԱՄԿ–ի խոշոր ճյուղային արհմիություններից մեկը։

Արմեն Ավետիսյանը բուհերի արհմիության նախագահ էր ընտրվել 2020 թվականին։ Նրա վերընտրությունը խորհրդանշում է համաժողովի պատվիրակների բարձր վստահությունը և արված գործի շարունակականության ապահովման ակնկալիքը բուհական արհմիության քաղաքականության մեջ։

01/09/2025

Հարգելի դասախոսներ, կրթության ոլորտի սիրելի ներկայացուցիչներ,

Սրտանց շնորհավորում ենք ձեզ Գիտելիքի և դպրության օրվա, ինչպես նաև նոր ուսումնական տարվա մեկնարկի առթիվ։
Սեպտեմբերի 1-ը խորհրդանշում է ոչ միայն աշնան առաջին օրը, այլև նոր մի ճանապարհ՝ դեպի գիտելիք, կրթություն ու զարգացման նոր հորիզոններ։ Այսօր առավել, քան երբևէ կրթությունն ու գիտելիքը մեզ համար առանցքային արժեքներ են՝ մեր պետության հզորացման, ինքնության պահպանման և ապագայի կերտման գործում։

Դարերի ընթացքում հայ ժողովուրդը գոյատևել է ու զորացել իր մտքի ուժով։ Այսօր մենք կանգնած ենք մի շրջադարձային փուլում, երբ կրթված, մտածող ու պատասխանատու քաղաքացին դարձել է մեր պետության ամենաանհրաժեշտ ռեսուրսը։ Այս պատասխանատվությունը առաջին հերթին դրված է ձեզ վրա՝ մեր հարգարժան դասախոսներ։ Դուք եք ձևավորում այն սերունդը, որը ոչ միայն գիտելիք կունենա, այլ նաև կրողը կլինի արժեքների, հայրենասիրության ու պետական մտածողության։

Շնորհակալություն ենք հայտնում ձեր նվիրված աշխատանքի, հոգատարության և ամենօրյա տոկուն ջանքերի համար։ Ձեր գործունեությունն այսօր պարզապես մասնագիտական պարտականություն չէ, այլ՝ առաքելություն։
Մաղթում ենք ձեզ ուժ, արգասաբեր ստեղծագործական եռանդ և նոր ձեռքբերումներ։
Թող այս ուսումնական տարին լինի հաջողություններով ու զարգացմամբ լի՝ ինչպես ձեզ համար, այնպես էլ մեր երկրի ողջ կրթական համակարգի։

Սիրով՝
Հայաստանի բուհերի արհմիության նախագահություն

10/05/2025

Աշխատանքային իրավունքների խախտումները դեռևս լուրջ խնդիր են Հայաստանի աշխատաշուկայում․ թերի աշխատանքային պայմանագրեր, վճարման ուշացումներ և աշխատողների իրավունքների սահմանափակումներ։ Այս համատեքստում կարևոր է արհմիությունների դերը՝ որպես աշխատողների շահերի պաշտպան և սոցիալական արդարության ուժեղացման գործիք։ ՍիվիլՆեթի Ժաննա Ավագյանը զրուցում է Հայաստանի բուհերի արհմիությունների նախագահ Արմեն Ավետիսյանի հետ՝ պարզելու, թե ինչպես են արհմիությունները արձագանքում խախտումներին, ինչ մեխանիզմներով են պաշտպանում աշխատողներին և ինչ մարտահրավերների առջև են կանգնած այսօր։

Աշխատանքային իրավունքների խախտումները դեռևս լուրջ խնդիր են Հայաստանի աշխատաշուկայում․ թերի աշխատանքային պայմանագրեր, վճարման ուշացումներ և աշխատողների իրավու.....

