27/08/2026
Qëndrim i Federatës së Sindikatave të Punonjësve të Arsimit, Edukimit dhe Shkencës (FSPAESH), anëtare e KSSH-së, mbi Udhëzimin Nr. 16, datë 27.08.2026.
Ministria e Arsimit ka nxjerrë një tjetër udhëzim, i cili synon, sipas saj, përmirësimin e sistemit arsimor. Megjithatë, ajo që prisnin mësuesit dhe komuniteti arsimor ishte ndërmarrja e masave konkrete për t'iu përgjigjur situatës së vështirë që po kalon arsimi shqiptar, veçanërisht si pasojë e rënies së vazhdueshme të numrit të nxënësve.
Sot, për shkak të shpopullimit masiv, jo vetëm zonat rurale, por edhe shumica e zonave urbane në të gjithë Shqipërinë, me përjashtim të Tiranës, po përballen me ulje të ndjeshme të numrit të nxënësve. Ky realitet kërkon riorganizim të menjëhershëm të sistemit arsimor dhe politika të qarta për mbrojtjen e vendeve të punës së mësuesve. Në të kundërt, qindra e mijëra mësues rrezikojnë të humbasin vendin e punës në vitet e ardhshme.
Fatkeqësisht, edhe ky udhëzim është hartuar pa një konsultim real me grupet e interesit dhe me sindikatat përfaqësuese të mësuesve. Çdo akt normativ që prek drejtpërdrejt jetën profesionale të mësuesve duhet të jetë rezultat i dialogut social dhe i konsultimit të gjerë me aktorët e arsimit. Vetëm në këtë mënyrë mund të ndërtohen politika efektive dhe afatgjata.
Duke analizuar përmbajtjen e udhëzimit, vihet re se një nga ndryshimet kryesore lidhet me rritjen e mundësive për emërimin e drejtuesve në shkolla me numër më të vogël nxënësish. Megjithëse kjo mund të ndihmojë disa shkolla rurale, ajo nuk i jep përgjigje problemit themelor me të cilin përballet arsimi sot: rënies së numrit të nxënësve dhe pasigurisë së vendeve të punës për mësuesit. Sipas konsultimeve që Federata ka zhvilluar me mësuesit në terren, kjo nuk konsiderohet një ndër prioritetet kryesore të sistemit.
Po ashtu, ulja e normës mësimore për mësuesit e Edukimit Fizik nga 22 në 21 orë në javë është një hap pozitiv, por i pamjaftueshëm. Në kushtet aktuale, kur numri i nxënësve po bie vazhdimisht, ne vlerësojmë se duhet të rishikohet norma mësimore për të gjithë mësuesit, pavarësisht profilit, me synimin për të ulur ngarkesën dhe për të garantuar ruajtjen e vendeve të punës. Një normë më e ulët, e përafërt me 18 orë në javë, do të krijonte kushte më të mira për një mësimdhënie cilësore dhe do të ndihmonte në përballimin e situatës së krijuar.
Një tjetër pritshmëri e komunitetit arsimor ishte ulja e numrit të nxënësve për klasë. Arsimi cilësor nuk mund të ndërtohet mbi klasa të mbingarkuara. Federata vlerëson se duhet të synohet gradualisht një numër maksimal prej 15 nxënësish për klasë, duke i kushtuar më shumë vëmendje nevojave individuale të çdo fëmije dhe duke përmirësuar rezultatet e të nxënit.
Pika me të cilën pajtohemi plotësisht është ulja e normës për drejtuesit e ekipeve lëndore. Kjo është një masë e drejtë, e cila njeh dhe vlerëson punën shtesë që kryhet për koordinimin dhe zhvillimin profesional të mësuesve.
Në këto kushte, Ministria e Arsimit duhet të ndërmarrë masa të menjëhershme për mbrojtjen reale të mësuesve dhe të vendeve të tyre të punës. Sistemi arsimor ka nevojë për stabilitet, siguri dhe bashkëpunim. Kur mësuesit jetojnë çdo vit me pasigurinë e humbjes së vendit të punës, është e vështirë të kërkohet prej tyre performancë maksimale dhe angazhim afatgjatë.
Federata e Sindikatave të Punonjësve të Arsimit, Edukimit dhe Shkencës, anëtare e KSSH-së, rithekson nevojën për dialog social të vërtetë dhe për hartimin e politikave afatgjata në arsim. Mendimet e mësuesve, sindikatave dhe të gjithë aktorëve të interesuar duhet të dëgjohen dhe të vlerësohen seriozisht.
Pa krijuar një klimë të qetë pune, pa garantuar siguri profesionale dhe pa ndërtuar politika të qëndrueshme për menaxhimin e burimeve njerëzore, nuk mund të kemi arsimin cilësor që kërkojnë prindërit, nxënësit dhe e gjithë shoqëria shqiptare. Nëse nuk merren masa sot, shumë shpejt sistemi arsimor mund të kalojë nga problemi i mbingarkesës së personelit në mungesën e mësuesve të kualifikuar, duke vënë në pikëpyetje të ardhmen e arsimit në vend.
Federata e Sindikatave të Punonjësve të Arsimit, Edukimit dhe Shkencës (FSPAESH), anëtare e KSSH-së, mbetet e gatshme të japë kontributin e saj në çdo tryezë dialogu dhe konsultimi, duke vënë në dispozicion eksperiencën, kapacitetet njerëzore dhe profesionale të saj për ndërtimin e një sistemi arsimor cilësor, gjithëpërfshirës dhe të qëndrueshëm për të ardhmen.
