S’ka asnjë njeri që mos të ketë ënderruar, në gjumë apo zgjuar, që të fluturojë. I pari njeri që u rrek të fluturonte ishte Ikarus. Dylli me të cilin kishte ngjitur krahët e sajuar me pendë shkriu nga rrezet e diellit. I pari që realizoi projekte inxhinjerike të denja për t’u përmendur është Leonardo Da Vinçi. Sajoji lloj-lloj pajisjesh, formulash, skicash e aparatesh. Arriti të realizonte prototi
pet e makinave fluturuese. Për shkak të teknologjisë së kohës, idetë e tij mundën të gjenin zbatim vetëm shumë shekuj më vonë. E famshme thënia e tij: "Kush arrin të fluturojë qoftë edhe vetëm një herë, ecën me vështrimin lart në qiell e me mendimin fiks kur do të kthehet përsëri atje". Është pikërisht ai babai i deltaplanit e parashutës së sotme. I pari objekt fluturues i ndërtuar nga njeriu është ballona e ndërtuar nga vëllezërit Montgolfier më 1783. Njerëzit e parë që fluturuan ishin vëllezërit Wright. Ishte viti 1903. Aeroplani i tyre i parë u quajt Flyer. Më pas erdhën parashutat e para dhe deltaplani. Ky i fundit u projektua nga Rogallo dhe ishte i pari mjet fluturimi i projektuar thjesht për qejf. Vonë, më 1978, francezët krijuan mjetin e ri struktura e të cilit, pas disa modifikimeve me 1985, nuk ka ndryshuar deri në ditët tona: parapente (mbrojtëse nga shpati). I njohur nëpër botë me shumë emra - parapente, paraglider, parapendio, apo thjesht velë - është sot mjeti fluturues më i lirë, më i përhapur e më i thjeshtë për t’u mësuar, ndërsa paragliding (fluturimi me velë) është tashmë një sport shumë popullor.