06/05/2025

Հայաստանի բուհերի արհմիությունը մեծ վշտով տեղեկացավ ակադեմիկոս Ռադիկ Մարտիրոսյանի մահվան լուրը։ Հայաստանի գիտության և բարձրագույն կրթության զարգացման գործում անփոխարինելի ներդրում ունեցող մեծանուն գիտնականի անդառնալի կորուստը ծանր հարված է բուհական և ամբողջ ակադեմիական հանրության համար։
Ռադիկ Մարտիրոսյանը 1993-2006 թթ. զբաղեցրել է Երևանի պետական համալսարանի ռեկտորի պաշտոնը։ 2006-2021 թթ. Մարտիրոսյանը ստանձնել է նաև Հայաստանի գիտությունների ազգային ակադեմիայի նախագահի պաշտոնը։ Ակադեմիկոս Ռադիկ Մարտիրոսյանը նշանակալի հետք է թողել գիտական ասպարեզում։

Ակադեմիկոս Ռադիկ Մարտիրոսյանը բացառիկ մարդ և մանկավարժ էր։ Նրան բնութագրում էին ազնվությունն ու համեստությունը, անշահախնդիր հոգատարությունը այլոց նկատմամբ։ Նրա սերը գիտության և հայրենիքի հանդեպ օրինակ է ծառայել բազմաթիվ ուսանողների և երիտասարդ գիտնականների համար։ Խոնարհություն, ջերմություն և հոգատարություն ցուցաբերելով, նա ձևավորեց մի ամբողջ սերունդ, որը այսօր ինքնուրույն շարունակում է նրա սկսած ուղին։

Հայաստանի բուհերի արհմիությունը խոր ցավակցություն է հայտնում Ռադիկ Մարտիրոսյանի ընտանիքին, հարազատներին և բոլոր գործընկերներին։ Նրա մահը անասելի կորուստ է ոչ միայն ակադեմիական, այլև ողջ հայ կրթական հասարակության համար։
Միևնույն ժամանակ մեծ հարգանքով հիշում ենք նրա անթիվ ծառայությունները և նվաճումները։ Նրա թողած հարուստ ժառանգությունը, արժեքներն ու գաղափարները կմնան մեզ համար մշտական մղիչ ուժ և ուղեցույց։ Նրա փոխանցած պատգամներն ու սկզբունքները մշտապես առաջնորդելու են մեր քայլերը և օրինակ կլինեն ապագա սերունդների համար։

Խունկ և խոնհարում մեծ գիտնականի և կրթության կազմակերպչի հիշատակին։

30/04/2025

Այսօր Հայաստանի արհմիությունների կոնֆեդերացիան, որպես աշխատողների շահերը պաշտպանող կազմակերպություն, ևս մեկ անգամ շեշտում է աշխատավորի դերի կարևորությունը պետության սոցիալ-տնտեսական զարգացման գործում։
Աշխատող մարդն է հասարակության իրական հենարանը, ով կառուցում է տնտեսությունը, պահում է պետական համակարգերը, ապահովում երկրի գոյության բոլոր օղակները։

