23/01/2025
GËZUAR 89 Vjetorin Dhimitër Anagnosti
Shoqata VUNOI shpreh krenarinë dhe respektin e saj për figurën e shquar të Dhimitër Anagnostit, birin e fshatit tonë dhe një nga emrat më të ndritur të artit dhe kulturës shqiptare.
Përmes krijimtarisë së tij si regjisor, skenarist dhe shkrimtar, ai ka dhënë një kontribut të jashtëzakonshëm në kinematografinë dhe letërsinë shqiptare, duke lënë gjurmë të pashlyeshme në trashëgiminë kombëtare.
Filmat e tij të njohur, si “Përrallë nga e kaluara” dhe “Gjoleka, djali i Abazit”, mbeten vepra që pasqyrojnë vlerat, traditat dhe ndjeshmëritë e popullit tonë. Po ashtu, drama “Nata e trokitjeve në xhama” në teatër dhe librat e tij letrarë, përfshirë romanin “Koburja nga Evropa”, botuar fillimisht në vitin 2014 dhe ribotuar në vitin 2024, si dhe librin “Ulliri, pema e dhimbjes”, botuar në vitin 2019, dëshmojnë për gjerësinë dhe thellësinë e talentit të tij artistik.
Vlerësimi i tij është shpërblyer me tituj dhe dekorata të larta, si “Nderi i Kombit”, “Nderi i Qarkut të Vlorës”, dhe Dekorata “Gjergj Kastrioti Skënderbeu”.
Në vitin 2023, Shoqata VUNOI pati nderin t’i akordojë titullin “Krenaria e Vunoit”, duke forcuar lidhjen e tij të veçantë me fshatin e lindjes.
Në këtë ditë të shënuar, Shoqata VUNOI shpreh mirënjohjen dhe respektin më të thellë për një personalitet të madh të artit dhe kulturës shqiptare, i cili vazhdon të jetë burim frymëzimi për brezat.
Me respekt,
Shoqata VUNOI
(Në foto: Era, Roza, Dhimitër, Luna Anagnosti)