ՀԱՅԱՍՏԱՆԻ ԱՐՀՄԻՈՒԹՅՈՒՆՆԵՐԻ ԿՈՆՖԵԴԵՐԱՑԻԱՅԻ
ՀԱՅՏԱՐԱՐՈՒԹՅՈՒՆԸ

ՄԱՅԻՍԻ 1 -ի՝ ԱՇԽԱՏԱՎՈՐՆԵՐԻ ՄԻՋԱԶԳԱՅԻՆ ՕՐՎԱ ԱՌԹԻՎ

Մայիսի 1-ը՝ Աշխատանքի միջազգային օրը, օրացույցում կարևոր օր է, երբ աշխարհը բարձրաձայնում է աշխատողի արդար վարձատրության, ապահով և արժանապատիվ աշխատանքային իրավունքի, սոցիալական արդարության մասին։ Այսօր Հայաստանի արհմիությունների կոնֆեդերացիան, որպես աշխատողների շահերը պաշտպանող կազմակերպություն, ևս մեկ անգամ շեշտում է աշխատավորի դերի կարևորությունը պետության սոցիալ-տնտեսական զարգացման գործում։
Աշխատող մարդն է հասարակության իրական հենարանը, ով կառուցում է տնտեսությունը, պահում է պետական համակարգերը, ապահովում երկրի գոյության բոլոր օղակները։
Մինչդեռ, Հայաստանի Հանրապետությունում աշխատող մարդը շարունակում է մնալ խոցելի խմբերից մեկը։
Աշխատողը մեծամասամբ հայտնվում է՝
• անհավասար պայմաններում,
• խախտված իրավունքներով,
• վտանգավոր աշխատանքային միջավայրում,
• անվստահ ապագայի հեռանկարով։
Հայաստանի արհմիութունների կոնֆեդերացիան, լինելով Հայաստանի աշխատավորության շահերը պաշտպանող ամենամեծ ու ներկայացուցչական մարմինը, բարձրաձայնում է, որ այսօր աշխատանքային իրավահարաբերություններում տեղի ունեցող խախտումներն անընդունելի են։
Մենք չենք խոսում բարելավման անհրաժեշտության մասին. մենք պահանջում ենք իրական վերափոխում։
ՀԱՄԿ–ը կոչ է անում ՀՀ կառավարությանը և պահանջում`
• կիրառել արժանապատիվ աշխատանքի սկզբունքները տնտեսության բոլոր ոլորտներում,
• ապահովել աշխատողների սոցիալական պաշտպանությունը՝ հատկապես նվազագույն աշխատավարձի, աշխատավարձի ինդեքսավորման, աշխատանքային անվտանգության և առողջության պահպանման ոլորտներում։ Աշխատողը չպետք է լինի աղքատ, նրա աշխատանքը պետք է լինի բարեկեցիկ կյանքի աղբյուր,
• զարգացնել սոցիալական գործընկերությունն աշխատանքի ոլորտում արհմիությունների, գործատուների և կառավարության միջև հավասարակշռված ու արդար սոցիալ-տնտեսական քաղաքականության իրականացման համար՝ խթանելով կոլեկտիվ պայմանագրերի համակարգի զարգացումը և ընդլայնելով արհմիությունների գործառույթները,
• ձեռնարկել վճռական քայլեր աշխատաշուկայում առկա ստվերի, շահագործման և խտրական դրսևորումների վերացման ուղղությամբ,
• սոցիալական գործընկերության շրջանակներում մշակել և իրականացնել «Արժանապատիվ աշխատանք» ազգային ռազմավարություն, որի նպատակն է ստեղծել արդար, անվտանգ և մարդակենտրոն աշխատաշուկա,
• ՀՀ աշխատանքային օրենսդրությամբ սահմանված կարգով իրականացնել աշխատավարձերի ինդեքսավորում, նվազագույն աշխատավարձը սահմանելով ոչ պակաս, քան 100.000 ՀՀ դրամ՝ հիմնված առկա գնաճի վրա,
• ճանաչել և հարգել աշխատողների՝ արհմիությանը անդամակցելու իրավունքը՝ առանց ճնշումների, խոչընդոտելու, միջամտելու կամ խտրականության,
• օրենսդրությամբ սահմանել կոլեկտիվ բանակցությունների պարտադիր կիրառումը,
• օրենսդրությամբ ներդնել առողջ և անվտանգ աշխատանքային միջավայրի ապահովման ժամանակակից նորմեր և կանոններ։

Հայաստանի արհմիությունների կոնֆեդերացիան պահանջում է՝
Արժանապատիվ աշխատանք,
Արդար վարձատրություն,
Սոցիալական պաշտպանվածություն
առանց պաշտպանված աշխատողի չկա զարգացող տնտեսություն
առանց արդար վարձատրության չկա սոցիալական կայունություն


Հայաստանի արհմիությունների կոնֆեդերացիայի
Գործադիր կոմիտե
30 ապրիլի 2025թ․

17/03/2025

Հայաստանի բուհերի արհմիությունը կրկին առաջատարն է:

📍Ավարտվեց մարտի 13-16-ը Հայաստանի արհմիությունների կոնֆեդերացիայի և Friedrich-Ebert-Stiftung, Armenia–ի կողմից կազմակերպված «Արհմիութենական մարտահրավերներ 2025» միջոցառումը, որին ակտիվորեն մասնակցում էր նաև Հայաստանի բուհերի արհեստակցական կազմակերպությունների ճյուղային հանրապետական միության (Հայաստանի Բուհերի Արհմիություն) թիմը՝ իր 6 մարզիկներով:
Չորս մարզաձևերում մեր կին և տղամարդ մարզիկները վաստակեցին երկու չեմպիոնական 🥇🥇 ոսկե և երեք 🥈🥈🥈 արծաթե մեդալներ:
Մասնակից 17 թիմերի մեջ մեր մարզիկների վաստակած մեդալների ընդհանուր հաշվարկով Հայաստանի բուհերի արհմիություն թիմը արդեն երկրորդ տարին անընդմեջ գրավեց առաջին հորիզոնականը և արժանացավ «Արհմիութենական սպորտ 2025» գլխավոր🏆գավաթին:

👏👏Շնորհավորում ենք մեր բոլոր մեդալակիրներին և մասնակիցներին:

16/12/2024

Հայաստանի բուհերի արհեստակցական կազմակերպությունների ճյուղային հանրապետական միությունը «Սոլիդարիթի Սենթեր» (Solidarity Center) կազմակերպության հայաստանյան մասնաճյուղի Աշխատանքային իրավունքների հարթակի հետ համատեղ կազմակերպել է հերթական արհմիութենական երկօրյա արտագնա ծրագիրը «ՌԱԶՄԱՎԱՐԱԿԱՆ ՊԼԱՆԱՎՈՐՈՒՄԸ ԱՐՀՄԻՈՒԹՅՈՒՆՆԵՐՈՒՄ» խորագրով:

✅Ծրագրի առաջին օրը՝ դեկտեմբերի 14-ին, մասնակիցներին ներկայացվեցին սեմինարներ «Արհեստակցական կազմակերպությունների նպատակներն ու առանձնահատկությունները», «Արհմիութենական առաջնորդություն» և «Ռազմավարական պլանավորում։ Ինչպե՞ս սահմանել սմարթ նպատակներ» թեմաներով։

✅Ծրագրի երկրորդ օրը՝ դեկտեմբերի 15-ին, մասնակիցներին ներկայացվեցին սեմինարներ «Ռազմավարական պլանավորում։ SWOT վերլուծություն», «Ինչպես սահմանել արդյունքներ։ Քանակական և որակական ցուցանիշներ։ Ռազմավարական ծրագրի ձևաչափ։ Միջոցառումների ծրագիր» և այլ թեմաներով:

✅Դասընթացն անցկացվեց ոչ ֆորմալ կրթական համակարգում տարածված բազմաթիվ խաղերի, խմբային աշխատանքների, տեսահոլովակների և քննարկումների միջոցով:

#Արհմիություններ

03/12/2024

✊️Ասօր գործադուլ հայտարարած վարորդների աշխատանքային իրավունքները խախտվում են, վարորդներն օբյեկտիվորեն տեղյակ չեն իրավունքների խախտումների կանխարգելման և վերականգնման հնարավոր գործիքներից ու միջոցներից։

Found on Google from fbu.org.uk

02/09/2024

Շիրակի պետական համալսարան/Shirak State University-ի արհեստակցական կազմակերպությունն, այսօր պաշտոնապես անդամակցեց Հայաստանի բուհերի արհեստակցական կազմակերպությունների Ճյուղային հանրապետական միությանը:
Շնորհավորում ենք, Շիրակի Մ. Նալբանդյանի անվան պետական համալսարանի արհեստակցական կազմակերպության անդամներին Հայաստանի բուհերի արհմիության ամենամեծ ընտանիքի լիիրավ անդամ դառնալու կապակցությամբ՝ մաղթելով նորանոր հաջողություններ:

#Արհմիություններ

01/09/2024

Հարգելի Դասախոսներ,
Կրթության և գիտության ոլորտի սիրելի կազմակերպիչներ,

սիրով և սրտանց շնորհավորում ենք բոլորիս Գիտելիքի և դպրության օրվա և նոր ուսումնական տարվա մեկնարկի՝ սեպտեմբերի 1-ի կապակցությամբ՝ մաղթելով արդյունավետ ուսումնական տարի, հաջողություններ ու նորանոր ձեռքբերումներ։

Դարեր շարունակ կրթությունն ու գիտելիքը մեր հարատևման հիմքերից են եղել, իսկ այսօր գիտելիքն ի նպաստ պետականաշինությանը, հայրենիքի հզորությանը ծառայեցնելու ժամանակն է: Մենք զարգացման և մեզ վերգտնելու մեկ ճանապարհ ունենք՝ կրթությունը, կրթությամբ՝ հայրենասիրությունն ու պետականաշինությունը:

Սիրելի պրոֆեսորադասախոսական կազմ, մաղթում ենք ձեզ հաջողություններ ձեր բարդ և պատասխանատու աշխատանքում: Քանզի ձեր ուսերին են դրված ոչ միայն զուտ աշխատանքային ու մասնագիտական պարտականությունները, այլև մեր սերունդներին որակյալ կրթություն տալու շնորհիվ գիտակից և արժանապատիվ քաղաքացի ձևավորելու պատասխանատվությունը:

Մենք այսօր հայտնվել ենք մի իրականության մեջ, երբ օր օրի երևան եկող ներքին և արտաքին մարտահրավերներին կկարողանանք դիմագրավել արդիական գիտելիքներով, քանզի հասարակության մտավոր ներուժն այն գրավականն է, որն ապահովում է պետության հզորությունը:
Հայաստանի Հանրապետության համար այս օրհասական ու ճակատագրական օրերին մեր երկրի պրոֆեսորադասախոսական արժանապատիվ համայնքն իրենց անմնացորդ ու ամենօրյա աշխատանքով տոկում են հանուն մեր պետության հզորացման ու պետականության հարատևման:

Շնորհակալություն ենք հայտնում ձեզ, ձեր կատարած աշխատանքի, հոգատարության, վերաբերմունքի և արգասաբեր աշխատանքի համար: Դուք, որպես կրթության մշակներ, այս առավել քան կարևոր ժամանակներում չափազանց մեծ առաքելություն ունեք: Ձեր կողմից տրված կրթության և դաստիարակության վրջնարդյունքը պետք է ապահովի մեր երկրի առաջընթացը, անվտանգությունը և հարատևությունը:

Կրկին անգամ շնորհավորում և ցանկանում ենք, որ մեր երկրի կրթական բոլոր հաստատություններում գրանցվեն մեծ հաջողություններ:

Սիրով՝ Հայաստանի բուհերի արհմիություն

26/07/2024

📍Հուլիսի 15-18-ը կայացավ Հնարավորությունների դպրոց 2024-ը։
Սոլիդարիթի Սենթերի, Հայաստանի Բուհերի Արհմիություն - Trade Union of Higher Education of Armenia-ի, Հայաստանի արհմիությունների կոնֆեդերացիայի համագործակցության շրջանակներում Հայաստանի բուհերի արհմիությանը անդամակցող շուրջ 12 բուհերի մոտ 60 ուսանողներ մասնակցեցին 4-օրյա «Հնարավորությունների դպրոց»-ին, որի նպատակն է երիտասարդների շրջանում խթանել իրավունքների, մասնավորապես աշխատանքային իրավունքերի գիտակցման և պաշտպանության մշակույթը, աջակցել նրանց դառնալ արժանապատիվ աշխատանքի ջատագովներ և լինել մրցունակ այսօրվա աշխատաշուկայում։